1 कुरिन्थियों 6

एप्पू मांमेइं मुकदमे

1अगर तुसन मरां केन्चरी होरि विश्वासी सेइं लड़ाई भोए, त तुसेईं फैसलेरे लेई अधर्मी हाकिमन कां न लोड़े ज़ोवरू; तुसेईं अपने कलीसियारे विश्वासी लोकन ज़ोवरू लोड़े कि तैना तुश्शे मुकदमेरो फैसलो केरन कि कौन सही ते कौन गलते। 2कुन तुस न ज़ानथ, कि परमेशरेरे लोकेईं दुनियारे लोकां केरो न्याय केरनोए? ते अगर तुसेईं दुनियारे लोकां केरो न्याय केरनोए, ते कुन तुस निकड़े करां निकड़े लड़ैइयरो फैसलो केरनेरी काबल नईं? 3तुस ज़ानतथ कि एजने बाले वक्ते मां असेईं तैन स्वर्गदूतां केरो न्याय केरनोए ज़ैना सुर्गे मरां शारोरे थिये, त पक्‍को तुस रोज़ेरी आम गल्‍लां केरो फैसलो केरि बटतथ। 4अगर एरी गल्‍लां भोन, त तुसेईं तैन केरो फैसलो केरनेरे लेई तैन कां न लोड़े जेवरू ज़ैन केरि आदर कलीसियारे लोकन मां न की गाए। 5अवं तुसन छिथानेरे लेई इन ज़ोताईं, कि सच़्च़े तुसन मां अक भी अक्लमन्द न मैल्हो, ज़ै विश्वासी लोकां केरो फैसलो केरे। 6बल्के विश्वासी लोकन एप्पू मांमेइं मुकदमे भोतन, ते तैना भी गैर विश्वासी लोकां केरे सामने।

7पन सच़्च़े तुसन मां बड़ो दोष त ईए, एप्पू मांमेइं मुकदमे केरतथ, बल्के अन्याय किजो न झ़ैल्‍लथ? अपनो नुकसान किजो न झ़ैल्‍लथ? 8बल्के अन्याय केरतथ, ते नुकसान पुज़ातथ, ते तै भी विश्वासी लोकन। 9कुन तुस न ज़ानथ, कि अन्यायी लोक, परमेशरेरे राज़्ज़ेरे बारस नईं भोने? धोखो न खाथ, न वेश्यागामी, न मूरती केरि पूज़ा केरनेबाले, न आयाश, न लुच्‍चे, न तैना ज़ैना मड़द मड़दन सेइं जिसमानी रिश्तो रखतन। 10न च़ोर, न लालच़ी, न पीनेबाले, न गैई देनेबाले, न अंधेर केरनेबाले परमेशरेरे राज़्ज़ेरे बारस भोनेन। 11तुसन मरां पेइले किछ एरे थिये, पन प्रभु यीशु मसीहेरे नंव्वे ते इश्शे परमेशरेरी आत्माई सेइं तुश्शे पाप धोए जे, ते तुस पवित्र भोए ते धर्मी ठहराए।

जिसम परमेशरेरे महिमारे लेई

12तुसन मरां किछ ज़ोई बटतन, कि सब चीज़ां मेरे लेई जाइज़ त आन, पन सब चीज़ां फैइदेरी नईं, सब चीज़ां मेरे लेई जाइज़ त आन, पन अवं कोन्ची भी चीज़रो गुलाम बनेलो। 13तुसन मरां किछ ज़ोई बटतन, खानू पेटेरे लेइए, ते पेट खानेरे लेई, एन सच़्च़े, पन परमेशर रोट्टी भी ते पेटे भी नाश केरेलो, पन जिसम बदमाशी केरनेरे लेई नईं, बल्के प्रभुएरे लेइए; ते प्रभु जिसमेरे लेइए। 14ते परमेशरे, प्रभु यीशु अपने शेक्ति सेइं ज़ींतो केरो, ते तै असन भी ज़ींतो केरेलो। 15कुन तुस न ज़ानथ, कि तुश्शी जाना मसीहेरे अंगन? ते कुन अवं मसीहेरे अंगन वेश्यारे अंगन सेइं शामल केरि? नईं, कधी नईं। 16कुन तुस न ज़ानथ, कि ज़ै कोई वेश्या सेइं न जाइज़ रिश्तो रखते, तै तैस सेइं अक जान भोते? किजोकि पवित्रशास्त्र ज़ोते, “कि तैना दूईये अक जान भोल्हां।” 17ते ज़ै प्रभुएरी सेंगती मां रहते, तै तैस सेइं साथी अक आत्मा भोते। 18बदमाशी केरने करां दूर राथ, ज़ेत्रे होरे पाप मैन्हु केरते, तैना जानरे बेइरन, पन बदमाशी केरनेबालो अपने जानरे खलाफ पाप केरते। 19कुन तुस न ज़ानथ, कि तुश्शी जान पवित्र आत्मारू मन्दरे; ज़ै तुसन मां आहे, ते तुसन परमेशरेरी तरफां मैल्होरोए? ते तुस अपने नईं पन तुस परमेशरेरे आथ; 20किजोकि प्रभुए अपनि जानरी कीमत देइतां तुस घिनोरेथ, एल्हेरेलेइ अपने जानरे ज़िरिये सेइं परमेशरेरी आदर केरा।

Currently Selected:

1 कुरिन्थियों 6: BHDNT

Highlight

Copy

Compare