1 कुरिन्थियों 5

1इड़ी तगर शुन्ने मां एवरूए, कि तुसन मां बदमाशी भोचे, मतलब एरी बदमाशी ज़ेरि गैर विश्वासी लोकन मां भी न भोए, कि अक मैन्हु अपने बेबानी-अम्मा रखते। 2तुसेईं त दुख कियोरो लोड़तो थियो ते उदास भोरू लोड़तू थियूं, ते ज़ैनी मैन्हे एरू कियूं तै कढोरो लोड़तो थियो, पन इसेरे बदले तुस घमण्ड केरतथ। 3चाए अवं तुसन सेइं साथी नईं, पन मेरे विचार तुसन सेइं साथी आन, चाए अवं तैड़ी नईं, फिरी भी मने मां इन आहे, कि एरू कम केरनेबालेरे बारे मां फैसलो केरने लगोरोईं। 4इन तैन आहे ज़ैन केरनेरी ज़रूरते। हकीकति मां इश्शे प्रभु यीशु मसीहेरो अधिकार तुसन कांए, इन पिशैनतां विश्वासी केरे रूपां मां अकोट्ठे भोथ। इन एरू आहे कि अवं भी अपने मने मां तैड़ी आईं। ते फिरी प्रभु यीशु मसीहेरे ज़िरिये। 5तैस मैन्हु ज़ैने पापी बर्ताव कियोरो, तैस अपने टोली मरां कढा ते तैस मैन्हु शैतानेरे अधिकारे मां वापस देथ, इस उमीदी सेइं कि तै अपने पापन करां मन फिरालो। किजोकि अगर तै पापन करां मन फिरालो त तैस प्रभु यीशु मसीहेरे न्यायेरे दिहाड़े मुक्ति मैल्हेली।

6घमण्ड केरनू बंद केरा, कि तुस न ज़ानथ, कि थोड़ू ज़ेरू खमीर पूरे सन्नोरे अट्टे खमीर केरते। 7परानू खमीर केढतां, अपनो आप साफ केरा, कि नंव्वू सन्नोरू अट्टू बना; ताके तुस अखमीरे राथ, किजोकि इश्शो भी फ़सह ज़ै मसीहे, तै बलिदान भोवरोए। 8ते एज्जा अस तिहारे मां आनन्द मनाम, न पुराने खमीरे सेइं न बुरैई, ते दुष्टेरे खमीरे सेइं, पन सिधीयैई, ते सच़्च़ेरे बगैर खमीरेरे रोट्टी सेइं।

9मीं अपने पेइले चिट्ठी मां लिखेरूए, कि बदमाशी केरनेबालां केरि संगती न केरथ। 10इन नईं, कि तुस बिलकुल इस दुनियारे बदमाशी केरनेबाले, या लालच़ केरनेबाले, या धोखो केरनेबालन, या मूरती पूज़ने बालां केरि संगती न केरा; किजोकि एन्च़रे तुसेईं इस दुनियाई मरां निसनू पेथू। 11मेरू ज़ोनू त इन्ने, कि अगर कोई अपने आपे विश्वासी ज़ोते, ते बदमाशी केरनेबालो, या लालच़ी, या मूरती पुज़ने बालो, या गैई देनेबालो, या पीने बालो, या धोखो केरनेबालो भोए, त तैस सेइं साथ न रेखतथ, बल्के एरे मैन्हु सेइं साथी रोट्टी भी न खेइयथ। 12ई मेरी ज़िमेवारी नईं, कि ज़ैना लोक विश्वासी नईं तैन केरि निन्दा केरि। पन हकीकति मां तुसेईं तैन लोकन सज़ाह दित्तोरी लोड़े ज़ैना तुश्शे कलीसियारे हिस्सो आन। 13पन ज़ैना विश्वासी नईं तैन केरो न्याय परमेशर केरते पन पवित्रशास्त्र ज़ोते,

बुरू कम केरनेबाले मैन्हु अपने टोली मां एजने न देथ।

Currently Selected:

1 कुरिन्थियों 5: BHDNT

Highlight

Copy

Compare