1 कुरिन्थियों 4

मसीहेरे प्रेरित

1मैन्हु असन मसीहेरे सेवक, ते परमेशरेरे भेदां केरे भण्डारी समझ़न। 2ज़ेन्च़रे कि ज़ैस मैन्हु तैसेरे मालिके ज़ैन कम दित्तोरू भोए, तैने तैन कम केरने मां वफादार लोड़े राहोरू, ज़ेसेरो तैस हुक्म दित्तो जेवरोए। 3पन मेरे खियाले मां ई गल निकड़ीए, कि तुस या मैन्हन मरां कोई न्यायी मीं परखे, बल्के अवं अपने आपे न पेरखी। 4किजोकि मेरो ज़मीर मीं कोन्ची गल्‍ली मां दोषी न ठहराए, पन इस सेइं अवं बेइलज़ाम न ठहरी, किजोकि मेरो परखने बालो प्रभुए। 5ते ज़ांतगर प्रभु वापस न एज्जे, पेइलो केन्चेरो न्याय न केरा, तैए लोकां केरे सारे खियाल साफ तरीके ज़ोलो, ज़ैन केरे बारे मां होरो कोई तैन न ज़ाने, ते तैन केरे दिलां केरे इरादे बांदे केरेलो। तैखन परमेशरेरी तरफां हर केन्चेरी तारीफ़ भोनीए। 6हे ढ्लाव ते बेइनव, मीं इन गल्‍लन मां तुश्शे लेई अपनि ते अपुल्‍लोसेरी बेंस, मिसालारे रीति पुड़ कियोरीए, एल्हेरेलेइ कि तुस इश्शे ज़िरिये सेइं शिखा, कि पवित्रशास्त्रे मां लिखोरे करां अग्रोवं न बधा, ते एक्‍केरे पासे ते होरेरे खलाफ घमण्ड न केरथ। 7केन्चे तू होरन करां रोड़ो नईं बनेवरो। सब किछ तीं परमेशरेरे तरफां दित्तू जेवरूए, अगर तीं सब किछ परमेशरे दित्तोरू त तुसन घमण्ड केरनेरो अधिकार नईं।

8तुस त रज़ोरेथ; तुस दौलतमन्द भोइजेइ, तुसेईं इश्शे बगैर राज़ कियूं; पन रोड़ू भोथू कि तुस राज़ केरेथे ते अस भी तुसन सेइं साथी भोथे! 9मेरी समझ़ी मां परमेशरे अस प्रेरित लोक सेब्भना पत्ती तैन लोकां केरे ज़ेरे ठहरावरेम, ज़ैन केरे मौतरो हुक्म भोइ जेवरोए; किजोकि अस दुनियारे ते स्वर्गदूतां, ते मैन्हु केरे लेई अक तमाशो बनोरेम! 10लोक असन बेवकूफ समझ़तन किजोकि अस मसीहेरे बारे मां प्रचार केरतम, पन तुस गेलती सेइं सोचतथ कि तुस अक्लमन्द मसीही आथ! बड़े लोक समझ़तन कि असन कां कोई अधिकार नईं। पन तुस घमण्डे सेइं ज़ोतथ कि तुसन कां परमेशरेरे तरफां शक्तिए, तैना इश्शी आदर न केरन पन तुश्शी आदर केरतन। 11अस इस वक्ते तगर नियन्ने-ट्लिशोरे, ते छ़िनदोरे लिगड़न मां आम, ते धक्‍के खातम, ते असन कां घर नईं; 12ते अपने हथेइं सेइं कम केरतां मेहनत केरतम। लोक बुरू ज़ोतन, अस तैन बरकत देतम; तैना सतातन, अस झ़ैल्‍लतम। 13तैना बदनाम केरतन, अस नेरमी सेइं गल केरतम, इड़ी तगर कि, अज़ तगर लोक हेजू भी इश्शी इज़्ज़त न केरन, तैना ज़ोतन कि इश्शी कोई कीमत नईं।

14मेरी इना गल्‍लां लिखनेरो मकसद ई नईं कि तुसन छिथेईं, पन अवं तुसन सुधारने चाताईं, किजोकि तुस मेरे बच्‍चां केरे ज़ेरे आथ ज़ैन सेइं अवं प्यार केरताईं। 15किजोकि अगर मसीह मां तुश्शे शिखालनेबाले दश हज़ार भी भोथे, फिरी भी तुश्शे बड़े बाजी नईं, एल्हेरेलेइ कि मसीह यीशु मां खुशखेबरी सेइं अवं तुश्शो बाजी केरो ज़ेरो भोव। 16एल्हेरेलेइ अवं तुसन कां मिन्नत केरताईं, कि मेरी ज़ेरि चाल च़ला। 17एल्हेरेलेइ मीं तीमुथियुसे ज़ैन प्रभु मां मेरू ट्लारू, ते वफादार मट्ठूए, तुसन कां भेज़ोरूए, ते तै तुसन यीशु मसीह मां मेरो चाल चलन याद करालो, ज़ेन्च़रे कि अवं हर एक्‍की ठैरी हर कलीसियाई मां शिक्षा देताईं। 18तुसन मरां बड़े लोक सोचतन कि अवं तुसन कां नईं एजनो, एल्हेरेलेइ तैना घमण्ड केरतन। 19पन प्रभु चाए त मीं तुसन कां जल्दी एजनूए, ते न सिर्फ तैन घमण्ड केरनेबालां केरि गल्‍लां नईं, पन तैन केरि शेक्ति भी ज़ैनेलो। 20किजोकि परमेशरेरू राज़ गल्‍लां केरू नईं, पन शेक्ति मांए। 21अगर हेजू भी तुसेईं बुरी बत नईं शारोरी, अवं तुस सेखती सेइं झ़िड़क देइलो। पन अगर तुसेईं बुरी बत शारी त अवं तुसन सेइं नेरमी त कने प्यारे सेइं बर्ताव केरेलो।

Currently Selected:

1 कुरिन्थियों 4: BHDNT

Highlight

Copy

Compare