अय्यूब 7
7
अय्यूब का दुख अर बेचैन्नी
1“के माणस नै धरती पै कठिन सेवा करणी न्ही पड़दी?
के उसके दिन मजदूर के जिसे न्ही होन्दे?
2जिस तरियां कोए दास छाया की लालसा करै, या
मजदूर अपणी मजदूरी की आस राक्खै;
3उसाए मै अनर्थ के महीन्यां का माल्लिक बणाया गया सूं,
अर मेरै खात्तर क्ळेश तै भरी रात बणाई गई सै।
4जिब मै लेट जाऊँ सूं, फेर कहूँ सूं,
‘मै कद उठूँगा?’ अर रात कद बीत्तैगी?
अर सुबेर होण तक छटपटान्दे-छटपटान्दे थक जाऊँ सूं।
5मेरी देह कीड़े अर माट्टी के डळयाँ तै ढकी होई सै;
मेरा चमड़ा सिमट जावै, अर फेर गळ ज्या सै।
6मेरे दिन जुलाहे की ढरकी तै घणे फुर्ती तै चाल्लण आळे सै
अर निराशा म्ह बीत्ते ज्यां सै।”
7“याद कर के मेरी जिन्दगी हवा ए सै;
अर मै अपणी आँखां तै कल्याण फेर न्ही देक्खुँगा।
8जो मन्नै इब देक्खै सै उस ताहीं मै फेर दिखाई न्ही दियुँगा;
तेरी आँख मेरी ओड़ होंगी पर मै न्ही मिलूँगा।
9जिस तरियां बादळ छट कै गायब हो ज्या सै,
उस्से तरियां अधोलोक म्ह उतरण आळा फेर ओड़ै तै न्ही बोहड़ सकदा;
10वो अपणे घर नै फेर बोहड़कै न्ही आवैगा,
अर ना अपणी जगहां म्ह फेर मिलैगा।”
11“इस करकै मै अपणा मुँह बन्द न्ही राखूँगा;
अपणे मन का दुख खोलकै कहूँगा;
अर अपणे जी की कड़वाहट के कारण कुड़कुड़ादां रहूँगा।
12के मै समुन्दर सूं, या समुंदरी अजगर सूं,
के तू मेरे पै पैहरा बिठावै सै?
13जद-जद मै सोचुँ सूं के मन्नै खाट पै शान्ति मिलैगी,
अर बिछोणे पै मेरा दुख कुछ हळका होवैगा;
14तब-तब तू मन्नै सुपन्यां तै घबरा दे सै,
अर दर्शनां तै डरावै सै;
15उरै तक कै मेरा जी फाँसी नै,
अर जिन्दगी तै मौत नै घणा चाहवै सै।
16मन्नै अपणी जिन्दगी तै नफरत होवै सै;
मै सदा जिन्दा रहणा न्ही चाहन्दा।
मेरी जिन्दगी साँस की तरियां सै, इस करकै मन्नै छोड़ दे।
17माणस के सै, के तू उस ताहीं अहमियत दे,
अर अपणा मन उसपै लगावै,
18अर रोज सुबेरै नै उसकी सुधि ले,
अर हर पल उस ताहीं जाँचदा रहवै?
19तू कद तक मेरी ओड़ आँख लगाऐ रहवैगा,
अर इतणी देर तक भी मन्नै ना छोड़ैगा के मै अपणा थूक निगळ ल्यूँ?
20हे माणसां के देखण आळे, मन्नै पाप तो करया होवैगा, तो मन्नै तेरा के बिगाड़या?
तन्नै क्यूँ मेरे ताहीं अपणा निशान्ना बणा लिया सै,
उरै तक के मै अपणे उप्पर आप्पे बोझ होग्या सूं?
21अर तू क्यूँ मेरा कसूर माफ न्ही करदा?
अर मेरा अधर्म क्यूँ दूर न्ही करदा?
इब तो मै माट्टी म्ह सो ज्याऊँगा,
अर तू मन्नै कोशिश तै टोहवैगा पर मेरा बेरा भी न्ही लागैगा।”
Currently Selected:
अय्यूब 7: BGC
Highlight
Copy
Compare
Share
Want to have your highlights saved across all your devices? Sign up or sign in
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
