अय्यूब 6
6
अय्यूब का जवाब
1फेर अय्यूब नै उत्तर देकै कह्या,
2“भला होन्दा के मेरा दुख तोल्या जान्दा,
अर मेरी सारी मुसीबत्त तराजू म्ह धरी जान्दी!
3क्यूँके वा समुन्दर की रेत तै भी भारी ठहरदी;
इस्से कारण मेरी बात मूर्खतापूर्ण सी लाग्गै सै।
4क्यूँके सर्वशक्तिमान के तीर मेरे भित्तर चुभे सै;
अर उनका जहर मेरी आत्मा म्ह फैल ग्या सै;
परमेसवर की भयंकर बात मेरै खिलाफ एक साथ खड़ी सै।
5जिब जंगळी गधे नै घास मिलै सै, फेर के वो रेंगै सै?
अर बळध चारा पाकै के डकारै सै?
6जो फीका सै के वो बिना नमक खाया जावै सै?
के अण्डे की सफेदी म्ह भी कुछ स्वाद होवै सै?
7जिन चिज्जां नै मै छूणा भी न्ही चाहन्दा वोए
मान्नो मेरै खात्तर घिनोणा खाणा बणगी सै।”
8“भला होन्दा के मन्नै मुँह मांग्या वरदान मिलदा
अर जिस बात की मै आस करुँ सूं वो परमेसवर मन्नै दे देन्दा!
9के परमेसवर खुश होकै मन्नै कुचल गेरदा,
अर हाथ बढ़ाकै मन्नै काट गेरदा!
10योए मेरी शान्ति का कारण;
बल्के भारी दर्द म्ह भी मै इस करकै उछळ पड़दा;
क्यूँके मन्नै उस पवित्र परमेसवर के वचनां का कदे इन्कार न्ही करया।
11मेरे म्ह ताकत ए के सै के मै आस राक्खूँ? अर
मेरा अन्त के होवैगा, के मै धीरज धरुँ?
12के मेरी मजबुत्ती पत्थरां की तरियां सै?
के मेरी देह पीत्तळ की सै?
13के मै निराधार न्ही सूं?
के काम करण की शक्ति मेरे तै दूर न्ही होगी?”
14“जो पड़ोसी पै दया न्ही करदा वो
सर्वशक्तिमान का भय मानणा छोड़ दे सै।
15मेरे साथी नाळे की तरियां बिश्वासघाती होगे सै,
बल्के उन नाळयां की तरियां जिनकी धार सूख ज्या सै;
16अर वो बर्फ कै कारण काळे से हो ज्यां सै,
अर उन म्ह बर्फ छिपी रहवै सै।
17पर जिब गर्मी होण लाग्गै फेर उनकी धारा गायब हो ज्यां सै,
अर जिब करड़ी धूप पड़े सै फेर वो अपणी
जगहां तै उड़ ज्यां सै
18वो घूमदे-घूमदे सूख ज्यां,
अर सुनसान जगहां म्ह बहकै नाश हो ज्या सै।
19तेमा#6:19 तेमा नगर का नाम सै के बंजारे देखदे रहे अर शेबा के
कबिल्लै आळयां नै उनका रास्ता देख्या।
20वो शर्मिन्दा होए क्यूँके उननै भरोस्सा राख्या था;
अर ओड़ै पोहचकै उनके मुँह सूखगे।
21उस्से तरियां इब थम भी कुछ न्ही रहे;
मेरी मुसीबत्त देखकै थम डरगे सो।
22के मन्नै थारे तै कह्या था, ‘मन्नै कुछ द्यो?’
या ‘अपणी जायदाद म्ह तै मेरै खात्तर कुछ द्यो?’
23या ‘मन्नै सताण आळयां के हाथ तै छुटा ल्यो?’
या ‘उपद्रव करण आळयां के वश तै छुटा ल्यो?’”
24“मन्नै शिक्षा द्यो अर मै चुप रहूँगा;
अर मन्नै समझाओ, के मन्नै किस बात म्ह चूक करी सै।
25सच्चाई के वचनां म्ह कितना प्रभाव होवै सै,
पर थारे विवाद तै के फायदा होवै सै?
26के थम बात पकड़ण की सोचो सो?
निराश माणस की बात तो हवा की तरियां सै।
27थम अनाथां पै चिट्ठी गेरदे,
अर अपणे मित्तर नै बेचकै फायदा ठाण आळे सो।”
28“इस कारण इब कृपा करकै मन्नै देक्खो;
पक्का मै थारे स्याम्ही कदे झूठ न्ही बोलूँगा।
29फेर कुछ अन्याय ना होण पावै; फेर इस मुकद्दमें
म्ह मेरा धर्म न्यू का न्यू बण्या सै, मै सच्चाई पै सूं।
30के मेरे वचनां म्ह कुछ कपट सै?
के मै दुष्टता न्ही पिछाण सकदा?”
Currently Selected:
अय्यूब 6: BGC
Highlight
Copy
Compare
Share
Want to have your highlights saved across all your devices? Sign up or sign in
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
