न्यायियों 6
6
गिदोन का चरित्र
1इस्राएलियाँ नै यहोवा की नजर म्ह फेर तै बुरा करया, ज्यांतै यहोवा नै उन ताहीं मिद्यानियाँ का गुलाम बणाकै सात साल तक राख्या। 2अर मिद्यानी इस्राएलियाँ पै हावी होगे। मिद्यानियाँ के डर के मारे इस्राएलियाँ नै पहाड़ां के गहरे खड्या, अर गुफायां, अर किल्यां ताहीं अपणे निवास बणा लिया। 3अर जिब-जिब इस्राएली बीज बोन्दे तब-तब मिद्यानी अर अमालेकी अर पूर्वी माणस उनके बिरुध्द चढ़ाई करकै 4गाज़ा ताहीं छावणी डाल-डालकै धरती की उपज नाश कर दे रहवैं थे, अर इस्राएलियाँ खात्तर ना तो किमे भोजनवस्तु, अर ना भेड़-बकरी, अर ना गां-बळध, अर ना गधा छोड़ै थे। 5क्यूँके वे अपणे पशुआं अर डेरां नै साथ लिए होए चढ़ाई करैं थे, अर टिड्डियाँ के दल की तरियां घणे आवैं थे; अर उनके ऊँट भी अनगिणत होवै थे; अर वे देश नै उजाड़ण खात्तर उस म्ह आया करैं थे। 6अर मिद्यानियाँ के कारण इस्राएली बड्डी दुर्दशा म्ह पड़गे; फेर इस्राएलियाँ नै यहोवा की दुहाई दी।
7जिब इस्राएलियाँ नै मिद्यानियाँ के कारण यहोवा की दुहाई दी, 8फेर यहोवा नै इस्राएलियाँ कै धोरै एक नबी ताहीं भेज्या, जिसनै उनतै कह्या, “इस्राएल का परमेसवर यहोवा न्यू कहवै सै: मै थमनै मिस्र म्ह तै ले आया, अर गुलामी के घर तै लिकाड़ ले आया; 9अर मन्नै थम मिस्रियाँ के हाथ तै, बलके जितने थारे पै अंधेर करै थे उन सारया कै हाथ तै छुड़ाया, अर उन ताहीं थारे स्याम्ही तै मजबूरण लिकाड़कै उनका देश थारे ताहीं दे दिया; 10अर मन्नै थारै तै कह्या, ‘मै थारा परमेसवर यहोवा सूं; एमोरी माणस जिनके देश म्ह थम रह्यो सो उनके देवत्यां का भय ना मानियो।’ पर थमनै मेरा कहणा न्ही मान्या।”
11फेर यहोवा का दूत आकै उस बांज दरखत कै तळै बैठ ग्या, जो ओप्रा म्ह अबीएजेरी योआश का था, अर योआश का बेट्टा गिदोन एक दाखरस के कुण्ड म्ह गेहूँ ज्यांतै झाड़ण लाग रह्या था के उस ताहीं मिद्यानियाँ तै छुपाकै राक्खै। 12उस ताहीं यहोवा के दूत नै दर्शन देकै कह्या, “हे शूरवीर सूरमा, यहोवा तेरे गैल सै।” 13गिदोन नै उसतै कह्या, “हे मेरे प्रभु, मेरी बिनती सुण, जै यहोवा म्हारे गैल होन्दा, तो म्हारे पै यो सारी विपत्ति क्यूँ पड़दी? अर जितने आश्चर्यकर्म का बखान म्हारे बुजुर्ग न्यू कहकै करै थे, ‘के यहोवा हमनै मिस्र तै छुड़ा न्ही ल्याया,’ वे कित्त रहे? इब तो यहोवा नै म्हारे ताहीं त्याग दिया, अर मिद्यानियाँ कै हाथ कर दिया सै।” 14फेर यहोवा नै उसपै निगांह करकै कह्या, “अपणी इसे शक्ति के जोर पै जा अर तू इस्राएलियाँ नै मिद्यानियाँ के हाथ तै छुड़ावैगा; के मन्नै तेरे ताहीं न्ही भेज्या?” 15उसनै कह्या, “हे मेरे प्रभु, बिनती सुण, मै इस्राएल नै किस तरियां छुड़ाऊँ? देख, मेरा कुल मनश्शे म्ह सबतै कंगाल सै, फेर मै अपणे पिता के कुण्बे म्ह सबतै छोट्टा सूं।” 16यहोवा नै उसतै कह्या, “पक्का मै तेरे गैल रहूँगा; सो तू मिद्यानियाँ नै इसा मार लेवैगा जिसा एक माणस नै।” 17गिदोन नै उसतै कह्या, “जै तेरा अनुग्रह मेरे पै हो, तो मन्नै इसका कोए चिन्ह दिख्या के तू ए मेरे तै बात करण लाग रह्या सै। 18जिब ताहीं मै तेरै धोरै फेर आकै अपणी भेंट लिकाड़कै तेरे स्याम्ही ना राक्खूँ, तब ताहीं तू उरै तै ना जा।” परमेसवर नै कह्या, “मै तेरे बोहड़ण ताहीं ठहरया रहूँगा।”
19तब गिदोन नै जाकै बकरी का एक बच्चा अर एक एपा मैदे की अखमीरी रोट्टी त्यार करी; फेर माँस नै टोकरी म्ह, अर रसा नै तासळे म्ह धरकै बांज दरखत कै तळै उसके धोरै ले जाकै दिया। 20परमेसवर के दूत नै उसतै कह्या, “माँस अर अखमीरी रोट्टियाँ नै लेकै इस चट्टान पै धरदे, अर रसा नै उण्डेल दे।” उसनै इसाए करया। 21फेर यहोवा के दूत नै अपणे हाथ की लाठ्ठी ताहीं बढ़ाकै माँस अर अखमीरी रोट्टियाँ ताहीं छुया; अर चट्टान तै आग लिकड़ी जिसतै माँस अर अखमीरी रोट्टी भस्म होगी; फेर यहोवा का दूत उसकी नजर तै ओझल होग्या। 22जिब गिदोन नै जाण लिया के वो यहोवा का दूत था, फेर गिदोन कहण लाग्या, “हाय, प्रभु यहोवा! मन्नै तो यहोवा के दूत ताहीं अपणी आँखां तै देख्या सै।” 23यहोवा नै उसतै कह्या, “तन्नै शान्ति मिलै; मत डर, तू न्ही मरैगा।” 24फेर गिदोन नै ओड़ै यहोवा की एक वेदी बणाकै उसका नाम, यहोवा शालोम धरया। वो आज कै दिन ताहीं अबीएजेरियाँ के ओप्रा म्ह बणी सै।
25फेर उसे रात म्ह यहोवा नै गिदोन तै कह्या, “अपणे पिता का जवान बळध, यानिके दूसरा सात साल का बळध ले, अर बाल की जो वेदी तेरे पिता की सै उस ताहीं गिरा दे, अर जो अशेरा देवी उसकै धोरै सै उसनै काट दे; 26अर उस मजबूत जगहां की चोट्टी पै ठहराई होई रीति तै अपणे परमेसवर यहोवा की एक वेदी बणा; फेर उस दुसरे बळध नै ले, अर उस अशेरा की लाकड़ी जो तू काट डालैगा जळाकै होमबलि चढ़ा।” 27फेर गिदोन नै अपणे गैल दस दास्सां ताहीं लेकै यहोवा के वचन कै मुताबिक करया; पर अपणे पिता के कुण्बे अर नगर के माणसां के डर के मारे वो काम दिन म्ह ना कर सक्या, ज्यांतै रात म्ह करया।
28नगर के माणस सबेरै उठकै के देक्खै सैं, के बाल की वेदी गिरी पड़ी सै, अर उसके धोरै की अशेरा कटी पड़ी सै, अर दूसरा बळध बणाई होई वेदी पै चढ़ाया होया सै। 29फेर वे आप्पस म्ह कहण लाग्गे, “यो काम किसनै करया?” अर पूछताछ अर ढूँढ़-ढाँढ़ करकै वे कहण लाग्गे, “योआश के बेट्टे गिदोन का काम सै।” 30फेर नगर के माणसां नै योआश तै कह्या, “अपणे बेट्टे नै बाहर ले आ, के वो मार गेरया जावै, क्यूँके उसनै बाल की वेदी ताहीं गेर दिया सै, अर उसके धोरै की अशेरा ताहीं भी काट गेरया सै।” 31योआश नै उन सारया तै जो उसके स्याम्ही खड़े होए थे कह्या, “के थम बाल कै खात्तर वाद-विवाद करोगे? के थम उसनै बचाओगे? जो कोए उसके खात्तर वाद-विवाद करै वो मार गेरया जावैगा। सबेरै ताहीं ठैहरे रहो; जिब ताहीं जै वो परमेसवर हो, तो जिसनै उसकी वेदी गिराई सै उसतै वो आप ए अपणा वाद-विवाद करै।” 32ज्यांतै उस दिन गिदोन का नाम यो कहकै यरूब्बाल धरया गया, के इसनै जो बाल की वेदी गिराई सै तो इसपै बाल आप वाद-विवाद कर ले।
33इसकै बाद सारे मिद्यानी अर अमालेकी अर पूर्वी कठ्ठे होए, अर पार आकै यिज्रेल की तराई म्ह डेरे डाले। 34फेर यहोवा का आत्मा गिदोन म्ह समाया; अर उसनै नरसिंगा फूँक्या, फेर अबीएजेर उसकी सुणण कै खात्तर कठ्ठे होए। 35फेर उसनै सारे मनश्शे कै धोरै अपणे दूत भेज्जे; अर वे भी उसके धोरै कठ्ठे होए। अर उसनै आशेर, जबूलून, अर नप्ताली कै धोरै भी दूत भेज्जे; फेर वे भी उसतै मिलण ताहीं चले आए।
36फेर गिदोन नै परमेसवर तै कह्या, “जै तू अपणे वचन कै मुताबिक इस्राएल ताहीं मेरे जरिये छुड़ावैगा, 37तो सुण, मै एक भेड़ की ऊन खलिहाण म्ह धरुँगा, अर जै ओस सिर्फ उस ऊन पै पड़ै, अर उसनै छोड़ सारी धरती सूक्खी रह जावै, तो मै जाण ल्यूँगा के तू अपणे वचन कै मुताबिक इस्राएल नै मेरे जरिये छुड़ावैगा।” 38अर इसाए होया। ज्यांतै जिब उसनै सबेरै उठकै उस ऊन ताहीं दबाकै उस म्ह तै ओस निचोड़ी, तो एक कटोरा भरग्या। 39फेर गिदोन नै परमेसवर तै कह्या, “जै मै एक बार फेर कहूँ, तो तेरा छो मेरे पै ना भड़के; मै इस ऊन तै एक बार और भी तेरी परीक्षा करुँ, यानिके सिर्फ ऊन ए सूक्खी रहवै, अर सारी धरती पै ओस पड़ै” 40उस रात नै परमेसवर नै इसाए करया; यानिके सिर्फ ऊन ए सूक्खी रहगी, अर सारी धरती पै ओस पड़ी।
Currently Selected:
न्यायियों 6: BGC
Highlight
Copy
Compare
Share
Want to have your highlights saved across all your devices? Sign up or sign in
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
