2 इतिहास 36

यहोआहाज का राज्य

1योशिय्याह की मौत के बाद, यहूदा के माणसां नै योशिय्याह के बेट्टे यहोआहाज ताहीं लेकै उसके पिता की जगहां पै यरुशलेम म्ह राजा बणाया। 2जिब यहोआहाज राज करण लाग्या, जिब वो तेईस साल का था, अर तीन महिन्‍ने ताहीं यरुशलेम म्ह राज करदा रह्या। 3फेर मिस्र के राजा नै उस ताहीं यरुशलेम म्ह राजगद्दी तै तार दिया, अर देश पै सौ किक्‍कार चाँदी अर किक्‍कार भर सोन्‍ना#36:3 सोन्‍ना 3.4 टन चाँदी अर 34 किलो सोन्‍ना जुर्माना म्ह दण्ड लगाया। 4फेर मिस्र के राजा नै उसके भाई एलयाकीम ताहीं यहूदा अर यरुशलेम का राजा बणाया अर उसका नाम बदलकै यहोयाकीम धरया; पर नको उसके भाई यहोआहाज नै मिस्र म्ह ले गया।

यहोयाकीम का राज्य

5जिब यहोयाकीम राज करण लाग्या, जिब पच्‍चीस साल का था, अर ग्यारह साल ताहीं यरुशलेम म्ह राज करदा रह्या। उसनै वो काम करया, जो उसके परमेसवर यहोवा की नजर म्ह बुरा सै। 6उसपै बाबेल के राजा नबूकदनेस्सर नै चढ़ाई करी, अर बाबेल ले जाण खात्तर उस ताहीं पीतळ की बेड़ी पिराह दी। 7फेर नबूकदनेस्सर नै यहोवा के भवन के कुछ बरतन बाबेल ले जाकै, अपणे मन्दर म्ह जो बाबेल म्ह था, धर दिए। 8यहोयाकीम के और काम अर उसनै जो-जो घिनोणे काम#36:8 घिनोणे काम इसा प्रतीत होवै सै की यहोयाकीम नै अपणे पिता जरिये नाश की गई मूर्तिपूजा दोबारा शरुआत कर दी थी। करे, अर उस म्ह जो-जो बुराई पाई गई, वो इस्राएल अर यहूदा के राजयां के इतिहास की किताब म्ह लिक्खी सैं; अर उसका बेट्टा यहोयाकीन उसकी जगहां पै राज करण लाग्या।

यहोयाकीन का राज्य

9जिब यहोयाकीन राज करण लाग्या, जिब वो आठ साल का था, अर तीन महिन्‍ने अर दस दिन ताहीं यरुशलेम म्ह राज करदा रह्या। उसनै वो करया, जो परमेसवर यहोवा की नजर म्ह बुरा सै। 10नये साल के लागदे ए नबूकदनेस्सर नै माणसां ताहीं भेजकै, उस ताहीं अर यहोवा के भवन के मनभावणे बरतनां ताहीं बाबेल म्ह मँगवा लिया, अर उसके भाई सिदकिय्याह ताहीं यहूदा अर यरुशलेम पै राजा ठहराया।

सिदकिय्याह का राज्य

11जिब सिदकिय्याह राज करण लाग्या, जिब वो इक्‍कीस साल का था, अर यरुशलेम म्ह ग्यारह साल ताहीं राज्य करदा रह्या। 12उसनै वोए करया, जो उसके परमेसवर यहोवा की नजर म्ह बुरा सै। फेर भी यिर्मयाह नबी यहोवा की और तै बात कहवै था, तोभी वो उसकै स्याम्ही दीन ना होया। 13फेर नबूकदनेस्सर जिसनै उस ताहीं परमेसवर की कसम खुआई थी, उसतै उसनै बलवा करया, अर उसनै हठ करया अर अपणा मन कठोर करया, के वो इस्राएल के परमेसवर यहोवा की और ना मुड़ै।

यरुशलेम का पतन

14सारे प्रधान याजकां नै अर माणसां नै भी गैर जातियाँ के जिसे घिनोणे काम करकै घणा बड़ा बिश्वासघात करया, अर यहोवा के भवन नै जो उसनै यरुशलेम म्ह पवित्र करया था, अशुद्ध कर दिया#36:14 यहोवा के भवन नै जो उसनै यरुशलेम म्ह पवित्र करया था, अशुद्ध कर दिया सिदकिय्याह के राज्यकाल के अन्त समय म्ह मूर्तिपूजा सम्बन्धित विभिन्‍न धार्मिक कृत्य मन्दर के पवित्र परिसर म्ह दाखल हो चुके थे। ।

15उनकै पूर्वजां के परमेसवर यहोवा नै बड़ा यत्न करकै अपणे दूत्तां तै उनके धोरै कुह्वा भेज्या, क्यूँके वो अपणी प्रजा अर अपणे धाम पै तरस खावै था; 16पर वे परमेसवर के दूत्तां नै मजाक म्ह उड़ान्दे, उसके वचनां नै तुच्छ जाणदे, अर उसके नबियाँ की हाँस्सी करै थे। आखर यहोवा अपणी प्रजा पै इसा झुँझळा उठ्या, के बचण का कोए उपाय ना रह्या#36:16 प्रेरितों 13:41।

17फेर उसनै उनपै कसदियाँ के राजा तै चढ़ाई करवाई, अर इसनै उनके जवान्‍ना नै उनके पवित्र भवन ए म्ह तलवार तै मार दिया; अर के जवान, के कुँवारी, के बूढ़े, के पक्‍के बाल आळे, किसे पै भी दया ना करी; यहोवा नै सारया ताहीं उसके हाथ म्ह कर दिया। 18के छोट्टे, के बड़े, परमेसवर के भवन के सारे बरतन अर यहोवा के भवन, अर राजा, अर उसके हाकिमां के खजाने, इन सारया ताहीं नबूकदनेस्सर बाबेल म्ह लेग्या। 19नबूकदनेस्सर की सेना नै परमेसवर का भवन फूँक दिया, अर यरुशलेम की शहरपनाह ताहीं तोड़ दिया, अर आग लगाकै उसके सारे भवनां ताहीं जळाया, अर उस म्ह का सारा बेसकिमती सामान नाश कर दिया। 20जो तलवार तै बचगे, उन ताहीं वो बाबेल म्ह लेग्या, अर फारस के राज्य के हावी होण ताहीं वे उसके अर उसके बेट्यां-पोत्यां कै अधीन रहे। 21यो सारा ज्यांतै होया के यहोवा का जो वचन यिर्मयाह के मुँह तै लिकड़या#36:21 यिर्मयाह के मुँह तै लिकड़या यिर्मयाह 25:11; 29:10 था, वो पूरा हो, के देश अपणे आराम की जगहां म्ह सुख भोगदा रहवै। ज्यांतै जिब ताहीं वो सुन्‍ना पड़या रह्या जिब तक यानिके सत्तर साल के पूरे होण ताहीं उसनै आराम मिल्या।

राजा कुस्रू के शासनकाल म्ह यहूदियाँ की वापसी

22फारस के राजा कुस्रू के राज के पैहले साल म्ह यहोवा नै उसके मन ताहीं उभारया के जो वचन यिर्मयाह नबी के मुँह तै लिकड़या था, वो पूरा हो।#36:22 वो पूरा हो। यिर्मयाह 29:10 ज्यांतै उसनै अपणे सारे राज्य म्ह यो प्रचार करवाया, अर इस ऊमीद तै चिट्ठी लिखवाई: 23“फारस का राजा कुस्रू कहवै सै, ‘सुर्ग के परमेसवर यहोवा नै धरती भर का राज्य मेरे ताहीं दिया सै, अर उसे नै मेरे तै हुकम दिया सै के यरुशलेम जो यहूदा म्ह सै उस म्ह मेरा एक भवन बणवा; ज्यांतै हे उसकी प्रजा के सारे माणसों, थारे म्ह तै जो कोए चावै, उसका परमेसवर यहोवा उसके गैल रहवै, वो ओड़ै चल्या जावै।’”

Currently Selected:

2 इतिहास 36: BGC

Highlight

Copy

Compare