एज्रा 1

यहूदी कैदियाँ का यरुशलेम म्ह बोहड़ जाणा

1फारस के राजा कुस्रू के राज के पैहले साल म्ह यहोवा नै फारस के राजा कुस्रू का मन उभारया के यहोवा का जो वचन यिर्मयाह नबी कै मुँह तै लिकड़या था वो पूरा हो ज्या, ज्यांतै उसनै अपणे सारे राज्य म्ह यो प्रचार करवाया अर लिखवा भी दिया:

2“फारस का राजा कुस्रू न्यू कहवै सै: सुर्ग के परमेसवर यहोवा नै धरती का राज मेरे तै दिया सै, अर उसनै मेरे ताहीं हुकम दिया, के यहूदा के यरुशलेम म्ह मेरा एक भवन बणवा। 3उसकी सारी प्रजा के माणसां म्ह तै तेरै बिचाळै जो कोए हो, उसका परमेसवर उसकै गैल रहवै, अर वो यहूदा के यरुशलेम नै जाकै इस्राएल के परमेसवर यहोवा का भवन बणावै जो यरुशलेम म्ह सै वोए परमेसवर सै। 4अर जो कोए किसे जगहां म्ह रहग्या हो, जित्त वो रहन्दा हो, उस जगहां के माणस चाँदी, सोन्‍ना, धन अर पशु देकै उसकी मदद करै अर इसतै घणा यरुशलेम म्ह परमेसवर के भवन कै खात्तर अपणी-अपणी इच्छा तै भी भेंट चढ़ावै।”

5फेर यहूदा अर बिन्‍यामीन के जितने पितरां के घरान्यां के खास माणसां अर याजकां अर लेवियाँ का मन परमेसवर की आत्मा नै उभारया था के जाकै यरुशलेम म्ह यहोवा के भवन नै बणावैं, वे सारे उठ खड़े होए; 6अर यहूदियाँ के उन सारे पड़ोसियाँ नै जो आस्सै-पास्सै रहवैं थे चाँदी के बरतन, सोन्‍ना, धन, पशु अर अनमोल चीज देकै, उनकी मदद करी; यो उस सबतै घणा था, जो माणसां नै अपणी-अपणी इच्छा तै दिया। 7फेर यहोवा कै भवन के जो बरतन राजा नबूकदनेस्सर नै यरुशलेम तै लिकाड़ अपणे देवता के भवन म्ह धरे थे#1:7 2 राजा 25:8-17, 8उन ताहीं कुस्रू राजा नै, मिथ्रदात खजांची तै लिकड़वा कै, यहूदियाँ के शेशबस्सर नाम के प्रधान तै गिणा कै सौंप दिया। 9उनकी गिणती या थी, यानिके सोन्‍ने के तीस अर चाँदी के एक हजार परात अर उणतीस छुरी, 10सोन्‍ने के तीस कटोरे अर बीच के आकार के चाँदी के च्यार सौ दस कटोरे अर घणीए तरियां के बरतन एक हजार। 11सोन्‍ने-चाँदी के बरतन सब मिलाकै पाँच हजार च्यार सौ थे। इन सारया नै शेशबस्सर उस बखत ले आया जिब कैदी बाबेल तै यरुशलेम म्ह आए।

Currently Selected:

एज्रा 1: BGC

Highlight

Copy

Compare