Ruuti 4
4
Boꞌaazi Ruutin Shaago
1Boꞌaazi katemee uxeree kellooch beeti, asheenaꞌo kiceebeeti iitee xaaꞌooch hammii kotehe. Biyoo Ruutich “Tayee beshoon katini xiboo beetone” bi iti uro beshee beetaa beeggiꞌi, “Ta manoocho, hiniich waaree kotebe” iye. Uroo waa kotehe.
2Boꞌaazi katemee geeneenaꞌo daggoochee aashireenaꞌon ceeggiꞌi, “Waa kotebote” iye. Boonoshiyoo waa koteheete. 3Boꞌaazi uroyich ishichiye: “Moꞌabee showoochee wottaꞌa waati Naꞌoomi no xiboo Elimeleekichi showoon kemma iyaa beetine. 4Ebich ebi mooyon ariiree, hiniich koteti, ta showee geeneenaꞌo aafoochaa kemoon hakkemmo ne tunoon neech getta qaawito taane. Kemoon ne qaawigaata, kemebe; ne kemeyaachemmo tunegaata, taach gete; kemoyich neyee shiichemmo koniyoona aalloone. Tawoo ne hillooch guttinnoo taane” iye.
Uroo “Kememmo taane” iye.
5Boꞌaazi “Gaawiye; showoon Naꞌoom waanee kememmo ne tunegaata, ebi showoo qititi Mahalooni kechi asheenaꞌoyich bi beeyemmoyich, Moꞌabee showoochee waati, qititi Mahalooni mechee Ruutin wotta woraashoo neech qaawiihe” iye.
6Uroo wochiꞌi, “Ebin ta tuniigaata, ta bushiishoo woraashaachemmo bi tunetoyich qajje. Ta kemeyaache. Ne kemebe” iye.
7Aroobee yemeenooch Israꞌeelee showooch woraasheechonaa asho bi hajjiti mooyon shaddeechonoyich ikke doyoo beetone. Ebi doyoo, mooyon manjiyoyich baatoochee caammoon kichiꞌi baroyich imone.
8Ebina uro “Ne kemebe” iꞌi, bi caammoon kichii Boꞌaazich immiye.#Yibba. 25:8-9
9Aroochee Boꞌaazi koteti geeneenaꞌonaa bare asheenaꞌo bullinoyich ishichiye: “Naꞌoom waanee bi keno Elimeleekicho, bi gutte bushiishoo Kiliyooninaa Mahilooninocho tuneto bullin hanaach kemeto ta tunoyich miixoo ittoshine. 10Wotta qititi Mahilooni mechee, Moꞌabee showoochee waati Ruutin woraashito taane. Ebiyoo Mahiloonichi shigo bi maneenaꞌonaa bi showee daggoonooch bi aalleyaachemmoyich, bi hajjiti showee toommoochoo aricheree bi beeyemmoyichiye. Ebi mooyoyich hanaach miixoo ittoshine” iye.#Yibba. 25:5-6
11Ebi iitee xaaꞌooch koteti geeneenaꞌonaa bare asheenaꞌo bullina ishichiyeete: “Eeha, miixoo noone. Doono Yeeri ne woraashiti ureen no qaabbechi Yaaqobich meeti bushiishoon shiyeti Raaheelinaa Liyinoommon tuniibe. Doono Yeeri Efiraati yaroochee neen gaanniibe. Beetilehemi katemooch ne shigo aricheto tunebe. 12Hini ure waanee ne shiyemmi bushiishoona Doono Yeeri ne kechi asheenaꞌon, Yihudi Tamaar waanee shiyiti Feretsi kechi asheenaꞌoommon tuniibe” iyeete.#Hal. 38:27-30
Taatoo Daawitichi Qaabbechi Niheenaꞌo
13Ebina Boꞌaazi Ruutin bi kexooch daammiꞌi shaaggiye; Ruutiyoo bi mechee tunehan. Doono Yeeri biin bi diiritoyich, xifaꞌa anaami bushoon shiyahan. 14Genneenaꞌo Naꞌoomich ishichiyeete: “Neen degi qeejjemmi bushoochi bushoon neech immiti Doono Yeeri galleteebe! Yeeri hini bushoon Israꞌeelee showooch aricheti ashoon tuniibe! 15Ebi bushoo, neen shunnaabeeti, shabaatte anaami bushiishoyee neech beshe ne naamechee waanee shiijjetone. Ebich bi neen kupphiyemmone; geenoochaa neen degi gaachemmone” iyeete.
16Naꞌoomi ebi bushoon daammaa bi sheenooch tiqqahan; bi hajjee bushoon tuniyaa shiimaꞌa dichiyan. 17Naꞌoomichi giyeenaꞌo tuneti genneenaꞌo “Naꞌoomich anaami bushoo shiijjete” iibee ebi bushoon Obeedi iꞌi shigiiheete. Obeedi Daawiti nihoo Iseyichi nihoone.
18Feretsichi shiijjeree haddoo ebine:
Feretsi Hetsiroonin shiyihe;
19Hetsirooni Araamin shiyihe;
Araami Aminadaabin shiyihe;
20Aminadaabi Nahishoonin shiyihe;
Nahishooni Salimoonin shiyihe;
21Salimooni Boꞌaazin shiyihe;
Boꞌaazi Obeedin shiyihe;
22Obeedi Iseyin shiyihe;
Iseyi Daawitin shiyihe.
Currently Selected:
Ruuti 4: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.