Ruuti 3
3
Naꞌoomi Ruutich Kenoon Qaawoo
1Ikke areddoon Naꞌoomi Ruutich ishichiyan: “Ne qellee kexona ne beeyemmon shunneti taane. Ebich neech tunemmi kenoon qaawoo taach qaawiihe. 2Bi shuunechi genneenaꞌon dabbaꞌa maayoon ne butteti uro Boꞌaazi nooch xiboo bi tunoon ebiyee aaf neech getteti taane. Andoo gaawichi ellebe; biyoo may xum bi sheqoon buchiibee budooch qeyemmone. 3Ebich ne qeddoon mache huuteree, gaawe tahoon tahebe; aroochee ebi are sheqoon bi buchiibeeti xaaꞌooch hambe; tunebaani maa uchii bi tiyimmi wottoon, biinna bekkeyaahine. 4Aabiich bi qeyemmo gaata shiichi xiishiichi, tokketoo biin daammitoyee gubb, hami bi baataa qoreddoon gaxxiree, arooch giyi tokketebe; biyoo ne tuniyemmon neech gettemmone” iyan.
5Ruutiyoo Naꞌoomich “Ebi ne getteto bullin tuniyemmi taane” iyan. 6Ebina Ruuti sheqoo bucheebeeti xaaꞌooch hammaꞌa, bi amaatee biich getteto bullin tuniihan.
7Boꞌaaziyoo maa uchii bi ashittinooch gaawetaa, hammii bushaa kiceeti sheqee gaꞌooch tokketehe. Ruutiyoo nibbaa xepphaabee waa Boꞌaazi qoreddoon baataa gaxxaꞌa giyaa tokketehan. 8Xumee gutte qellimi bedooch Boꞌaazi diqqoona tokketoochee beribenniꞌi bi tiyaahaa, ebiyoche, ikke ure bi baata qeyaꞌa beetine.
9Biyoo “Koni neene?” iꞌi echehe.
Areyoo “Ta doonocho, taane Ruuti! Ta kenoyich katini xiboonaa taan deggii gaachoyich bede ashoona ne tunetoyich, taan woraashibe” iyan.
10Boꞌaazi wochiꞌi Ruutich “Doono Yeeri neen diiribe; and ebi ne tuniiti mooyona aaf ne amaatech ne tuniitoyee beshoon deꞌe ne tunoon bekkiiti neene. Gaanneba woyee gireba, gurimaashoon qaawaꞌa dabbaanee neene. 11And illa amoyichona aaxxiyaahine. Gaawe ure ne tunoon katemeexi asho bulli arii beetone. Ebich ne echeti mooyo bullin neech tuniyemmo taane. 12Ne kenoyich katini xiboonaa neen deggii gaachoyich bede asheenaꞌoochee ikkoona ta tuno iberoone; tunebaani tayee beshoon katini bare uro beetone. 13And hiniich qebe; yaach ebi are uroyich ta getaa, neen woraashemmo bi tunegaata, woraashibe; bi qayigaata, Doono Yeeri beege, ta neech tunemmo taane. Showoo harimmi wottoon, hiniich tokketebe” iye.
14Ruutiyoo harimmi wottoon, Boꞌaazi baata tokketehan. Boꞌaaziyoo maache ure ebi sheqoo bucheebeeti xaaꞌooch waati bi tunoon asho koniyoona ariyemmoyich qaawaanoone. Ebich Ruuti haree gaargaarooch hamma tiyahan.
15Boꞌaaziyoo Ruutin “Ne naxaloon yaggibe” iye. Ruutiyoo bi naxaloon yaggiyan. Boꞌaazi shaashe kobbaaya bede sheqoon qeelleꞌi naxaloona Ruuti gogooch shaakkiihe. Biyoo katemooch wottee hammiye.#3:15 Ikkikke wonnee Yaafe Macaafooch, “Areyoo katemooch wottaa hammahan” getteetone.
16Ruuti bi amaatee Naꞌoom waan hammaa shaggahan. Naꞌoomiyoo “Ta busheene, neech ta getteti mooyo aabichite?” iyan.
Ruutiyoo Boꞌaazi tuniiti mooyo bullin gettahan. 17Daakkaꞌaanoo “ ‘Ne amaatee aafooch shokke kishoon hammaahine’ iꞌi, ebi shaahe sheqoon taach immiye” iyan.
18Aroochee Naꞌoomi Ruutich “Ta busheene, Boꞌaazi hanaach hini mooyon ikke xaaꞌooch bechaanoon heeyaachemmone. Ebich ikke mooyo tunetaa ne beeggemmi wottoon, haaꞌiyoona quyebe” iyan.
Currently Selected:
Ruuti 3: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.