Ruuti 2
2
Ruuti Boꞌaazi Budoochee Sheqoon Butto
1Naꞌoomi keno Elimeleekichi yaroonaa katini xiboona tuneti, ikke aricheti gaannechi uro beehe. Bi shigoo Boꞌaazi getteehe. 2Ikke areddoon Moꞌabechee Ruuti Naꞌoomin “Eke maayo qecceebeeti xaaꞌooch hamiree, gaawe aafoona taan ciinnimmi ashi budoochee maayoon buttebone” iyan.#Lew. 19:9-10; Yibba. 24:19
Naꞌoomiyoo “Ta busheene, hambe” iyan. 3Ruutiyoo budooch hammaꞌa shuunechinaꞌo hillooch dabbaa buttahan. Ebi bi buttaabeeti budo Elimeleekichi xiboo Boꞌaazi budo tunee danehe.
4Areegaata Boꞌaazi Beetilehemi katemoochee ebi bi maayo qecceebeeti budooch waahe. Shuunechinaꞌon “Doono Yeeri ittoshin gaachebe” iye.
Boonoshiyoo “Doono Yeeri neen diiribe” iyeete.
5Boꞌaazi bi shuunechinaꞌochi ukkiroon “Ebi ure konine?” iꞌi echehe.
6Shuunechinaꞌochi ukkiroo wochiꞌi, “Moꞌabee showoochee Naꞌoomina tookkaa waati Moꞌabechi ureene. 7Biyoo ‘Shuunechinaꞌo hillooch dabbiree ta buttemmoyich, taach daaggibe’ iyaꞌa taan qollahan. Maadda yaaꞌoochee tiijjaꞌa and beddaahaa buttaabee heechetine. Batt andiye giishechoon kasheya bashooch bi giyeto” iye.
8-9Aroochee Boꞌaazi Ruutich ishichiye: “Ta busheene, waayebe; hini budoyee besh bare ashi budooch hammaahine; hiniichee shuuriyaahine. Ta shuunechinaꞌo sheqoon qecciibeeto aabiich gaata xiishibe; ta shuunechi genneenaꞌon dabbiree boonoshi waan katini buttebe; ta shuunechi anaaminaꞌo neen boonoshi yulliyaachemmoyich manjiyaꞌa getteto taane. Ne shachewegaata, anaaminaꞌo kittiꞌi qondoona boonoshi kotiiti aacoochee uye” iye.
10Ruuti baroona showooch guufaa Boꞌaazich goyinnaꞌa, “Hini shiqqe, ashi showee ashe ta, ne aafoochaa ebi shaahe gidoon aabichaꞌa danehote?” iyan.
11Boꞌaaziyoo ishichiye: “Ne keno qitiichaa, ne amaatech ne tuniiti mooyo bullin waayeto taane. Wotta ne nihoonaa ne indeenon, ne shiijjee showoonoo qajjaꞌa, ebiyee aaf ne ariyaani ashi daggooch beeya ne womon waayeto taane. 12Ebi ne tuniiti deꞌe mooyoyich Yeeri neech deebe; bi quyoon qaawaꞌa bi qoshee dechiich ne giyeti, Israꞌeelee Nuggishoo Doono Yeeri gaawe mooyon neech ceenoona imbe” iye.
13Ruutiyoo ishichiyan: “Ta doonocho, ne gonneenaꞌo daggoochee ikkeyeenolla bedaani taan gaawe ne yibbaatoona goggiito neene. Ebi ne deꞌittinoon ta waanee wokkiyaahine” iyan.
14Maayoon maaya boonoshi kotemmona, Boꞌaazi Ruutich ishichiye: “Hach gidderee maayoon mame; koshona ittoochee dukkebe” iye.
Ebich Ruuti shuunechinaꞌona tookkaa kotahan. Boꞌaaziyoo bungee gaawoon biich immiye. Maa michaꞌa echiihan. 15Ruuti sheqoon butteya bi tiyetoyee gubb, Boꞌaazi bi shuunechinaꞌoyich ishichiye: “Qiroo beeti daggoocheenolla bi buttegaata, biin yeelliyaahote. 16‘Sheqee qiroo beetooch shaggaahine’ getiree biin kaareyaahote; ariibee qiroochee kaaci kaaci dufiichi ittoshi hamaa buttebuye” iye.
17Ruuti womikka beddaahaa ebi budoochee buttahan. Bi butteti sheqoon buchaꞌa, keejje qunna bedoon danahan. 18Ebin shaaggaꞌa katemooch wottahan. Bi amaatech ebi buttaa bi deebeti sheqoon bekkiihan; wotta maa michaa echiyaꞌa bi deebeti maayoon immahan.
19Naꞌoomiyoo Ruutin “Ebi bullin amoochee buttenne? Konichi budoochiye buttaabee ne heecheto? Ebi gaawe mooyon neech tuniiti uroon Yeeri diiribe” iyan.
Ruutiyoo wochaꞌa Naꞌoomich, “Boꞌaazi getteebeeti uroochi budoochiye buttaabee ta heecheto” iyan.
20Naꞌoomiyoo “Qititinaꞌonaa kashechinaꞌonoyich bi giyiti wogoon ceechiibeeti Doono Yeeri Boꞌaazin diiribe” iyan. Daakkaꞌa, “Ebi uro nooch katini xiboone. Noonoo deggii gaachoyich bede asheenaꞌo daggoochee ikkoone” iyan.#Lew. 25:25
21Ruutiyoo “Biyoo wotta taan ‘Ta shuunechinaꞌo maayoon qeccii ciichimmi wottoon, ta budoochee badd hammaahine’ itone” iyan.
22Naꞌoomi Ruutich “Ta busheene, Boꞌaazi budooch shuuneebeeti genneenaꞌon dabbaꞌa ne buttegaata, ebi neech gaawetone. Bare ashi budooch ne hamigaata, diqqich anaaminaꞌo neen yulliyemminaꞌone” iyan.
23Ebich Ruuti sheqoonaa teepphoona qecaa ciyimmi wottoon, Boꞌaazi shuunechi genneenaꞌon dabbaꞌa buttaa beehan. Bi amaatee waaneenoo baraanoon tookkaa beehan.
Currently Selected:
Ruuti 2: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.