Shaahiyoo 25
25
Solomooni Daakkiꞌi Gettiti Shaahiyeenaꞌo
1Eboshi wotta Yihudee taatoo Hiziqiyaasichi asheenaꞌo kooriti Solomoonichi shaahiyeenaꞌone:
2Mooyon aachoo Doono Yeerich oogoone;
tunebaani mooyon boshee kichoo taatoyich oogoone.
3Taatoochi mullo, shimaayoommi woho,
waarwaare aachi dechi duchoommo, bi tunetoyich aricheyaache.
4Birewoochee osheroon hidibe;
gooshukkoo aroona qiicoon shuunemmone.
5Taatoo aafoochee gondoon boyee beetinaꞌon wokkiibe;
bi taatee qeeno cadiqoona manjemmone.
6Taatoo aafoochaa bekkeya bekkeya gettaahine;
ogoogeenaꞌochi xaaꞌoochoo neexeyaahine.
7Iraashoo aafoochaa ne giishoyee,
“Hach damba wobe” ne getteyoo gaawiye.#Luqa. 14:8-10
Ne aafoona ne beeggeti mooyon,
8afaafineree miixeya addibaabooch hammaahine.
Ne miixetoyee gubb ne giyoo,
neen kootiiꞌi bi miixegaata yeellemmo neene.
9Ne mooyon ne giyoona tookkaa ne gajjiteyaa beegaata,
ashi maaci mooyon kichiyaahine.
10Ebin ne tuniigaata, ebin waayemmo neen gondiyemmone;
ne shigoo shaaꞌi beeyemmone.
11Bi gooroona getteeti qaaro,
birewee qiicee toommooch shuuneeti muume aachoommone.
12Mullechi ashi kaaro, deꞌa ii waayemmi ashich,
waajji aachoommo, xalle aachoochee shuuneeti shashoommone.
13Maayi qecci gooroobee gaamooba qaaye aaco ashoon emirikkoommon,
gibeneeti wocheyecho biin wocheton emirikkiye;
bi doonochi kashoon emirikkiye.
14Bi imaachemmi wojjoon yebeneebeeto,
amichaalli quboonaa yongoonoommone.
15Haaꞌiyoona ukkiroon eehiyoo hakkeehe;
maanjee yibbaatoo shaawushoon tiichiye.
16Beshiree neen bi wuuqqittiyaachemmoyich,
eeyon ne danehooba neech beddimmi wottoon baach mame!
17Neen bi mataachemmonaa bi shixaachemmonoyich,
ne giyoo kexooch wochi wochi hammaahine.
18Bi giyoo toommooch kootoon miixeebeeto,
qoolloommi, goraadoommi, aci shangoommi ashoone.
19Gibeneyaane ashoon, iritee aabooba gibeno,
shuuriti gashoon, woyee sheqqe baatoon gibenoommone.
20Bi mullo tiisheti ashich shoddee shoddo,
aqqee aabooba tahee shootoommo,
mayee toommooch kiikkeree ukkoommone.
21Ne etto shaacegaata, koshon maanjibe;
bi shachewegaata aacon uchibe!
22Ebina bi toommooch qaaqqee bunoon shookkemmo neene;
Doono Yeeriyoo gaawe gatiyoon neech qoccemmone.#Room. 12:20
23Dambi-waani yongo amiyon deebiye;
oonnechi heciyoo asho ippemmoyich tuniihe.
24Noonechi mecheena tookkii ikke kexooch beemoyee,
kechi toommeexi ikke gocooch beemo gaawiye.
25Shacheweti ashoon qaaye aaco digaayiyoommon,
wohi showoochee waati mishiraachoo ashoon emirikkiye.
26Gonde ashich dihiibeeti cadiqe asho,
qude aachi xuuphoommo woyee wooreti kote aacoommone.
27Wodde eeyon mamo gaaweyaache;
ebiyoommon wotta oogee qaawoo oogiyaache.
28Bi kaaroon aqqiyoon hakkaani asho,
bi uxeroo tiisheti katemoommone.
SIM International, 2020.