Shaahiyoo 26
26
1Baderoo qaawooba, amiyo maayi qecooba, doyaano bi tunoommon,
oogo mullaalli ashoona doyaache.
2Yoobbii okk hach capheebeeti kafeenaꞌochoommon,
naboo aalloon uppeebeeti ufo ashoon yeshaache.
3Hareshoyich arengoo, kuroyich lugaamoo qaawiyoommon,
mullaalloochi gubboyich gumbo qaawiihe.
4Biin ne shaahaachemmoyich,
mullaalloyich bi tuushittinoommona wochiyaahine!
5“Mullecho taane” geti bi gabaachemmoyich,
mullaalloyich bi tuushittinoommona wochibe!
6Mullaallo kishoona wochoon daachiyoo,
bi hajjee baatoon kuxoommo, hukkoonoo bi toommooch deeboommone.
7Mullaallo shaahiyoona bi yibbaato,
hekkelleebeeti sheqqe ashi baatoommone.
8Mullaalloyich oogoon imo,
xeppellooch xaqqoon qulloommone.
9Mullaallo shaahiyoona bi yibbaato,
mashecho bi kishooch giyiti angixon kichiya bi qiiccoommone.
10Gommo beshin woyee mullaalloon shuuniibeeto,
danemmo bullin mayiibeeti maꞌechoommone.
11Wochii wochii tuushiibeeti mullaalli asho,
bi cooyon nappheya wotteebeeti kunaanoommone.
12“Mullecho taane” iꞌi gabiibeeti ashoon beeggaa beetine?
Biyee tuushoyich beshe gibeno beete.
13Yeexere asho “Daaheroo gommooch beetone!
Gamini kaattooch daaheroo beetone” iye.
14Shaaqqoo bi shullee toommoochaa bi guudoommon,
yeexeroo bi qeechi toommoochaa guuddiye.
15Yeexere asho shaatoochee dukkehe;
tunebaani bi dukketon qappho biich maggoone.
16Kaachiꞌi wochiibeeti shabaatte asheenaꞌoyee,
beshe mullechon tuniiꞌi yeexeroo biin ciinniye.
17Biin gedaanoon ashi kaaree daggooch giyiibeeti asho,
gommon besheebeeti kunaanee waamon yechiibeeti ashoommone.
18Ashoon wuxiibeeti,
cobbcobbimii aaxxeebeeti shangoon awureebeeti geyechonaa
19bi giyoon dawushiichii,
“Kaachaane ta ito” ii beeti ashoona, ikkeenaꞌone.
20Mixo ciiregaata, qaaqqoo tahiye;
tippecho aallegaata kaaro aqqehe.
21Cicino qaaqqee gechoon, mixo qaaqqee aaxxoon woddiyoommon,
moochecho kaaroon dulliihe.
22Tippechochi yibbaatoo shaawi maayoommone;
maaci ashittinooch beddaahaa giyiye.
23Gonde mooyo bi mullooch beetaa, noonoon shaawiibeeti asho,
birewoona nasheeti nuuqqee qiicoommone.
24Shixecho gonde gaboon bi mullooch yechiichii,
noonee shaawona yibbaatehe.
25Shabaatte eeꞌe mooyo bi mullooch bi beetoyich,
noonee shaawona bi yibbaatetaanona biin gibeneyaahine.
26Shixecho bi tunoon maroona oppeebeeto,
bi gondo iitoo aafoochaa xalla bekkemmone.
27Oppoon iijjiibeeto arooch dihemmone;
xaqqoon gederikkiibeeto toommooch are xaqqo wottemmone.#Shod. 7:15; Doj. 10:8
28Koottiibeeti heciyoo bi mayiitinaꞌon shixxiye;
maree yibbaatoo aalloon deebiye.
Currently Selected:
Shaahiyoo 26: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.