Shaahiyoo 24
24
1Gonde asheenaꞌona qanaateyaahine;
boonoshina nuuchittinoon qaatiyaahine.
2Boonoshi mullo gabiibeeto xuꞌooniye;
boonoshi noonoo yibbaateebeeto ashoon duꞌiyooniye.
3Kexo shalligoona hakkehe;
manji bi beeyemmoyichoo gaboona shuuneehe.
4Ariyoona, qiicee kexinaꞌo,
aaxxi, gaawe gaanno bullina ceenniyeete.
5Mullechi asho giidechone;
ariyechi asho kupphee kupphee hammiye.
6Ariyechochi yamoon deꞌona koyoon koyebe;
meeti ciiccechinaꞌo beetooch wudoo beetone.
7Shalligoo tuushoyich oogeti wohone;
biyoo iitoochaa eciya tippoon tunehe.
8Gondoon tuniiya gabiibeeto,
marecho getaa ceekkemmone.
9Mullaallo gabiibeeto axaaxooniye;
cooqqirechonoo asheenaꞌo ciigeheete.
10Iritee aabooba ne waateyegaata,
hakkaallo neene getone.
11Qitooch gashee beetinaꞌon shiwebe;
guureyooch xukkee beetinaꞌon wodiibe.
12“Ebin ta ariyaache” ne getigaata,
mulloon haattiibeeto ebin shalligaachehe?
Ne kashoon ciinniibeeti aroo ariyaachehe?
Asho bullich bi shuuni shuunoommon qocaachehe?
13Ta bushoocho, gaaweto bi tunetoyich eeyon mame;
bi woolloo ne kookkooch shaawone.
14Shalligoo ne kashoyich ebiyoommo bi tunoon ariibe.
Shalligoon ne danegaata, gubbi ne beemo kaamemmone;
ne gibenoo kuxeyaachemmone.
15Gonde ashichoommon cadiqa ashi kexon ottaahine;
bi beeyi xaaꞌoonoo xuqqaahine.
16Cadiqe asho shabaatte wottoon dihiye;
wochinnoonoo tiyiye;
tunebaani gonde asheenaꞌo gondooch dihemminaꞌone.
17Ne etto dihoona emiriyaahine;
bi tepheyoonoo ne mullo oogichi emiraaye.
18Doono Yeeri neenna ayiniree,
bi kaaroon ne etto waanee wochemmone.
19Gonde asheenaꞌochi naboona ippeyaahine;
axaaxechinaꞌonoo qanaateyaahine.
20Gondeenaꞌoyich gubbich tunemmi gibeno aalloone;
boonoshi ceechoo tahemmone.
21Ta bushoocho, Doono Yeerinaa taatoonon shate;
boonoshi toommooch hukkee beetinaꞌona bacceyaahine.
22Ebi asheenaꞌo toommooch iritoo diqqoona woyemmone;
ebi gutteenaꞌo waanee woyemmi aalloon koni ariihe?
Mullechi Asheenaꞌochi Bare Ciico
23Eboshi wotta mullechi asheenaꞌochi yibbaateenaꞌone:
Ashi aafoon ciinniꞌi nalloo tato toonoone.
24Gonde ashoon “Ne xalloo neene” ii beeto,
macceenaꞌona uppeyemmone; aagetoona shixxeyemmone;
25tunebaani gonde ashoon sheerii beetinaꞌoyich, emiroo tunemmone;
gaawe diiroo boonoshi toommooch tunemmone.
26Tate wochoon wochoo,
noonoon shumoommone.
27Maaxeexi ne shuunoon shuunebe;
bulli mooyon budooch ne qellich qanniibe;
aroyee gubb ne kexon hage.
28Ne giyoo toommooch naboo aalloon cikki miixeyaahine;
ne noonoonoo dawushiyaahine.
29“Taach bi shuunetoommon biich shuunemmo taane;
bi shuunoon biich qoccemmo taane” gettaahine.
30Ikke yeexere uroochi goyoona,
gabaalli uroochi woyinee budona, beshehoye.
31Ebiyoche, angixo arooch ceennitone;
shuyoo showoon guuppitone;
xaqqee uxeroo tiishetone.
32Ebin ciinnaꞌa gabiyo;
ebin beeggaꞌa ariyoon daneho.
33Giishechoon tokkete, giishechoon geepphiri,
ne kishoon qodiree giishechoon kashe ne beetaa,
34illa, giroo bokkoochoommon, mucco goraadoon cuyeti ashichoommon,
ne toommooch woyemmone.#Shaah. 6:10-11
SIM International, 2020.