Shaahiyoo 23
23
1Iraashoona tookkaa madooch ne kotegaata,
ne aafooch beeton manjii ciine.
2Gaawe qettecho ne tunegaatoona,
ne qettoon yeshe.
3Dachee maayo bi tunetoyich,
shaawi bi maayo neen dakiyaaye.
4Gaannecho tunoyich aajjaahine;
ebi gaboon qayoyich mullechon tunebe.
5Gaannoon aafoon waaxxaa ne ciinigaata, aallemmone;
shimaayooch yoobbiibeeti booyochoommon
bi qellich qoshoo kichi aallemmone.
6Ciinechi ashi maayoon maayaahine;
shaawi bi maayo neen dakiyaaye.
7Aroo bi mullee gaboommi asho bi tunetoyich,
“Mame, uye” gettemmone;
tunebaani bi mulloochee tiijjiꞌi toonoone.
8Ne maati maayoon aapphemmo neene;
gaawe ne yibbaatoo duubo tunemmone.
9Shalligechi ne yibbaatoon kettiyemmo bi tunetoyich,
mullaalli ashich amoonolla gettaahine.
10Wonnee daaree malletoon waaxxaahine;
nihaalleenaꞌo showoonoo xuqqaahine.
11Boonoshi Gaachoo kuppho bi tunetoyich,
boonoshi qoodoon neenna taggemmone.
12Ne mulloon doyee toommooch,
ne waamonoo ariyee qaaroon waayooch, heechiibe.
13Kaccoona ne yexigaata qitaachemmo bi tunetoyich,
bushoon sheeroo taahiyaahine.
14Kaccoona biin ne yexigaata,
bi kashoon qitoochee wodiyemmo neene.
15Ta bushoocho, mullecho ne tunegaata,
ta mullo emiremmone.
16Ne noonoo kaame mooyon bi yibbaategaata,
ta kasho oogichi emiremmone.
17Ne mullo axaaxechinaꞌon qanaataaye;
heeyo bullin Doono Yeerin shatona beebe.
18Ebin ne tuniigaata, gubbi ne beemo kaamemmone;
ne gibenoo kuxeyaachemmone.
19Ta bushoocho, ellebe; mullechon tunebe;
ne mulloon kaame gommooch wochibe.
20Wodde woyinee uyoon uchii beetinaꞌona tookki,
woyee meenon dakiibeeti maaci shuneenaꞌona tookki, guuphiyaahine!
21Mashoonaa maacee shunona girii beetone;
tokketee shunoo butoon tajjii beetone.
22Neen shiyiti ne nihoochi ciicoon waayebe;
neen shiyeti ne indee geenehooba biin hoxeyaahine.
23Iberoon kemeballi kemmaahine;
shalligoon, gaawe ciicoonaa gabii deꞌonon kemebe.
24Cadiqe bushoochi nihoo oogichi emiremmone;
mullechi bushoon shiyitoo biinna wucwuccemmone.
25Ne indeenaa ne nihoona emiribeete;
neen shiyetiyoo emiroona wucwucuye.
26Ta bushoocho, gaawichi ellebe;
ne aafeenaꞌo ta gommon ciineete.
27Yahechi maachee oppee hoonoommine;
shaddechi maacheyoo xebbe oppoommine.
28Bokkoochoommon gommooch ottahane;
gibeneyaani anaaminaꞌonoo ashi daggooch meechiyane.
29Woowo geto konichone? Ayinoo konichone?
Kaaro konichone? Cookoo konichone?
Naboo aalloon mayo konichone? Aafoon ceello konichone?
30Woyinee uyoon uyona heechii beetinaꞌocho,
bacceeti woyinee uyoon guuddii cangee beetinaꞌochone.
31Woyinee uyo, bi ceelloon, burciqoochaa bi waccoon,
naalliibee maac bi gimon, ciinnaahine.
32Ciiroochaa dingeroochoommon,
xekerechoommonoo neen qoppemmone.
33Ne aafo dallaawe mooyon ciinnemmone;
ne gaboo duubetaa yafillemmo neene.
34Baharee toommooch tokketeton,
markabee giimbee cillooch qeyeton, shaahemmo neene.
35Newoo, “Yexxiyeete; tunebaani taan biiyaanoone;
xoobbiyeete; tunebaani taan sheewaanoone;
aatane tokketoochee ta tiyemmo?
Bare uyo taan gabiitone” gettemmo neene.
SIM International, 2020.