Shaahiyoo 19
19
1Bi heciyoon guttiibeeti mullaalli ashoyee,
oonneyaani beemon beeti girecho gaawiye.
2Ariyaalli shittecho tuno deꞌo toonoone;
afaafinee shaaddeebeeti asho gommon muriccemmone.
3Asho bi beemon tuushoona duubiichii,
bi mulloona Doono Yeerin gondiihe.
4Gaanno meeti shunechon deebiye;
tunebaani girechochi shunecho biyee wokkiye.
5Koote miixecho sheereyoo qayaachemmone;
koote yibbaatechoo sheeroochee muricaachemmone.
6Meetinaꞌo, wojjechi asheenaꞌona xiboon qaawiyeete;
wojjoon immiibeeti ashich bulliyona xiboone.
7Girechon bi maneenaꞌo bulli shixxiyeete;
ishigaata, bi nuucheenaꞌo am shaahoon biyee wokkeheete!
Boonoshin dabbii bi ceeggitaanolla,
nuuchoon daneyaache.
8Shalligoon danemmo bi kashoon shunniye;
goommii deꞌon kupphii yechimmoyich mooyo kaamehe.
9Kootoon miixeebeeto, sheereyoo echeyaachemmone;
kootoon yibbaateebeeto aallemmone.
10Gaannee ciqqinniꞌi beemo mullaalloyich tateyaache;
guuno iraashoo toommooch doonjo beshe gondoone.
11Shalligoo ashoon haaꞌiyecho tuniihe;
biin xuqqiton maaroo oogoon danoone.
12Taatoochi kaaro daaheree cidoommone;
tunebaani bi aafoochaa gidoon dano, mocee toommeexi keetoommone.
13Mullaalli bushoo bi nihoon aallooch bechiye;
noonechi mechee shaanaani amichi kuchoommine.
14Kexonaa gaannoona nihoo waanee woraasheehe;
tunebaani qoppechi mecheen immiibeeto Doono Yeerine.
15Yeexerittino magge tokketoon deebiye;
yeexere ashoo shaacemmone.
16Sheeroon quyeebeeto bi kashoon quyemmone;
tunebaani Yeerichi qaaroon qallayiibeeto qitemmone.
17Girechoyich immiibeeto, Doono Yeerich erettiihe;
Doono Yeeri bi shuunee gaacoon biich gaaccemmone.
18Wottee gibeno beetaa, ne bushoon sheeribe;
bi qitemmoyich tuniyaahine.
19Ippechi asho bi shuunee gatiyoon qoccemmone;
biin gaachaa ne wodiigaata, wochinnoon ebin tuniyoo neech echeyaache.
20Ciicoon ellebe; getoon waayebe;
gubbich shalligoon danemmo neene.
21Ashi mullooch beeto meeti gaboone;
tunebaani ceennemmo Doono Yeeri gettitone.
22Ashi waanee qaaweebeeto gibeneyoone;
koote asho tunoyee girecho tuno gaawiye.
23Doono Yeerin shato kasho waan yaabiye;
biin shattiibeeto digaayoona beehe;
gonde mooyo bi waan shagaache.
24Yeexere asho shaatoochee dukkehe;
tunebaani bi dukketon qappho biich mawoone.
25Cooqirechon yexe; tuushoo mullechon tunemmone;
mullechon ne kaaraa ciicigaata beshoon ariyecho tunemmone.
26Bi nihoon duꞌiibeeti, bi indeenoo kexoochee yookkiibeeto,
yeellii cooniibeeti bushoone.
27Ta bushoocho, ciicoon waayo ne qayigaata,
ariyee qaaroochee muriccemmo neene.
28Xumme miixoo dayinnetee toommooch cooqqiriye;
gondoon shuuno gondeenaꞌoyich shaawiye.
29Cooqqirechinaꞌo toommooch nalloo,
yeexereenaꞌo gubboyichoo quddoo, qannitone.
SIM International, 2020.