Shaahiyoo 20
20
1 Woyinee uyo ashoon cooqqirecho, kashi uyo yexecho tuniihe;
eboshina muriccito bulli ariyecho toonoone.
2Taatoochi kaaro gigeebeeti daaheroommon shattiitone;
biin ippiimmo bi kashee toommooch nallitone.
3Kaaroochee woho ashoon oogiihe;
tunebaani tuushe asho kaaroyich afaafinehe.
4Yeexere asho gooroona goyaache;
qecci goorooch, bi qeccemmon daneyaache.
5Ashi mullee gaboo oppee ducheexi aacoommone;
tunebaani gabechi asho kittii kichiye.
6Meeti asheenaꞌo shoodechinaꞌo boonoshi tunoon yibbaateheete;
tunebaani ebiyoommi gibeneeti ashoon koni danoon hakkehe?
7Cadiqe asho oonneyaani beemon beehe;
biyee gubbi bi bushiisheenaꞌoo diireetinaꞌone.
8Nallee gabberooch koteti taatoo,
gonde mooyo bullin bi aafoona ciinnii barbariihe.
9“Ta mulloon xalliito taane;
ta axaaxoochee xalleto taane”
geton hakkemmo konine?
10Baribare machoonaa baribare kobbaayonon,
guttinona Doono Yeeri ciigehe.
11Gaggere busholla xalloonaa kaamoona bi tuno,
bi tuniibeeti mooyona arichehe.
12Waayeebeeti waamonaa ciinniibeeti aafoonon
boonoshi guttinona hallito, Doono Yeerine.
13Ne gireyaachemmoyich tokketoon shunnaahine;
ne aafoon gaxxibe; koshon michemmo neene.
14Kemecho “Gondoone, gondoone” iibee qiicoon qalliihe;
tunebaani kemee bi daammitoyee gubb worganehe.
15Aachoonaa ceelle inqoona beetone;
tunebaani ariyoona yibbaateebeeti noonoo eboshiyee beshoone.
16Bi ariyaani ashich buushaaretochi tahoon deꞌe;
dallaawe ashoyich bi yechiiti yechiyoon ne waan kotiibe.
17Dawushoona daneti kosho ashich shaawone;
tunebaani gubb bi kookkooch qaca qaca gettemmone.
18Ciicoon deꞌona yamoon yamebe;
ariyechochi ciicoon deꞌona koyoon koyebe.
19Guuddii oonnechona aashee mooyo kechiye;
ebich yibbaateechii wotteyaani ashi waanee wohe.
20Bi nihoon woyee bi indeen naaggiibeeto,
bi ceechoo dunne manderoochaa tahemmone.
21Batti batt afaafinoona daneti gaanno,
ciiroochaa abbetaalloone.
22“Gondee kaalloon wochemmo taane” gettaahine;
Doono Yeerin quyebe; bi neen gaachemmone.
23Kishoo guttiiꞌi qeelloon Doono Yeeri ciigehe;
koote qeellee qiico biin emirikkaache.
24Asho shaaddeebeeto Doono Yeeri itoochiye;
ebi tunegaata, asho aabichishiye bi gommon shalligoon bi hakkemmo?
25Asho afaafinoona Doono Yeerich bi mookketoyee gubb,
bi gaabbigaata, biich shaachoone.
26Shalligechi taatoo gondeenaꞌon barii ariihe;
boonoshin ariqqaalloon sheeriye.
27Ashi ayaano Doono Yeerichi ceechoone;
bi maaci mooyo bullin haattiye.
28Shoodoonaa gibeneyoona taatoon quyeheete;
bi taatee qeenoo shoodoona manjiye.
29Gurimaasheenaꞌoyich boonoshi oogo giidoone;
geeneenaꞌoyich boonoshi oogo bukkoone.
30Mayiiꞌi sheeroo gonde mooyon aalliihe;
gumboona xoobo maaci ashittinoon xalliihe.
SIM International, 2020.