Shaahiyoo 18
18
1Ashoona yesheyaani asho, bi qaatoon baach dabbiye;
asho bullina shucheti qociyoon shixxiye.
2Tuushoo bi mulleexon geton qaawiyalli,
goommii deꞌona emiraache.
3Gondoon shuuno hoxeyoon deebiye;
oogoon mucco giishoon deebiye.
4Ashi noonoochee kechiibeeti shalligee qaaro,
ooge aacoommo, qulliqullii ufeebeeti aachi xuuphoommone.
5Gonde ashi waan gaꞌo,
cadiqoochi nalloonoo xummiyo, tato toonoone.
6Tuushe ashi yibbaatoo kaaroon deebiye;
bi noonoo gumboon ataalliye.
7Tuushe ashoon bi yibbaatoo aalliihe;
bi noonoo bi kashoyich shaachoone.
8Tippechochi yibbaatoo shaawi maayoommone;
maaci ashittinooch beddaahaa giyiye.
9Shuunoo shuunoon taahiibeeti asho,
aalliyechochi manoone.
10Doono Yeerichi shigo manje xaqqee dilaaloommone;
cadiqeenaꞌo arooch woccii deebeꞌi wodiyeete.
11Gaannechoyich bi gaanno mishigechi katemoon,
genje xaqqee uxerooniye bi shaahiibeeto.
12Asho bi dihoyee shiichiꞌi bi mulloona geeciye;
tunebaani qellee giishiyoo oogoyee shiichoone.
13Waayeyaano beechii wochoo,
tuusha haddiibeeti, yeelliiti mooyone.
14Kashoona beeya qaatoo,
asho bi biiyehooba bi goggemmoyich tuniihe;
tunebaani kashoona beeyi qaatoo aallegaata,
koniyoona goggeyaache.
15Beelloochi mullo ariyoon hajjiye;
mullechochi waamoo ariyoon qaawiye.
16Wojjoo, immechoyich gommon qechiye;
ogoogeenaꞌo aafoochoo katichiye.
17Bi shixecho waaꞌi echemmi wottoon,
shiichiꞌi taggoon waayiito deꞌooniye bi shaahiibeeto.
18Ixoo kuxo kaaroon neechiye;
kupphe taggechinaꞌochi mooyon kuxxiye.
19Xukketi manoo mishigechi katemoommi kupphoone;
boonoshi kaaro xaqqee uxeree tuggoommone.
20Asho, bi noonoochee kechiibeeti mooyona digaayemmone;
bi yibbaatoonoo michemmone.
21Qitoonaa wodoona heciyee kishoochiye;
yibbaatoon shunniibeeto, bi yibbaatee aafoon maayemmone.
22Mecheen daneto gaawe mooyon danete,
Doono Yeer waanee gidoon danete, getone.
23Girecho maanjiibee yibbaatehe;
tunebaani gaannecho noggoona wochiye.
24Nuuchoon meechii beeti asho aallemmone;
tunebaani manoyee beshe katini shunecho beetone.
SIM International, 2020.