Haddoo 25
25
Moꞌabeenaꞌo Israꞌeeleenaꞌon Muriciyoo
1Israꞌeeleenaꞌo Shixiim beebee, Moꞌabee maacheenaꞌona tookkii shaddooch giyiyeete. 2Ebi maacheenaꞌo boonoshi nuggisheenaꞌochi deejjooch asheenaꞌon ataalliyeete. Asheenaꞌoo deejjee maayoon maaheete; boonoshi nuggisheenaꞌoyichoo goyinneheete. 3Ebina Israꞌeeleenaꞌo Baꞌaal Feꞌoorich goyinneheete. Ebich Doono Yeeri kaaro boonoshi toommooch aaxxehe.
4Aroochee Doono Yeeri Muusich “Doono Yeeri ta kaaree shiixxoo Israꞌeeleenaꞌo waanee bi wokkemmoyich asheenaꞌochi ukkireenaꞌon daamiree, aabooch Doono Yeeri ta aafooch yoode” iye.
5Muusiyoo Israꞌeeleenaꞌon nallii qeejjii beetinaꞌoyich “Ittoshi ikkikkoona Baꞌaal Feꞌoorich goyinneti ittoshi ashoon wuxibote” iye.
6Aroochee Israꞌeeleenaꞌo daggoochee ikkoo, Muusinaa Israꞌeeleenaꞌo bullinochi aafooch ikke Miidiyamee asheen yechii bi xibeenaꞌo waan waahe. Areegaata, Muusinaa Israꞌeeleenaꞌo bullina danee duukkaanee kellooch eeppii beetinaꞌone. 7Qeeshoo Harooni bushoochi bushoo, Elazaari bushoo Finihaasi ebin beeggiꞌi, iiteenaꞌo daggoochee tiyii, ginoon yechiꞌi, 8ebi Israꞌeelee ashoon dabbii duukkaanooch giyiye; giyiꞌi ginoona Israꞌeelee ashoonaa ureenon xaaqqii kochiꞌi wuxiye. Ebina Israꞌeeleenaꞌo waanee naxo tooqqiye. 9Tunebaani ebi naxoona hiyaa awudde hume asheenaꞌo qititinaꞌone.
10Aroochee Doono Yeeri Muusich ishichiye: 11“Qeeshoo Harooni bushoochi bushoo, Elazaari bushoo Finihaasi ta oogoyich boonoshi daggooch ta qanaatoommon qanaateꞌi, ta kaaree shiixxoon Israꞌeeleenaꞌo waanee bi wochitoyich, ta kaaroona boonoshin aalliyaano taane. 12Ebich ta diggee wogoon biinna tookki geddemmo ta tunoon biich gete. 13Bi, Yeerich qanaateꞌi Israꞌeeleenaꞌon bi maariitoyich, biinnaa biyee gubbi bi shiijjereenaꞌonoyich qeeshittinee maddooch manjee wogoon biich tunemmone” iye.
14Miidiyamee asheena tookkii qititi Israꞌeelee ashoochi shigo Zimiri getteehe; biyoo Saali bushoone. Simooni yoodee ukkiroone. 15Qititi ure Kozibi getteehan; biyoo Miidiyamee ikke yaree ukkiroo tuneti Tsuuri busheene.
16Doono Yeeri Muusich ishichiye: 17“Miidiyameenaꞌon duꞌiiree koyi aalliibote. 18Ebiyoo Feꞌoori guudoochaa ittoshin dawushiꞌi ittoshi toommooch boonoshi shuuneti gonde mooyonaa Feꞌooraa kinditi naxee naboona qititi boonoshi iraashoochi bushee tuneti boonoshi manee Kozibichi gommona ittoshin boonoshi dawushiti dawushoonoyichiye” iye.
Currently Selected:
Haddoo 25: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
