Haddoo 24
24
1Balaamiyoo Doono Yeeri Israꞌeeleenaꞌon diiriya bi qaawoon bi ariitoyich, aafichoommon kaayiya hamaanoone; tunebaani barahoo waan guuddii ciinniye. 2Biyoo boonoshi yoodi yoodoona kaamboon geddiꞌi koteti Israꞌeeleenaꞌon beeggiye. Yeerichi Ayaano bi toommooch waahe. 3Biyoo ishichii yibbaatooch giyiye:
“Beꞌoori bushoo Balaamichi keemo,
bi aafo gaxxeeti ashi qaaro, ebine:
4Yeerichi qaaroon waayeebeeto,
Beshe Hakkechi Nuggishoochi yaaꞌoon beeggiibeeto,
showooch guufeto, tunebaani bi aafo gaxxeeto, ishichiye:
5“Yaaqobo, ne duukkaaneenaꞌo,
Israꞌeelo, ne beeyi xaaꞌeenaꞌo,
am shaahoon gaaweheete!
6“Bambeenaꞌoomminaꞌo,
aachi gashooch beeti bechee mixinaꞌoomminaꞌo,
Doono Yeeri bechiti, ereeteenaꞌoomminaꞌo,
aachi gashooch beeti yigee mixinaꞌoomminaꞌone.
7Boonoshi gaanneenaꞌoochee aaco kechemmone;
boonoshi yareenaꞌoo wodde aacon danemminaꞌone.
“Boonoshi taatoo, Agaagiyee beshemmone;
boonoshi taatittinoo oogemmone.
8“Boonoshin Gibitsee kichito, Yeerine.
Boonoshi giidoo gaahee giidoommone.
Boonoshi etteenaꞌo tuneti aageteenaꞌon aalliyemminaꞌone;
boonoshi shaawushoon tiishi buriccemminaꞌone;
shangoona boonoshin kochemminaꞌone.
9Daaheroochoommon miqqetone;
daaherechoommonoo showooch qeyitone;
biin shuurikkemmo, konine?
“Neen diirimmo bulli diireeto tunebe;
neen uppimmo bulli uppeto tunebe” iye. #Hal. 12:3; 49:9
10Balaaqi Balaamin oogichiꞌi kaarehe; bi kishoonoo qahiye. Aroochee Balaaqi Balaamich ishichiye: “Ta etteenaꞌon ne uppemmoyich ceekkiihoye; tunebaani ne keejje wottoon boonoshin diirihine. 11And illa, ne showooch tiyi hambe. Neech gaacca ito taane; tunebaani Doono Yeeri neech gaacoon mucciitone” iye.
12Aroochee Balaami Balaaqich ishichiye: “Ta waan ne wocheti ne wocheyechinaꞌoyich, 13‘Balaaqi bi kexooch ceenniti birewoonaa aachoonon taach bi immimmo gaatoona, Doono Yeerichi qaaroon ceechoyee besh, ta daaggoona deꞌoon woyee gondoon tuniyoon hakkaache. Doono Yeeri gettimmon baach gettemmo taane’ iyaꞌa getaano taane? 14Andoo ebiyoche ta asheenaꞌo waan hammaabeeto taane. Eke ne waatee, hini asheenaꞌo woyemmi yemeenooch ne asheenaꞌo toommooch boonoshi tuniyemmon neech getone” iye.
Balaamichi Awuddinnee Yibbaatoo
15Aroochee ishichiꞌi yibbaatooch giyiye:
“Beꞌoori bushoo Balaamichi keemo,
bi aafo gaxxeeti ashi qaaro, ebine:
16Yeerichi qaaroon waayeebeeto,
Beshoo Yeer waanee ariyoon daneto,
Beshe Hakkechi Yeerichi yaaꞌoon beeggiibeeto,
showooch guufeto, bi aafoo gaxxeeto, ishichiye:
17“Biin beeggaabeete; tunebaani and toonoone;
biin ciinnaabeete; tunebaani katinoon toonoone;
Yaaqob waanee xojjeno kechemmone;
Israꞌeeleenaꞌo daggoochee taatittinee gumbo kechemmone;
Moꞌabeenaꞌochi qelloon gaakkemmone;
Seeti bushiisheenaꞌochi qelli koofon kophemmone;
18Edoomin koyi wochemmone;
bi etto Seyirinoo koyi yechemmone;
Israꞌeeli kupphe kupphe hammemmone.
19Yaaqobichi shiijjeroochee neexi hajjemmo woyemmone;
katemoochee muriccii echetinaꞌon aalliyemmone” iye.
Balaamichi Ciireexi Yibbaatoo
20Balaami yaaꞌoona Amaleeqeenaꞌon beeggiꞌi, ishichii yibbaatooch giyiye:
“Amaleeqi aageteenaꞌo daggoochee ikkinnoone;
tunebaani ciiroochaa aallemmone” iye.
21Qeeneenaꞌon beeggiꞌi, ishichii yibbaatooch giyiye:
“Ne beeyi xaaꞌoo manjoone;
ne kexo xaqqee daggooch hakketone;
22tunebaani Qeenee ashoocho, Ashuuri neen keccii daamiyooba,
hidaa aallemmo neene” iye.
23Aroochee ishichiꞌi yibbaatooch giyiye:
“Yeeri ebin tuniihooba,
woowo, kashoona beeyemmo, konine?
24Ginechinaꞌo markabeenaꞌona Kitiimee showee daaroochee woyemminaꞌone;
Ashuuree showoonaa Ebeeree showoonon koyi wochemminaꞌone.
Ciiroochaa boonoshiyoo aallemminaꞌone” iye.
25Aroochee Balaami bi showooch wottee hammiye; Balaaqiyoo bi gommon yechiye.
Currently Selected:
Haddoo 24: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
