Haddoo 12
12
Miiriyaminaa Haroonina Muusi Toommooch Timo
1Muusi Topphiyee asheen bi shaaggitoyich, ebi bi shaaggiti ure naboona Miiriyaminaa Haroonina biin gondii yibbaateheete. 2Ishichiinoo iyeete: “Iberoon Doono Yeeri Muusina baachiye bi gettito? Noonna getaanoone?” iyeete. Doono Yeeriyoo ishin waayehe.
3Showee toommooch beeti asho bulliyee beshoon Muusi bi qelloon giishiibeeti ashoone.
4Bekkech Doono Yeeri Muusin, Harooninaa Miiriyaminon “Ittoshi keemolla kaate keyiree, danee duukkaanooch wobote” iye. Boonoshiyoo kechii waaheete. 5Doono Yeeriyoo giimboochoommon neexeebeeti quboona kindiꞌi, duukkaanee kellooch neexehe. Harooninaa Miiriyaminon ceeggiye. Boonoshi guttiyona bi waan waaheete. 6Ishichiinoo iye: “Ta gettaa beeton waayebote.
Ittoshi daggooch keemecho bi beegaata,
Doono Yeeri ta, yaaꞌoona biich bekkaabeeto taane;
gumonoo biich gettaabeeto taane.
7Tunebaani ta guuno Muusina ta yibbaateebeeto ebiyoommona toonoone;
Bi, ta kexo bulliich gibeneetone.#Hib. 3:2
8Biinna tookkaa ta yibbaateebeeto baroon baroona danaꞌa,
xallalli aashoona toonoone.
Doono Yeeri ta shaahoonoo beeggii beetone.
Ishigaata, aabichaa aafoon kupphaꞌa ta guuno Muusi toommooch yibbaatehote?” iye.
9Doono Yeeri kaaro boonoshi toommooch aaxxehe. Biyoo boonoshiyee bariꞌi hammiye.
10Qubo duukkaanee toommoochee tiyiyee, Miiriyami qeddee shaddee biiyoona yexxaꞌa kecho naccoommon naccehan. Harooni Miiriyam waan wottee ciinniꞌi, qeddee shaddee biiyoona bi yexxoon beeggiye. 11Biyoo Muusich “Ta doonocho, xumme mooyon tuniyoona axaaxoon shuuneto noone. Doogena ebich noon naxeyaahine. 12Bi indee maacaa qicceꞌi, qachi bi ashittino ciyiichaa shiijjeebeeti bushoommon tunaayoye” iye.
13Ebich Muusi “Ta Nuggishoocho, biin ne wodiyemmoyich neen qollehoye” iꞌi Doono Yeer waan cookiye.
14Doono Yeeriyoo Muusich “Bi nihoo bi aafooch cudon cudi gaatoona, shabaatte qemon yeellaabeeti toone? Kaamboyee maach kichaa shabaatte qemon hicaa kotebuye. Ebiyee gubb kaambooch wottoon hakkemmine” iye.#Had. 5:2-3
15Ebich Miiriyami kaamboyee maach kichaa shabaatte qemon kotahan. Miiriyami wottaa waammi wottoon, asheenaꞌo qaxiraaneenaꞌone. 16Ebiyee gubb asheenaꞌo Hatserootee tiyii qaxiriyeete; Faraani barahooch kaamboon geddii koteheete.
Currently Selected:
Haddoo 12: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
