Haddoo 11
11
Yeer Waanee Qaaqqoo Kindoo
1Asheenaꞌo boonoshi toommooch shaggiti iritoyich, Doono Yeeri toommooch guruuxiyeete. Doono Yeeriyoo boonoshi guruuxoon waayeꞌi, oogichii kaarehe. Bi qaaqqoo boonoshi daggooch aaxxeꞌi kaamboon gocoochaa maahe. 2Asheenaꞌo Muus waan hammiꞌi cookaa, biyoo Doono Yeer waan corootiye; qaaqqoo tahiye. 3Doono Yeerichi qaaqqoo boonoshi daggooch bi aaxxetoyich, are xaaꞌee shigo Tabeeri getaa ceekkehe.
Shabe Ukkireenaꞌon Muusi Kaaco
4Israꞌeeleenaꞌo daggooch beeti dallaawe asheenaꞌo meenon xiqqeheete. Israꞌeeleenaꞌoo wotta eeppiibee ishichiyeete: “Noochoo meenon daneree mamona! 5Gibitsaa gijjoon kichaanoon maabee no echeti haashoo, buqqoo, haabhaabo,#11:5 Haabhaabo, kapphetaa manjeebeeti buqqoommi mooyone. bi tuppoona tookkii maanjeebeeti duqishoo, ceelle duqishoonaa nacce duqishoona nooch batteyaanoone. 6Tunebaani and no giidoo qajjitone; hini mannoyee besh no beeggaabeeti mooyo amolla aalloone” iyeete.
7Mannoo deebbee aafoommone; bi shaahiibeetoo ixaanooniye. 8Asheenaꞌo hammii ebi mannoon maciyeete; xaqqoona yiikkeꞌi woyee bottoona kochiꞌi, qondooch guppii beeheete; wotta xekee kachii beeheete. Ebi mannoo, bi shaawo zayitoona baccee kachiti koshoommone.#Key. 16:31 9Doshoo (caagibano) xumoona kaambooch kindiyee, mannoo tookkii kindii beehe.#Key. 16:13-15
10Asheenaꞌo boonoshi gumbi gumbi tuneꞌi, bulli boonoshi duukkaani duukkaanee kelloochaa eeppii boonoshi beetaa, Muusi waayehe; Doono Yeeriyoo oogichiꞌi kaarehe; Muusiyoo xuuxehe. 11Biyoo Doono Yeerich ishichiye: “Ebi shaahe iritoon ne guuno toommooch amoyich deebenne? Ne aafoochaa gidoon dano ta qajjeto amoyichiye? Ebi asheenaꞌo bullichi shaagoon ta toommooch amoyich minjinne? 12Dichindee bushoon tiqqoommon ta sheenooch tiqqeree, boonoshi qaabbechinaꞌoyich wogaꞌa ne gibenikkiti showooch ta giijjemmoyich ne gettaabeeto, iberoochaa eboshi bullin taane yeqqefeto? Boonoshi bullin taane shiyeto? 13Ta waan waaꞌi, ‘No maayemmi meenon nooch imbe’ iibee eeppiibeeti, ebi asheenaꞌo bullich meenon amoocheeniye ta deebemmo? 14Taan oogichii maggetone; ebi asheenaꞌo bullin ta ikkeeto yaaboon hakkaache. 15Taan ebin ne tuniyoyee, ne aafoochaa gidoon ta danegaata, ta toommooch tunemmi iritoon ta beegoyee, taan wuxibe” iye.
16Doono Yeeri Muusich ishichiye: “Israꞌeelee geeneenaꞌo daggoochee asheenaꞌon qociyechinaꞌonaa ukkireenaꞌona boonoshi tunemmoyich, ne ariibeeti shabe Israꞌeelee geeneenaꞌon taach kicibe. Boonoshinoo danee duukkaanooch ne deebaa, neenna tookki neexebeete. 17Tawoo kindi aroochaa neenna tookki yibbaatemmo taane; ne waan beeti Ayaanoochee qoodiree boonoshi toommooch kotiyemmo taane. Asheenaꞌochi shaagoon shaagona neen gaachemminaꞌone; ebiyee bekk, ne ikkeeto baach shaagaachemmo neene.
18“Asheenaꞌoyichoo ishichibe: ‘Yaachich yaafeeree qannibote. Meenon maayemmo ittoshine. “No maayemmi meenon koni nooch imba? Gibits no beehooba, nooch gaawiye” ii ittoshi eeppiton Doono Yeeri waayetone. Ebich Doono Yeeri meenon ittoshich immemmone; ittoshiyoo maayemmo ittoshine. 19Ikke qemon woyee gutte qemon woyee uuche qemon woyee aashire qemon woyee hiye qemon baach maataachemmo ittoshine. 20Tunebaani ittoshi daggooch beeti Doono Yeerin ittoshi hoxetoyich, bi aafoochaanoo “Amoyich Gibitsee kechetone?” ii ittoshi eeppitoyich, ittoshin bi beelletiimmi wottoon, ittoshi muddoona bi waammi wottoonoo ikke agenee kipphimoon maayemmo ittoshine’ gete” iye.
21Muusiyoo “Baatoona qaxiriibeeti shiritte balle hume maccee daggoochiye ta beeto; ne wotta ceeni ikke agenoon ‘Boonoshi maayemmi meenon boonoshich immemmo taane; boonoshiyoo maayemminaꞌone’ ito neene. 22Meeti miimonaa bagoona bashaa boonoshich beddehe? Bahareexi haasheenaꞌon bulli yeshi kicaa boonoshich beddehe?” iye.
23Doono Yeeri Muusich, “Iberoochaa Doono Yeeri ta kishoo qaminone? Ta qaaroo bi ceenonaa ceeni qayonon and beeggemmo neene” iye.
24Ebina Muusi kechii hammiꞌi, Doono Yeeri gettiton asheenaꞌoyich gettiye. Asheenaꞌo daggoocheenoo shabe geeneenaꞌon kiciꞌi, danee duukkaanee guudoona neechiye. 25Aroochee Doono Yeeri quboona kindiꞌi biich yibbaatehe; bi toommooch beeti Ayaanoochee daammiꞌi shabe geeneenaꞌo toommooch kotiihe. Ayaano boonoshi toommooch kottehooba, keemoon keemmiyeete; tunebaani ebiyee gubb keemaaneenaꞌone.
26Elidaadinaa Medaadina getteebeeti gutte asheenaꞌo geeneenaꞌona tookkii haddeechii danee duukkaanooch hamaanoon kaambooch echeheete. Tunebaani Doono Yeerichi Ayaano boonoshi toommooch kindaa, kaamboochaa keemoon keemmiyeete. 27Ikke gurimaashoo woccii waaꞌi, Muusich “Elidaadinaa Medaadina kaambee daggooch keemoon keemmii beetinaꞌone” iye.
28Bi bushittinoochee tiijjiꞌi Muusichi gaachoo tuneti, Nuuni bushoo Yaasi, “Ta doono Muuso, boonoshi keemaachemmoyich baye” iye.
29Tunebaani Muusi biich, “Ta naboyich qaaqqaꞌaane? Doono Yeer asheenaꞌo bulli keemechinaꞌo boonoshi tunemmo gaata, Doono Yeeriyoo bi Ayaanoon boonoshi toommooch bi kindiimmo gaatoona, taach emiroone” iye. 30Aroochee Muusinaa Israꞌeelee geeneenaꞌona kaambooch wotteheete.
Doono Yeeri Shewekkeenaꞌon Deejjoo
31Doono Yeeriyoo yongoon deejjiꞌi, shewekkeenaꞌo gutte hira bedoon showooch katiniree biitibee boonoshi woyemmoyich tuniihe. Kaambee guudoona, ikke heechi gommi bedoon ikke baddaa, wotta ikke heechi gommi bedoon bare baddaa kiceeheete. 32Asheenaꞌo tiyiꞌi, aroobee heeyo bullin, xumo bullin, bi decharoobee heeyo bullinoo, shewekkeenaꞌon yechii kiciyeete. Arooba giishechoon kicite getteeto aashire xaana bedoon kicitone. Boonoshiyoo kaambee guudooch, aabooch ichiyeete. 33Tunebaani meeno batt boonoshi gashooch beetaa, cokkee qooxaan boonoshi beetaa, Doono Yeeri kaaro boonoshi toommooch aaxxehe; Doono Yeeri bi asheenaꞌon kupphe naxoona yexxiye. 34Qaatiti asheenaꞌo arooch boonoshi duukketoyich, are xaaꞌee shigo Qaatee Oppo getaa ceekkehe.
35Asheenaꞌo ebi xaaꞌoochee Hatseroot qaxiriyeete; aroochoo koteheete.
Currently Selected:
Haddoo 11: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
