Haddoo 13
13
Kanaanee Showoon Qiido
(Yibbaatoo 1:19-33)
1Doono Yeeri Muusich ishichiye: 2“Israꞌeeleenaꞌoyich ta immaabeeti showoon boonoshi qiiddemmoyich asheenaꞌon daachiibe. Qaabbechinaꞌochi yoodoochee boonoshi ikkikkoo daggooch ukkiroo tuneti ashoon daachiyemmo ittoshine” iye.
3Ebich Muusi Doono Yeeri gettitoommon, Faraani barahoochee asheenaꞌon daachiihe. Boonoshi bulliyona Israꞌeeleenaꞌochi ukkireenaꞌone. 4Boonoshi shigoo ebine:
Roobeeli yoodoochee Zakuuri bushoo Shamuꞌi;
5Simooni yoodoochee Hooriyi bushoo Shafaaxi;
6Yihudi yoodoochee Yefuuni bushoo Kaaleebi;
7Yisakoori yoodoochee Yooseefi bushoo Igaali;
8Efreemi yoodoochee Nuuni bushoo Hosheehi;
9Biiniyaami yoodoochee Raafi bushoo Feliixi;
10Zebulooni yoodoochee Soodi bushoo Gaddeeli;
11Yooseefi yoodoochee, ebiyoo Minaasi yoodoochee tuneti, Susi bushoo Gaddi;
12Daani yoodoochee Gemaali bushoo Ameli;
13Aseeri yoodoochee Mikaꞌeeli bushoo Setuuri;
14Nifitaali yoodoochee Bofiisi bushoo Nahibinaa
15Gaadi yoodoochee Maki bushoo Geweelinane.
16Showoon boonoshi qiiddemmoyich Muusi daachiiti asheenaꞌochi shigo ebine. Muusi Nuuni bushoo Hosheehin Yaasi iꞌi shigiihe.
17Kanaanee showoon boonoshi qiiddemmoyich Muusi boonoshin wochee daachiihe. Biyoo boonoshich ishichiye: “Negeebi barahoon kuxi besheree geppe showooch hambote. 18Showoo amoommo gaata, arooch beeti asheenaꞌo kuppheenaꞌo woyee waateyeenaꞌo boonoshi tunoon, giishecheenaꞌo woyee meetinaꞌo boonoshi tunoonoo, beegote. 19Boonoshi beeti showoo gaaweto woyee gondo bi tunoon, boonoshi beetoo, gafooch woyee xaqqoona uxereeti katemooch bi tunoon, 20showoo qeemo woyee bukoo bi tunoon, mixo arooch beemonaa aalloononoo beegote. Kuppheree are showeexi manjeebeeti michi aafoochee yeshiree wobote” iye. Gooroo woyino batt gaangiibeeti gooroone.
21Ebich kechii hammiꞌi, showoon Tsiini barahoochee tiijjii, Hamaat beshe kaattooch beeti Rehoob beddaahaa qiiddiyeete. 22Negeebi barahoona beshee hammiꞌi, Kebiroon shaggiyeete. Anaaqee yareenaꞌo tuneti Ahimaani, Sheshaayinaa Talimayina arooch beetinaꞌone. Kebirooni katemoo shuuneeto, Gibits beeti Tsoꞌaani katemoo shuuneyoyee shabaatte naton shiichiꞌiniye. 23Aroochee Eshikooli bambooch waaheete; woyinee aafo shushiti ikke yuunjoon kuxxiyeete. Gutte asheenaꞌo yaroona shaaggiyeete; wotta daakkiꞌi romaanee michi aafoonaa balaasee aafoonon deebiyeete. 24Israꞌeeleenaꞌo aroochee woyinee yuunjoon boonoshi kuxxitoyich, are xaaꞌoo Eshikooli#13:24 Eshikooli geto, “Woyinee aafee yuunjoo” getone. Bamboo getaa ceekkehe. 25Aabbinnee qemooba showoon qiidoochee wotteheete.
Qiiddechinaꞌo Yechii Waati Woroo
26Qiiddechinaꞌo#13:26 Qiiddechinaꞌo, ii beeton ikkikke asheenaꞌo “Maaccechinaꞌo” ii beetinaꞌone. Muusi, Harooninaa Israꞌeeleenaꞌochi iitoo bullina beeti Faraani barahooch, Qadeesh waaheete. Woroonoo boonoshinaa iitoo bullinoyich gettiyeete. Are showeexi manjeebeeti michi aafoon boonoshich bekkiiheete. 27Muusichoo “Noon ne daachiiti showooch hammeto noone; aroo ejjoonaa eeyona xuupphiibeeti showoone. Bi immiibeeti aafo ebine. 28Tunebaani are showooch beeti asheenaꞌo giidechinaꞌone. Katemeenaꞌoo xaqqoona uxereeti, ogooge katemeenaꞌone. Wotta Anaaqee yareenaꞌon arooch beeggeto noone. 29Amaleeqeenaꞌo Negeebi kotetinaꞌone; Hiteenaꞌo, Yebuseenaꞌonaa Amooreenaꞌona geppe showooch kotetinaꞌone; Kanaaneenaꞌoo baharee gashoonaa Yoordaanoosi aachi gashoonooch kotetinaꞌone” iyeete.
30Kaaleebi, asheenaꞌo Muusi aafoochaa cikki ellemmoyich tuniiꞌi, “Ikke wottoona tiyi keyone. Showoon woraashoyich kochaa yeshon hakkemmo noone” iye.
31Tunebaani biinna tookkii hammiti asheenaꞌo ishichiyeete: “Asheenaꞌo noyee beshe kuppheenaꞌo boonoshi tunetoyich, boonoshina koyoyich hamon hakkaachone” iyeete.
32Ebich hammii qiiddii boonoshi beeggiti showeechi gonde woroon Israꞌeeleenaꞌoyich deebiꞌi, “Qiidooch no hammeti showoo bi daggooch beeti ashoon maa beetone. Arooch no beeggeti asheenaꞌo hakkechinaꞌone. 33Nefiliimeenaꞌonoo arooch beeggeto noone. (Anaaqeenaꞌo shiijjeto Nefiliimeenaꞌo waaneeniye.) Boonoshi aafoochaa noon no ciinigaata, gechooniye no shaahaa beeto; ebin shaahaaniye no ciichaabeeto” iyeete.#Hal. 6:4
Currently Selected:
Haddoo 13: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
