Maatiyoosi 9
9
Bi Ashittino Qititi Uroon Yesuusi Wodiyoo
(Maariqoosi 2:1-12; Luqaasi 5:17-26)
1Ebiyee gubb, Yesuusi giishi markabeech giyii baharoon kimmiꞌi bi beeyi xaaꞌoo tuneti katemooch wottee waahe. 2Arooba bi ashittino qititi ikke uroon shaaꞌoona shaaggiꞌi bi waan deebiyeete. Yesuusiyoo bi toommooch mulloon boonoshi tooꞌiyoon beeggiꞌi, bi ashittino qititi uroon “Ta bushoochoo, kupphebe; ne axaaxoo maareetone” iye.
3Areegaata Muusichi Sheeree dojjechinaꞌo daggoochee ikkikkeenaꞌo boonoshi mulloona “Ebi Yeerin naagone” iyeete.
4Yesuusiyoo boonoshi shalligoon ariiꞌi ishichiye: “Ittoshi mulloona gonde mooyon amoyich gabiyote? 5‘Ne axaaxoo maareetone’ getonaa ‘Tiyiree hambe’ getonoochee kettoo aabine? 6Tunetaa Ashi Bushoo hini showee toommoochaa ashi axaaxoon maaroyich hakkoo biich beemon ittoshi ariyemmoyich” iꞌi bi ashittino qititi uroon “Hini uroocho, and tiyi ne shaaꞌoon shaagiree ne kexooch hambe” iye. 7Bi ashittino qititi uroo bekkech tiyiꞌi bi kexooch hammiye. 8Dofee asheenaꞌo ebin beeggiꞌi shattiyeete; ebiyoommi doonjittinoon ashich bi immitoyich Yeerin oogiiheete.
Maatiyoosin Yesuusi Ceego
(Maariqoosi 2:13-17; Luqaasi 5:27-32)
9Yesuusi aroochee besheꞌi hammiibee Maatiyoosi getteebeeti ikke uro qaraxo kucheebeeti gabberooch kotee bi beetaa ciinniꞌi, “Taan dabbibe” iye. Aroo tiyiꞌi biin dabbiye.
10Aroyee gubb, Yesuusi Maatiyoosi kexooch giyiꞌi maayo giddetaa madee toommooch bi beetaa, meeti gabiyee guudeenaꞌonaa axaaxechinaꞌona waaꞌi Yesuusinaa bi dabbeenaꞌona tookkii maa beeheete. 11Ikkikke Fariseenaꞌo ebin beeggiꞌi bi dabbeenaꞌon “Ittoshi dojjecho gabiyee guudeenaꞌonaa axaaxechinaꞌona tookkii ikkooch bi maabeeto amoyichiye?” iꞌi echeheete.
12Yesuusi ishin waayeꞌi ishichiye: “Biiyechinaꞌoyichalli wodeenaꞌoyich aakumo qaawiyaache. 13Hambote, Yeeri ‘Deejjoyee ariqqoon shunnoye’#Hos. 6:6 bi ito ama geto gaata ariibote. Axaaxechinaꞌonalli cadiqeenaꞌon ceegoyich waataano taane” iye.
Coomeechon Yesuusi Dojjoo
(Maariqoosi 2:18-22; Luqaasi 5:33-39)
14Arooba Yowannisi dabbeenaꞌo Yesuus waan waaꞌi, “Noonnaa Fariseenaꞌona [meeti areddoon] coomaabeeto noone; tunetaa ne dabbeenaꞌo amoyich coomaacheete?” iꞌi echeheete.
15Yesuusiyoo ishichiꞌi wochiye: “Woꞌee keno boonoshina tookkii beetaa, miyaateenaꞌo muusheneheete? Tunebaani woꞌee keno boonoshi waanee baremmi aabo woyemmone; arooba coomemminaꞌone.
16“Ebiyoo geene tahooch andire xefoon xefeebeeto aalloone; bi xefegaata, andire xefo geenoon kushi yeshiree beshoon keexxemmone. 17Ebiyee wotta geene mollexxooch gaare woyinee uyoon kotiyaacheete. Boonoshi kotiigaata, mollexxoon gaakkemmone; uyo ufemmone; mollexxoo duubemmone. Tunebaani gaare woyinee uyoon andire mollexxooch kotiiheete; gutteenaꞌoo duubeyaanoon beeyemminaꞌone” iye.
Qititi Busheenaa Biiyeti Ureenon Yesuusi Wodiyoo
(Maariqoosi 5:21-43; Luqaasi 8:40-56)
18Yesuusi ishichiꞌi gettii bi beetaa, ikke ukkiroo waaꞌi, “Ta bushee and qititine; tunebaani waaree ne kishoon bi toommooch kotiibe; bi kashoo wottemmone” ii qolleꞌi goyinnehe. 19Yesuusiyoo tiyiꞌi bi dabbeenaꞌona tookkii uroon dabbiꞌi hammiye.
20Hammii boonoshi beetaa, aaraa gutte naton damoo ufeebeeti ure Yesuusichi gubbaa hammaꞌa bi qoreddee caappoon yechahan. 21Eechii bi ito, bi mulloona “Bi qoreddoon baach ta yeshigaata, wodemmi taane” iyaꞌa bi gibenetoyichiye.
22Yesuusiyoo guuddii wottee ciinniꞌi tiyii, “Ta busheene, kupphebe! Ta toommooch ne mulloon ne tooꞌiyoo neen wodiitone” iye. Ureyoo bekkech wodiyan.
23Yesuusi ukkiroo kexooch shaggiꞌi, eeppi tiimboon huggechinaꞌonaa cangecheebeeti asheenaꞌonon beeggiꞌi, 24“Bushee tokketaanalli bi ito, qitaaneene. Eke kexoochee keyote” iye. Asheenaꞌo oogichii biin cooneebee miiceheete. 25Asheenaꞌo kechitoyee gubb, bushee qeyaabeeti gatooch giyiꞌi bushee kishoona yechiye; busheyoo bekkech motekkimaa tiyahan. 26Hini mooyo are showoo bulliich waayeehe.
Aaf Dooge Gutte Asheenaꞌon Yesuusi Wodiyoo
27Yesuusi aroochee tiyiꞌi bi hammii beetaa, aaf dooge gutte asheenaꞌo “Daawiti Bushoocho! Nooch ariqqebe” iꞌi cookiibee biin dabbiyeete.
28Yesuusi kexooch bi giyitoyee gubb are aaf doogeenaꞌo bi waan giddeheete. Yesuusiyoo “Ittoshi aafoon wodiyee ta hakkoon iberiihote?” iꞌi echehe.
“Eeha, no Doonocho!” iꞌi wochiyeete.
29Arooba Yesuusi “Mulloon ta toommooch ittoshi tooꞌitoommon ittoshich tunebe” iꞌi boonoshi aafoon yechiye. 30Boonoshi aafoo qecheetaa ciinniyeete. Yesuusi “Konicholla gettaahote” iꞌi manjiiꞌi gettiye. 31Tunetaa boonoshi kechiꞌi are showoo bulliich woriyeete.
Noona Miimoon Yesuusi Wodiyoo
32Hini are boonoshi aafo woditi asheenaꞌo hammii boonoshi beetaa, asheenaꞌo yinno bi toommooch beeti ikke noona miime uroon Yesuus waan deebiyeete. 33Yinnoon bi yookkitoyee gubb noona miimo yibbaatehe. Asheenaꞌo bulli “Ebiyoommi mooyon Israꞌeelee showoochee beeggaa ariyaano noone” iibee worganeheete.
34Tunetaa Fariseenaꞌo “Yinnee taatoochi giidoonane yinnoon asheenaꞌo toommoochee bi yookkiibeeto” iyeete.
Asheenaꞌoyich Yesuusi Ariqqo
35Ebiyee gubb, Yesuusi Ayihudeenaꞌo kiceebeeti kexoochaa dojjiibee, Yeerichi taatittinee mishiraachee qaaroon gettiibee, asheenaꞌo toommooch beeti biiyo bullin wodiibee, katemoonaa gafoo bullinooch guuddii beehe. 36Dofee asheenaꞌo qiddaalli bagoochoommon dego mucceꞌi boonoshi iriteyoon beeggiꞌi bi maacoona miccii ayiniye. 37Arooba bi dabbeenaꞌon “Qecceyemmi maayo woddoone; tunebaani qeccii kicechinaꞌo giishecheenaꞌone. 38Illa maayi Doono qecceyemmi maayo beeti budooch qeciree kicemminaꞌon bi daachiyemmoyich corootibote” iye.
Currently Selected:
Maatiyoosi 9: KBRC
Highlight
Share
Copy
Want to have your highlights saved across all your devices? Sign up or sign in
SIM International, 2020.