Maatiyoosi 8
8
Qeddee Shaddee Biiyechi Ikke Uroon Yesuusi Wodiyoo
(Maariqoosi 1:40-45; Luqaasi 5:12-16)
1Yesuusi geppoochee bi kindimmona dofee asheenaꞌo biin dabbiyeete. 2Arooba qeddee shaddee biiyechi ikke uro bi waan giddeꞌi, “Ta Doonocho, ne daaggigaata, taan wodiyoon hakkihine” iibee goyinnehe.
3Yesuusiyoo bi kishoon hini are uro toommooch kotiiꞌi, “Daaggiyoye, wodibe” iye. Ishichii bi immona, uro bekkech qeddee shaddee biiyoochee wodiye. 4Yesuusiyoo “Ebi ne wodoon konichona gettaahine; ne qelloon ariibe. Tunebaani and hamiree ne ashittinoon qeeshoyich bekkiibe. Ne wodoon asheenaꞌo bulli xiishemmoyich, Muusi bi sheerooch deejjibote iꞌi bi kooriti deejjoon Yeerichi deejjibe”#Lew. 14:1-7,10-11,21-22 iꞌi daachiihe.
Roomechi Balle Ginee Iraashoochi Aafee Bushoon Yesuusi Wodiyoo
(Luqaasi 7:1-10)
5Yesuusi Qifirinaahi katemooch bi shaggimmona balle ginee iraashoo bi waan waaꞌi, 6“Ta Doonocho, ta aafee bushoo ashittinoon wuxiibeeti biiyoona biiyee qaakkeꞌi beerooch qeyitone” iꞌi qollehe.
7Yesuusiyoo “Ta hamiree wodiyemmo taane” iye.
8Hini are balle ginee iraashoo wochiꞌi, “Ta Doonocho, ta kexooch ne giyi beddemmi uro toono taane; tunebaani ikke qaaroon baach gete; ta aafee bushoo wodemmone. 9Ta wotta tayee dambeenaꞌoyich hajjeebeeto taane; tayee desh beeti ginee naayinaꞌo wotta taach hajjee beetinaꞌone. Ikkoon hambe ta getigaata, hammii beetone; baroon wobe ta getigaata, waa beetone; ta aafee bushoon ‘Ebin tuniibe’ ta getigaata, tunii beetone” iye.
10Yesuusi ishin waayeꞌi worganehe; biin dabbiibeeti asheenaꞌoyichoo ishichiye: “Iberoon ittoshich gettoye: Ta toommooch ebiyoommi mullee tooꞌiyoon Israꞌeelee showoocheenolla daneyaano taane. 11Ellebote, meetinaꞌo aabi-keyonaa aabi-gimonoochee woyemminaꞌone; Abrahami, Yisaaqinaa Yaaqobina tookki gifiree maayoon maaya shimaajji taatittineech kotemminaꞌone. 12Tunetaa ‘Shimaajji taatittine noochine’ ii beetinaꞌo maach manderooch kichaa duppeyemminaꞌone; aroochaa eefonaa gashee qaayona boonoshich tunemmone” iye.
13Wotta Yesuusi balle ginee iraashoyich “Hambe, ne mulloon ta toommooch ne tooꞌiitoommon neech tunebe” iye. Bi aafee bushoo bekkech areegaata wodiye.
Meeti Asheenaꞌon Yesuusi Wodiyoo
(Maariqoosi 1:29-34; Luqaasi 4:38-41)
14Ebiyee gubb, Yesuusi Pheexiroosi kexooch giyiꞌi bi amaatee achee gaamee biiyoona biiyaꞌa beerooch qeyaa beetin beeggiye. 15Tiyiꞌi bi kishoon yechiye; ureechi achee gaamoo bekkech aqqehe; tiyaa maayoon Yesuusich giddiihan.
16-17Showoo xumetaa yinno boonoshi toommooch beeti meeti asheenaꞌon Yesuus waan deebiyeete. Yinneenaꞌon noggeꞌi asheenaꞌo toommoochee yookkiye; biiyetinaꞌo bullinoo wodiihe. Ebich arooba keemechi Isiyaasi
“No maraateshon maraatehe;
no biiyeshon biiyehe”#Isi. 53:4
bi ito ceenniye.
Biin Dabbiya Qaawiti Gutte Asheenaꞌoyich Yesuusi Geto
(Luqaasi 9:57-62)
18Yesuusi dofee asheenaꞌo bi guudoona giishon beeggiꞌi bi dabbeenaꞌon “Baharoyee beqach kimbone” iye.
19Aree hillooch ikke Muusichi Sheeree dojjecho waaꞌi, “Dojjechocho, ne hammemmo bulliich neen dabbemmo taane” iye.
20Yesuusiyoo “Boqqelleenaꞌoyich oppo, shimaajji kafeenaꞌoyichoo kexo beetone; ebi tunemmona Ashi Bushoyich giyi bi qeyemmi xaaꞌoo aalloone” iye.
21Biin dabbii beetinaꞌo daggoochee ikke bare uro “Ta Doonocho, shiichiree, hami ta nihoon duuhiichibona” iye.
22Yesuusi wochiꞌi, “Qiteenaꞌo qititi boonoshi asheenaꞌon duuheete; tunetaa ne taan dabbibe” iye.
Aachi Aayo Shashewimo
(Maariqoosi 4:35-41; Luqaasi 8:22-25)
23Ebiyee gubb, Yesuusi giishi markabeech kechii koteꞌi bi dabbeenaꞌona tookkii hammiye. 24Diqqoona aachi aayo tiyiꞌi, giishi markabeen aaco qerimmi wottoon baharo oogichii shuuriye; tunetaa Yesuusi tokketetone. 25Bi dabbeenaꞌoo giddeꞌi, “No Doonocho, noon wodiibe! Aalleto noone” iibee tokketoochee Yesuusin tiijjiyeete.
26Biyoo “Hini, ta toommooch mulloon tooꞌiyaaneenaꞌote, amoyich shattii beetote?” iye. Ebiyee gubb, tiyiꞌi yongoonaa baharee aachi aayonon noggehe; bekkech shashewimiye.
27Asheenaꞌo “Yongoonaa baharoonolla biich deꞌe ii beeti hini uro am shaahe ashoone?” iibee worganeheete.
Gutte Asheenaꞌo Toommoochee Yinnoon Yesuusi Yooho
(Maariqoosi 5:1-20; Luqaasi 8:26-39)
28Ebiyee gubb, Yesuusi baharoyee beqach kimmiꞌi Gergeseenee showooch bi shaggimmona yinno boonoshi toommooch beeti gutte asheenaꞌo maasho beetoochee kechiꞌi biinna daneheete. Areenaꞌo boonoshi beeti gommonolla beshoon asho shattimmi wottoon sharechinaꞌone. 29Boonoshiyoo bekkech bunneꞌi, “Yeerichi Bushoocho, no mooyooch neen amo geddiye? Nallaa galloo waataan beetaa noon xuuxiiya hiniich waanne?” iibee cookiyeete.
30Arooba boonoshi beetoochee wokkiꞌi beeti xaaꞌooch meeti gudininaꞌo quyetaa maa beeheete. 31Yinneenaꞌo “Noon yookkemmo ne tunegaata, gudininaꞌo toommooch hami kotebone; daaggibe” iꞌi qolleheete.
32“Hamiree kotebote” iye. Bekkech yinneenaꞌo asheenaꞌo toommoochee tiyiꞌi hammii gudininaꞌo toommooch koteheete. Aroochee gudininaꞌo bulli giidechi qaaꞌooch guufee kindii baharee gejjoona manjeheete.
33Gudichi qiddeenaꞌo wocee katemooch hammiꞌi tuneti mooyonaa yinno boonoshi toommooch beeti asheenaꞌochi mooyo bullinon asheenaꞌoyich gettiyeete. 34Ebich katemeexi asheenaꞌo bulli Yesuusina danoyich waaheete; biin boonoshi beeggitoyee gubb “No showoochee keyiree hambe” iꞌi qolleheete.
Currently Selected:
Maatiyoosi 8: KBRC
Highlight
Share
Copy
Want to have your highlights saved across all your devices? Sign up or sign in
SIM International, 2020.