Maatiyoosi 10
10
Bi Wochemmi Mishiraachechinaꞌon Yesuusi Kaaco
(Maariqoosi 3:13-19; Luqaasi 6:12-16)
1Yesuusi aaraa gutte bi dabbeenaꞌon bi waan ceeggiꞌi, yinneenaꞌon asheenaꞌo toommoochee boonoshi yookkemmoyich, biiyetinaꞌo bullinoo boonoshi wodiyemmoyich ukkirittinoon boonoshich immiye.
2Hini are aaraa gutte mishiraachechinaꞌochi shigo, batti batt Pheexiroosi getteebeeti Simooni, bi manoo Indiriyaasi, Zebidiyoosi bushiisheenaꞌo Yaaqobinaa Yowannisina, 3Filipphoosi, Baritelemoosi, Toomaasi, gabiyee guudo Maatiyoosi, Ilfiyoosichi bushoo Yaaqobi, Taadiyoosi, 4bi aagetoyich qanaateebeeti Simooni, Yesuusin beshiiꞌi immiti Asqorootechi Yihudi, eboshine.
Aaraa Gutte Mishiraachechinaꞌon Yesuusi Wocho
(Maariqoosi 6:7-13; Luqaasi 9:1-6)
5Arooba Yesuusi hini are aaraa gutteenaꞌon wochehe; ishichiinoo boonoshich gettiye: “Aageteenaꞌo showee gommona hammaahote; Shamaari katemoochoo giyaahote. 6Tunebaani bago aalloommon aalleti Israꞌeeleenaꞌo waan hambote. 7Hamibee, ‘Shimaajji taatittine ittoshi kellooch shaggetine’ getote. 8Biiyetinaꞌon wodiibote; qititinaꞌon tiijjibote; qeddee shaddee biiyechinaꞌon wodiibote; yinnoon asheenaꞌo toommoochee yoohote. Gatiyaalloon Yeer waanee deqqito ittoshine; ebich ittoshiyoo gatiyaalloon asheenaꞌoyich imbote. 9Ittoshi burooch aachoon, birewoon woyee gooshoon yechaahote. 10Gommoyich shohee kojjoon woyee ittoshi tahetoyee bare tahoon woyee caammoon woyee gumboon yechaahote. Ebiyoo shuunecho biin shuuniito waanee shohoon maamo qaawiibeeto bi tunetoyichiye.
11“Ittoshi giyimmi katemooch tuneba gafooch arooch beeti asheenaꞌon ‘Noon iibbiyemmi gaawe asho aabine?’ getiree echebote. Aroochee ittoshi kechimmi wottoon are kexooch kotebote. 12Are kexooch ittoshi giyigaata, diggoo getote. 13Kechi doono ittoshin bi iibbiigaata, ittoshi diggiyoo biich shage; iibbiyoo bi qayigaata, ittoshi diggiyoo biich shaggaaye. 14Ittoshin iibbiyaano woyee ittoshi qaaroon waayeyaano koniyoona bi beegaata, are kexon woyee are katemoon gawukkiree keyibee ittoshi baateexi quttoon tebbebote. 15Iberoon ittoshich gettoye: Nallaa gallooba are katemeexi asheenaꞌoyee Sodoomi katemeexi asheenaꞌonaa Gomoori katemeexi asheenaꞌonoyich gaawiye”#Hal. 19:24-28 iye.
Mishiraachechinaꞌo Duꞌeechon Yesuusi Geto
(Maariqoosi 13:9-13; Luqaasi 21:12-17)
16Daakkiꞌi Yesuusi ishichiye: “Ellebote, bagoochoommon okereenaꞌo daggooch ittoshin wochemmo taane. Ebich dingeroochoommon accecho, uggechoommon duuroo tunebote. 17Tunebaani nallechinaꞌoyich ittoshin beshiiree immemminaꞌone; Ayihudeenaꞌo kiceebeeti kexoochaa arengoona xooppemmo ittoshine; ebich ashi waanee ittoshi qelloon quyebote! 18Ta naboyich iraasheenaꞌonaa taateenaꞌonochi aafooch ittoshin neechemminaꞌone; ebi bi tunemmo boonoshinaa Aageteenaꞌonoyich miixoo ittoshi tunemmoyichiye. 19Asheenaꞌo ittoshin beshii imiyooba ‘Aabichiree gettehone?’ woyee ‘Ama gettehone?’ getiree xuuxeyaahote; areegaata ittoshi gettemmon Yeeri ittoshich immemmone. 20Ittoshina tuneree gettemmo ittoshi Nihoo Yeerichi Ayaanoani ittoshi toonoone.
21“Arooba manoo bi manoon, nihoo bi bushoon wuxemmoyich beshiiree immemmone; wotta bushiisheenaꞌo boonoshi niheenaꞌonaa indeenaꞌonochi toommooch tiyiree wuxiyemminaꞌone. 22Asheenaꞌo bulli ta naboyich ittoshin shixxemminaꞌone; tunetaa ciirooch beddaahaa manjiꞌi kupphemmo wodemmone. 23Arooba ikke katemoochaa ittoshin boonoshi duꞌiigaata, bare katemooch maxxebote. Iberoon ittoshich gettoye: Ashi Bushoo waammi wottoon Israꞌeelee showeexi katemoo bulliich bedaachemmo ittoshine.
24“Dabbito biin dabbiitoyee, guuno bi doonoyee beshaanoone. 25Dabbito biin dabbiitochoommon, guuno bi doonochoommon tuno biich beddiye. Kechi doonon ‘Beelzebuli’#10:25 Beelzebuli, Sheexaanoo woyee daabiloosi ceekkeebeeti shigoone. boonoshi itoyee, bi kechi ashoon am shaahoon beshiiree getteeheete” iye.
Yeerin Shato
(Luqaasi 12:2-7)
26“Illa asheenaꞌon shattaahote; qereeto bulli gaxxeyoo, aacheeto bulliyoo aricho echeyaani mooyone. 27Qeroochaa ta gettaa beeton bullich xalla kichiree getote; shaashikkoona ittoshi waayeton asheenaꞌo bullich cookiree getote. 28Meenon wuxoyee damba kashoon wuxoo hakkaaneenaꞌon shattaahote. Tunetaa meenonaa kashoonon shiweree qaaqqoona aalliyoon hakkii beeton shatote. 29Gutte gaashikafeenaꞌo ikke duudena kechee beetaacheete? Tunebaani ittoshi Nihoo daaggaanoon boonoshi daggoochee ikkeyona qitaachemmine. 30Ittoshi qelli eexo bulliyona haddeetone. 31Illa shattaahote! Meeti gaashikafeenaꞌoyee beshoo ittoshine” iye.
Yesuusichon Ashi Aafoochaa Miixo
(Luqaasi 12:8-9)
32“Ashi aafoochaa taacho bi tunoon miixeebeeto bullich ta wotta shimaayooch beeti ta Nihoo aafoochaa taachone getiree miixemmo taane. 33Ashi aafoochaa taacho bi tunoon nookkemmo bullin ta wotta shimaayooch beeti ta Nihoo aafoochaa ‘Taacho toonoone’ getiree nookkemmo taane” iye.
Yesuusichi Naboona Asheenaꞌo Shaco
(Luqaasi 12:51-53; 14:26-27)
34“Ta waato, showee toommooch diggoon deeboyich ittoshich shaahaaye; ta waato ginoonalli diggoon deeboyich toonoone. 35Bushoon nihoona, busheen indeena, amaateen naamecheena tookki kaariyoyich waato taane. 36Ashich bi hajjee kechi asheenaꞌo etto tunemminaꞌone.#Mik. 7:6
37“Tayee beshiiꞌi bi nihoon woyee bi indeen shunniibeeto taacho tunoon hakkaache; ebiyoommon tayee beshiiꞌi bi bushoon woyee bi busheen shunniibeeto taacho tunoon hakkaache. 38Bi masqaloon shaaggiꞌi taan dabbaani asho koniyoona taacho tunoon hakkaache. 39Bi kasheen wodiyoyich qaawiibeeto muccemmone; tunebaani bi kasheen taacha iꞌi mucceebeeto, danemmone” iye.
Yesuusichi Asheenaꞌon Shunnii Beetinaꞌoyich Yeeri Wojjoo
(Maariqoosi 9:41)
40“Ittoshin shunniibeeto taan shunnii beetone; taanoo shunniibeeto taan deejjiti Yeerin shunnii beetone. 41Keemechon, keemecho bi tunetoyich shunniibeeto, keemechona tookki tate wojjoon danemmone; cadiqoon, cadiqo bi tunetoyich shunniibeeto, cadiqoona tookki tate wojjoon danemmone. 42Koniyoona hini gishiisheenaꞌoochee ikkoo ta dabboo bi tunetoyich gare aaconona immiibeeto, iberoon ittoshich gettoye, wojjoon mucceyaachemmone” iye.
Currently Selected:
Maatiyoosi 10: KBRC
Highlight
Share
Copy
Want to have your highlights saved across all your devices? Sign up or sign in
SIM International, 2020.