Maatiyoosi 7
7
Bareenaꞌo Toommooch Nalleechon Yesuusi Dojjoo
(Luqaasi 6:37-38,41-42)
1-2Wotta Yesuusi ishichiye: “Ashi gondoon ne haddii beetoommon Yeeri ne gondoon haddemmone; ashich ne qeellaa beetoommon Yeeri wochiree neech qeellemmone. Ebich Yeeri ne gondoon bi haddaachemmoyich, ashi gondoon haddiyaahine.
3“Ne aafooch giyiti xuggoon shalligaanoon amoyich ne manoo aafooch giyeti giisheche guudeen ciinnaa beetine? 4Wotta ne aafooch giyiti xuggoo beetaa, aabichaꞌa ne manoon ‘Eke ne aafeexi guudeen kichibona’ inne? 5Hini ne maacoon xalloo shaahiibeeti uroocho, shiichiree ne aafeexi xuggoon kichibe. Ebiyee gubb ne manoo aafeexi guudeen kichoyich manjiiree ciinnemmo neene.
6“Shiixxi wotteree ittoshin boonoshi shacaachemmoyich, yaafeeton kunaaneenaꞌoyich immaahote. Wotta gudininaꞌo boonoshi baatoona boonoshi neexaachemmoyich, ittoshi inqoon boonoshi aafooch duppaahote” iye.
Yeerin Qolleechon Yesuusi Dojjoo
(Luqaasi 11:9-13)
7“Yeerin qollebote; ittoshich immemmone. Yeer waanee qaawibote; danemmo ittoshine. Bi kelloonoo qofote; ittoshich qechemmone. 8Yeeri biin qolleebeeto bullich immemmone; qaawiibeeto bulliyoo bi waanee danemmone; bi kelloon qoppiibeeto bullichoo qechemmone.
9“Ittoshi daggoochee nihoo tuneechi koshon bi bushoo qolletaa, xaqqoon tiijjiree immehe? 10Haashoonoo bi qolletaa, dingeroon immehe? 11Gondo ittoshi tunetaanoona ittoshi bushiisheenaꞌoyich deꞌe mooyon imon ariibeeto ittoshine. Illa shimaayooch beeti ittoshi Nihoo Yeeri biin qollee beetinaꞌoyich deꞌe mooyon am shaahoon beshaa beshiiree immehe! 12Ebich ‘Asho taach tuniibe’ iꞌi ittoshi shunniibeeto bullin, ittoshiyoo wotta ebiyoommon bare ashich tuniibote. Ebin tuniyoona Muusichi Sheeroonaa keemechinaꞌona dojjiton ceechemmo ittoshine” iye.
Xebbe Kellee Shaahiyoon Yesuusi Geto
(Luqaasi 13:24)
13Yesuusi daakkiꞌi ishichiye: “Xebbe kelloona gibote; aallooch daammiibeeti kello gamino, gommoo naqqoone; are kelloona giyiibeeti asheenaꞌo meetinaꞌone. 14Tunetaa bulli yemeenee kashooch bechiibeeti kello xebboo, gommoo geppoone. Are gommon danee beetinaꞌo giishecheenaꞌone” iye.
Koote Keemechinaꞌochon Yesuusi Dojjoo
(Luqaasi 6:43-44)
15“Koote keemechinaꞌo waanee ittoshi qelloon quyebote. Bagoochoommon duuroo shaahibee ittoshi waan woyemminaꞌone; tunebaani boonoshi mullo kuxxii maabeeti okeroommone. 16Boonoshin ittoshi ariyemmo boonoshi shuunoonane. Ebiyoommon asheenaꞌo angixoochee woyinee aafoon, guccinoochee balaasee michi aafoon maceheete? 17Ebiyoo deꞌe mixo bulli deꞌe aafoon aafehe; gonde mixo gonde aafoon aafehe. 18Deꞌe mixo gonde aafoon aafo, gonde mixo deꞌe aafoon aafo hakkaache. 19Deꞌe aafoon aafeyaani mixo bullin kuxxii qaaqqooch duppiyeete. 20Ebich koote keemechinaꞌon ittoshi ariyemmo boonoshi shuunoonane” iye.
Nallaa Galleechon Yesuusi Dojjoo
(Luqaasi 13:25-27)
21“Shimaayooch beeti ta Nihoochi daaggoon ceechii beetoani, baad taan ‘Ta Doonocho, ta Doonocho!’ ii beeto bulli shimaajji taatittineech giyemmo toonoone. 22Nallaa gallooba meetinaꞌo taan ‘Ta Doonocho, ta Doonocho! Ne shigoona keemoon keemaano noone? Ne shigoona yinnoon ashi toommoochee yoohaano noone? Ne shigoona wodde gaakkechi mooyon shuuneyaano noone?’ gettemminaꞌone. 23Arooba ‘Hini hukkechinaꞌote, ta waanee wohote. Ittoshin cir ariyaano taane’ getiree boonoshich xalla gettemmo taane” iye.
Kechi Haggichi Shaahiyoon Yesuusi Geto
(Luqaasi 6:47-49)
24“Illa hini ta qaaroon waayeꞌi ceechiibeeto bulli, bi kexon manje xaqqee nashee toommooch haggiti mullechi uroommone. 25Amiyo kindiye; ambamboo tiyiye; yongo yongehe; are kexon xuqqiye. Tunetaa manje xaqqee nashee toommooch bi hakketoyich, dihaanoone. 26Wotta hini ta qaaroon waayeꞌi ceechaano bulli, bi kexon qacee toommooch haggiti mullaalli uroommone. 27Amiyo kindiye; ambamboo tiyiye; yongo yongehe; are kexon xuqqiye; bekkech are kexo gugummii dihiye” iye.
28Yesuusi hini yibbaatoon yibbaateꞌi bi ciichimmona, asheenaꞌo bi dojjiti doyoona worganeheete. 29Boonoshich bi dojjito sheeroon immiibeeti taatoochoommonalli, Muusichi Sheeree dojjechinaꞌo dojjii beetoommon toonoone.
Currently Selected:
Maatiyoosi 7: KBRC
Highlight
Share
Copy
Want to have your highlights saved across all your devices? Sign up or sign in
SIM International, 2020.