Maatiyoosi 6
6
Iriteeti Asheenaꞌon Gaacheechon Yesuusi Dojjoo
1“Yeerich ittoshi shuuneebeeti deꞌe shuunoon ashi beꞌenoyich ittoshi shuuneyaachemmoyich, ittoshi qelloon ariibote! Shimaayooch beeti ittoshi Nihoo Yeer waanee wojjoon cir daneyaachemmo ittoshine.
2“Ebich iriteeti ashich ne immaa beegaata, boonoshi maacoon xalloo shaahii beetinaꞌon shaahiyaahine. Boonoshiyoo ashi waanee galletee danoyich Ayihudeenaꞌo kiceebeeti kexonaa gommonoochaa iriteetinaꞌoyich immii beetinaꞌone. Iberoon ittoshich gettoye: Areenaꞌo ashi waanee galletoon danetinaꞌone; Yeer waanee amoonolla daneyaachemminaꞌone. 3Tunetaa iriteeti ashich ne immaa beegaata, ne katinooch beeti asholla beeggaaye. 4Aachiree imbe; arooba aashoona ne tunii beeton beeggiibeeti ne Nihoo Yeeri neech wojjemmone” iye.
Corooteechon Yesuusi Dojjoo
(Luqaasi 11:2-4)
5“Ittoshi corootii beegaata, boonoshi maacoon xalloo shaahiibeeti asheenaꞌochoommon tuneyaahote. Boonoshiyoo ‘Asheenaꞌo noon beegeete’ iꞌi Ayihudeenaꞌo kiceebeeti kexonaa gommi keejje kaattoonooch neexeechii corootoon shunnii beetinaꞌone. Iberoon ittoshich gettoye: Areenaꞌo boonoshi shuunoon deqqitinaꞌone. 6Tunetaa ne corootii beegaata, ne gatooch giyiree ne gifoon hiciichi bekkeyaani ne Nihoo Yeerich corootibe. Arooba aashoona ne tunii beeton beeggiibeeti ne Nihoo Yeeri neech wojjemmone. 7Aageteenaꞌo boonoshi yibbaatee genjoona Yeeri waayeebeeto boonoshich shaahii beetone. Tunetaa ittoshi corootii beegaata, boonoshichoommon aafaalli yibbaatoon yibbaateyaahote. 8Ittoshi Nihoo Yeeri ittoshi qolleyaan beetaa, ittoshich qaawii beeton arii beetone; ebich ittoshi boonoshin shaahiyaahote.
9“Illa ittoshi ishichi corootibote:
‘Shimaayooch beeti no Nihoocho, yaafe ne shigo oogebe.
10Ne taatittino bulli toommooch bede;
shimaayooch beetinaꞌo ne getoon boonoshi waayoommon,
ebiyoommon showooch beetinaꞌo waayebeete.
11Heeyi koshon hanaach nooch imbe.
12No wotta noon xuqqitinaꞌon no maaroommon,
no gondoon nooch maaribe.
13Gondoochi nihoo kishoochee noon quyeballi,
bi dachooch noon geddaahine.
[Taatittino, giidoo, oogee yiiroo
bulli yemeenoon neechone. Ameena.’]
14“Ebiyoommon asheenaꞌochi xuꞌoon ittoshi maarigaata, shimaayeexi ittoshi Nihoo Yeeri ittoshi gondoon maaremmone. 15Tunebaani ittoshin xuqqitinaꞌon ittoshi maaroo qayigaata, ittoshi Nihoo Yeeri ittoshi gondoon maaraachemmone” iye.
Coomeechon Yesuusi Dojjoo
16Daakkiꞌi Yesuusi ishichiye: “Ittoshi coomii beegaata, boonoshi maacoon xalloo shaahiibeeti asheenaꞌochoommon muusheneyaahote. Boonoshiyoo coomecho boonoshi tunoon asheenaꞌo beeggemmoyich boonoshi achoon shiimeyaaneenaꞌone. Iberoon ittoshich gettoye: Boonoshi shuunoon deqqitinaꞌone. 17-18Tunetaa ne coomii beegaata, coomecho ne tuno aricheyaachemmoyich ne aafoon machebe; ne qellooch huutebe. Arooba bekkeyaani ne Nihoo Yeeri ikkeeto baach arii beetone; ebich aashoona ne tunii beeton beeggiibeeti ne Nihoo Yeeri neech wojjemmone” iye.
Gijjoon Shimaayooch Kotiyeechon Yesuusi Dojjoo
19Daakkiꞌi Yesuusi ishichiye: “Piloonaa osheroona aalliyemmi, gaayeenaꞌo iiyiree gaajjemmi showee toommooch ittoshi gijjoon kiciyaahote. 20Tunebaani piloonaa osheroona aalliyaachemmooch, gaayeenaꞌo iiyiree gaayaachemmi shimaajji kexooch ittoshi gijjoon kicibote. 21Ne gijjoo beetooch ne mullo tunemmone” iye.
Ashittinee Ceecheechon Yesuusi Dojjoo
(Luqaasi 11:34-36)
22Daakkiꞌi ishichiye: “Ashittinee ceechoo geto aafoone. Illa ne aafo iiwoo tunegaata, ne ashittino bulli biremmone. 23Tunetaa ne aafo biiyegaata, ne ashittino bulli manderemmone. Illa ne waan beeti ashittinee ceechoo tahigaata, manderochi am shaahe magge manderoo tunehe?” iye.
Yeerinaa Gijjoonoyich Hajjeyeechon Yesuusi Dojjoo
(Luqaasi 16:13; 12:22-31)
24“Wotta gutte doonoyich hajjeyoon hakkemmo koniyoona aalloone. Ikkoon bi shunigaata, baroon shixxemmone; woyee ikkoon bi oogiigaata baroon hoxemmone. Ebich gijjoyich hajjeebeeti asho Yeerich hajjeyoon, wotta Yeerich hajjeebeeti asho gijjoyich hajjeyoon hakkaache.
25“Ebich ittoshich gettoye; ‘Amoon maayehone? Amoon uchehone? Amoon tahehone?’ getiree ittoshich qaawiibeeti mooyoyich xuuxeyaahote. Kasho maayoyee, ashittinoo tahoyee beshaache? 26Eke shimaajji kafeenaꞌon ciinote. Shoohaacheete, qecaacheete, gotooch gedaacheete. Tunetaa shimaayeexi ittoshi Nihoo Yeeri boonoshich maanjii beetone. Ittoshi boonoshiyee oogichii beshaachote? 27Ittoshi daggoochee xuuxeree bi neexooch ikke hiroon#6:27 Ikkikke wonnee Yaafe Macaafooch, “bi eenooch ikke qemon” getaa biichetone. daakkoon hakkemmo konine?
28“Tahoyich aakkiya xuuxee beetote? Eke gaddeexi mocee bungeenaꞌo aabichiꞌi boonoshi dicciibeeto gaata, manjiiree ciinote. Yulleyaacheete, huuttoon yokkeyaacheete. 29Tunetaa ittoshich gettoye: Taatoo Solomooniyolla ebi wodde bi oogee daggooch ikke mocee bungeechoommon taheyaanoone. 30Illa hanaach bekkeꞌi tiyii yaach qaaqqee gudooch dufaa micciibeeti gaddeexi mocoon Yeeri eechii tajjiibeeto bi tunegaata, hini Yeeri toommooch mulloon tooꞌiyaaneenaꞌote! Ittoshin aabichiree beshoon tajjoo qajjehe? 31Ebich ‘Amoon maayehone? Amoon uchehone? Amoon tahehone?’ getiree xuuxeyaahote. 32Eboshi bullin Aageteenaꞌo qaawii beetinaꞌone. Ebi bulli ittoshich qaawiibeeto bi tunoon shimaayeexi ittoshi Nihoo Yeeri arii beetone. 33Tunebaani shiichi Yeerichi taatittineen, bi cadiqoonoo qaawibote. Arooba ebi bullin bi ittoshich daakkemmone. 34Illa, yaach ittoshi toommooch woyemmi xuuxoyich yaach xuuxemmo ittoshine; ebich yaachich xuuxeyaahote. Hanaachi xuuxo hanaachich beddiye” iye.
Currently Selected:
Maatiyoosi 6: KBRC
Highlight
Share
Copy
Want to have your highlights saved across all your devices? Sign up or sign in
SIM International, 2020.