Maatiyoosi 5
5
Geppee Toommoochaa Yesuusi Asheenaꞌoyich Dojjoo
1Yesuusi dofee asheenaꞌon beeggiꞌi geppooch kechii kotehe. Arooba bi dabbeenaꞌo bi waan giddeheete. 2Ishichiꞌi boonoshinaa bare asheenaꞌonoyich dojjiye.
Diireechon Yesuusi Dojjoo
(Luqaasi 6:20-23)
3“Ayaanoona girechinaꞌo diireetinaꞌone;
shimaajji taatittine boonoshichine.
4Tuummii beetinaꞌo diireetinaꞌone;
Yeeri boonoshin goggiyemmone.
5Gaꞌi deꞌeenaꞌo diireetinaꞌone;
showoon woraashemminaꞌne.
6Yeeri aafooch cadiqoon tunoyich,
oogichii qaatii beetinaꞌo diireetinaꞌone;
Yeeri boonoshi qaatiton ceechemmone.
7Ariqqee beetinaꞌo diireetinaꞌone;
Yeeri boonoshich ariqqemmone.
8Mulli xalleenaꞌo diireetinaꞌone;
Yeerin boonoshi aafoona beeggemminaꞌone.
9Shunii beetinaꞌo diireetinaꞌone;
‘Yeerichi bushiisheenaꞌone’ getaa ceekkemminaꞌone.
10Cadiqe shuunoon boonoshi shuunetoyich duꞌee beetinaꞌo diireetinaꞌone;
shimaajji taatittine boonoshichine.
11“Ta naboyich ittoshin boonoshi naageteenoo, boonoshi duꞌiiteenoo, gonde mooyon ittoshi toommooch koottiꞌi boonoshi yibbaateteenoo diireeto ittoshine. 12Yeeri ooge wojjoon shimaayoochaa ittoshich immemmo bi tunetoyich, emiribote; emiroona wucwucote. Ittoshiyee aaf beeti keemechinaꞌon ebiyoommon duꞌiitinaꞌone” iye.
Kiihonaa Bekkoonochi Shaahiyoo
(Maariqoosi 9:50; Luqaasi 14:34-35)
13“Showee toommooch beeti asheenaꞌo bullich ittoshi kiihoommo ittoshine. Tunebaani kiiho noocon bi qayigaata, amoona noociyeheete? Maaxooch kichi boonoshi dufaa, baatoona neecheyehalli, gubbich amoonolla gaacaache.
14“Alemoyich bekko ittoshine. Geppee toommooch beeti katemoo aashoon hakkaache. 15Wotta ceechoon ceechiꞌi bi toommooch gafetoon guuppemmo koniyoona aalloone; tunebaani kechi daggooch beetinaꞌo bullich bi bekkemmoyich, bekkooch kotiiheete. 16Ebiyoommon asheenaꞌo ittoshi deꞌe shuunoon beegiree shimaayooch beeti ittoshi Nihoo Yeerin boonoshi galletemmoyich, bekkoochoommon asho bullich bekkebote” iye.
Muusichi Sheereechon Yesuusi Dojjoo
17Wotta Yesuusi ishichiye: “Ta waato Muusichi Sheeroonaa keemechinaꞌo dojjiti mooyonon echiyoyich ittoshich shaahaaye; ceechiyalli echiyoyich waataano taane. 18Iberoon ittoshich gettoye: Showoonaa shimaayoona beshemmi wottoon Muusichi Sheeroo bulli ceenaanoon nappeyoommi mooyiyolla showooch hollaachemmine. 19Illa Yeeri tuniibote iꞌi bi gettiti hini sheereenaꞌoochee ikke giishecheyichona ‘Deꞌa getaache’ ii bareenaꞌonoo ‘Deꞌa gettaahote’ iꞌi dojjiibeeti asho koniyoona shimaajji taatittineechaa bulliyee desho tunemmone; tunetaa deꞌa ii beetonaa bareenaꞌon ‘Deꞌa getote’ iꞌi dojjii beetona koniyoona shimaajji taatittineechaa oogo tunemmone. 20Andoo ellebote! Ittoshi cadiqittino Muusichi Sheeree dojjechinaꞌonaa Fariseenaꞌonochi cadiqittinoyee beshoo bi qayigaata, shimaajji taatittineech ciroona giyaachemmo ittoshine” iye.
Kaareechon Yesuusi Dojjoo
(Luqaasi 12:57-59)
21“Ebiyee aaf beeti no qaabbechinaꞌoyich ‘Ashoon wuxiyaahine; wuxito bulli toommooch nalloo kindemmone’#Key. 20:13; Yibba. 5:17 getteeton waayeto ittoshine. 22Tunebaani and ta waanee waayebote! Bi manoon kaareebeeto#5:22 Ikkikke wonnee Yaafe Macaafooch, “nabaalloon” ii beeto beetone. bulli nallee gabberooch giddemmone; bi manoon ‘Ulloocho!’ iꞌi naaggimmo bulli nallee iitee aafoochaa bi toommooch nalleyemmone; ‘Mullaalli ongoocho!’ iꞌi naaggimmo bulli ‘Shiweree qaaqqooch duppebe’ getaa bi toommooch nalleyemmone.
23“Illa ne deejjoon deejjee gudee toommooch Yeerich giddiyoyich qanniibee, ne manoo neenna ayiniti mooyo beemon ne gabigaata, 24are deejjee gudee aafooch deejjoon gediichi shiichi hamiree biinna tookki shunebe; ebiyee gubb wotteree ne deejjoon Yeerich giddiibe.
25“Ne kaarecho ukkiroo waan neen bi daamigaata, kaateree gommoochaa shunebe. Ebi tuno qayigaata, ukkiroyich neen beshii immemmone; ukkiroo bi ginee naayoyich immemmone; ginee naayo cuyee kexooch neen giijjemmone. 26Iberoon neech gettoye: Ciireexi duudenona ne qoccemmi wottoon ciroona aroochee keyaachemmo neene” iye.
Shunee Mamichon Yesuusi Dojjoo
27Daakkiꞌi Yesuusi ishichiye: “ ‘Shunoon maayaahine’#Key. 20:14; Yibba. 5:18 getteeton waayeto ittoshine. 28Tunebaani and ta waanee waayebote! Maacheen ciinniꞌi qaatito bulli bi mulloona biinna tookkii shunoon maatone. 29Ebich ne qanne aafo axaaxoo ne shuunemmoyich naboo bi tunegaata, kichiree dufe. Ne ashittino bulli shiweree qaaqqooch bi duppeyoyee ne ashittinoochee ikkoo shappi gaata gaawiye. 30Ne qanne kishoo axaaxoo ne shuunemmoyich naboo bi tunegaata, kuxiree dufe. Ne ashittino bulli shiweree qaaqqooch duppeyoyee ne ashittinoochee ikkoo shappi gaata gaawiye” iye.
Mecheen Gawukkeechon Yesuusi Dojjoo
(Maatiyoosi 19:8-9; Maariqoosi 10:11-12; Luqaasi 16:18)
31“ ‘Bi mecheen gawukkiibeeto bulli bi gawukkee koorichoon biich imbe’#Yibba. 24:1-4 getteetone. 32Tunebaani and ta waanee waayebote! Shunimaaye tuneyaani bi mecheen gawukkiibeeto bulli shunimaaye bi tunemmoyich tuniitone; gawukkeetinoo shaaggiibeeto shunoon maatone” iye.
Wogeechon Yesuusi Dojjoo
33“Wotta ebiyee aaf beeti no qaabbechinaꞌoyich ‘Wogaꞌa Yeerich ne mookketon ceechiballi shappiiyaahine’#Lew. 19:12; Had. 30:2; Yibba. 23:21 getteeton waayeto ittoshine. 34Tunebaani and ta waanee waayebote! Ne mookkoon wogoona cir mookkeyaahine. Shimaayoona getiree wogeyaahine; Yeerichi taatittinee xaaꞌoone. 35Showoona getiree wogeyaahine; Yeerichi baatoo neexxiibeeti xaaꞌoone. Yerusaalemina getiree wogeyaahine; bulliyee beshe Taatoo Yeerichi katemoone.#Isi. 66:1; Shod. 48:2 36Ne qelloona wogeyaahine; ikke eexin naccee woyee aaꞌi tuniyoon hakkaachine. 37Tunebaani tunemmon tunebe, tuneyaachemmon tuneyaache gete. Ebiyee baroon ne yibbaategaata, aroo gondoochi nihoo waaneeniye” iye.
Nichee Kicheechon Yesuusi Dojjoo
(Luqaasi 6:29-30)
38Yesuusi daakkiꞌi ishichiye: “ ‘Koniyoona bare ashi aafoon bi dookkigaata, bi aafo dooge; ebiyoommon ashi gashoon bi tiishigaata, bi gasho tiishebe’#Key. 21:24; Lew. 24:20; Yibba. 19:21 getteeton waayeto ittoshine. 39Tunebaani and ta waanee waayebote! Ittoshi toommooch gondoon shuuneebeeto toommooch nichoon kichiyaahote. Tunebaani ne qanne gaakkoon tappemmoyich yoochoon bajjaahine. 40Wotta ukkiroo toommooch neen taggeꞌi, ‘Ne kootoon taach imbe’ immoyich ne kutoon daakkiree imbe. 41Wotta ginechinaꞌo daggoochee ikkoo ‘Ikke kiilo meetiree wottoon ta qiicoon shaage’ iꞌi neen bi yeshigaata, hachee ikkoon daakkiree hambe. 42Neen qollee beetoyich imbe; ne waanee eretteya qaawii beetoyich bajjaahine” iye.
Bi Shixechon Shunnichon Yesuusi Dojjoo
(Luqaasi 6:27-28,32-36)
43“ ‘Neenoommi ne manoon shune; ne ettoon shixe’#Lew. 19:18 getteeton waayeto ittoshine. 44-45Tunebaani and ta waanee waayebote! Yeeri bi halliti aabeen deꞌeenaꞌonaa gondeenaꞌonoyich kichii beetone; kaameenaꞌonaa xummeenaꞌonoyich tachiꞌi amiyon dichii beetone. Illa shimaayooch beeti ittoshi Nihooyich bushiishoo ittoshi tunemmoyich, ittoshi shixechinaꞌon shunote; ittoshin duꞌii beetinaꞌoyich corootibote. 46Ittoshin shunnii beetinaꞌon baach ittoshi shunigaata, Yeer waanee amee wojjoon danehote? Gabiyee guudeenaꞌo#5:46 Gabiyee guudeenaꞌo, qarexoon maciibeeti asheenaꞌone. ebin tuniyaacheete? 47Ittoshi maneenaꞌon baach diggiibeeto ittoshi tunegaata, bareenaꞌoyee amoona beshehote? Yeerich qeyaaneenaꞌolla ebin tunii beetinaꞌone. 48Illa shimaayeexi ittoshi Nihoo Yeeri deꞌo bi tunetoommon, ittoshiyoo wotta deꞌoon tunebote” iye.#Lew. 19:2; Yibba. 18:13
Currently Selected:
Maatiyoosi 5: KBRC
Highlight
Share
Compare
Copy
Want to have your highlights saved across all your devices? Sign up or sign in
SIM International, 2020.
