Maatiyoosi 4
4
Daabiloosi Yesuusin Gondoon Shuuniiya Qiico
(Maariqoosi 1:12-13; Luqaasi 4:1-13)
1Yesuusi aacona bi afaalleetoyee gubb, daabiloosi Yesuusin gondoon shuuniiya bi qiiccemmoyich, Yaafe Ayaano barahooch biin daammiye. 2Aroochaa aabbe areddoonaa aabbe xumoonon bi coomitoyee gubb shaacehe. 3Arooba daabiloosi giddeꞌi, “Yeerichi Bushoo ne gaata, hini xaqqeenaꞌon ‘Koshon tunebote’ gete” iye.
4Yesuusiyoo wochiꞌi, “ ‘Asho Yeerichi noonoochee kechiibeeti qaaro bullinalli, kosho ikkeetona kashoona beetaachemmone’#Yibba. 8:3 getaa Yaafe Macaafooch kooreetone” iye.
5Ebiyee gubb, daabiloosi Yesuusin yaafe katemoo Yerusaalem daammii, yaafee kechi guummooch kichii neechiꞌi ishichiye:
6“ ‘Yeeri neen boonoshi quyemmoyich
bi maraakeenaꞌon ne waan deejjemmone;
ne baatoonolla xaqqo bi yexaachemmoyich,
boonoshi kishoona neen tiijjemminaꞌone’#Shod. 91:11-12
getaa Yaafe Macaafooch kooreetone. Ebich Yeerichi Bushoo ne gaata, eke, hiniichee dugilla awureeree kindibe” iye.
7Yesuusiyoo “Wotta ‘Asho bulli “Eke, Doono Yeeri taan bi wodiyoon beegona” getiree gondoon shuunaaye’#Yibba. 6:16 getaa Yaafe Macaafooch kooreetone” iye.
8Aroochee daabiloosi Yesuusin genje guudi toommooch daammiye; alemooch beeti taatee showoo bullinaa boonoshi oogee yiiroonon bekkiiꞌi, 9“Taach yittaꞌa ne goyinnegaata, eboshi bullin neech immemmo taane” iye.
10Arooba Yesuusi daabiloosin “Hini Sheexaanoocho! Ta aafoochee wohe! ‘Doono Yeerich goyinnebe; biich baach maddebe’#Yibba. 6:13 getaa Yaafe Macaafooch kooreetone” iye.
11Areegaata daabiloosi Yesuusin qajjii hammiye. Aroochee maraakeenaꞌo giddeꞌi Yesuusin deggiyeete.
Yeerichi Mishiraachee Wochoon Yesuusi Geto
(Maariqoosi 1:14-15; Luqaasi 4:14-15)
12Yesuusi Yowannisi yeshaa cucheyoon waayeꞌi Galiilee showooch tiyii hammiye. 13Naazireeti katemoon qajjiꞌi Zebuloonee showoonaa Nifitaalee showee daggoonooch Galiilee baharee gashooch beeti Qifirinaahi katemooch hammii kotehe. 14Ebi tuneto, Yeeri keemechi Isiyaasi noonoona gettito ceennemmoyichiye. Ebiyoo:
15“Hini Zebuloonee showoonaa Nifitaalee showoonooch,
baharee gashooch beeti showooch,
Yoordaanoosi aachee beqach beeti showooch,
wotta dofee Aageteenaꞌo beeti Galiila,
16manderooch koteti ittoshi oogeti bekkoon beeggito ittoshine;
qitee yiiroo beeti showooch koteti ittoshich bekko bekketone”#Isi. 9:1-2
ii beetone.
17Aroobee yemeenoochee tiijjiꞌi Yesuusi “Shimaajji taatittinee ittoshi kellooch shaggetine; ebich axaaxee gommoochee Yeer waan wottebote” iibee getooch giyiye.
Haashe Yeshe Awudde Asheenaꞌon Yesuusi Ceego
(Maariqoosi 1:16-20; Luqaasi 5:1-11)
18Yesuusi Galiilee baharee gashoona besheebee gutte maneenaꞌo Pheexiroosi getteebeeti Simooninaa Indiriyaasinon ciinniye; boonoshi shuunoo haashee yesho bi tunetoyich dabboon baharooch duppii beeheete. 19Biyoo “Ta hillooch wobote; haashoon ittoshi yeshoommon ashoon yeshiree ta waan ittoshi deebemmoyich tuniyemmo taane” iye. 20Boonoshiyoo bekkech dabboon duppiichii biin dabbiyeete.
21Aroochee Yesuusi besheꞌi bareenaꞌo Zebidiyoosi bushiishoo tuneti gutte maneenaꞌo Yaaqobinaa Yowannisina boonoshi nihoo Zebidiyoosina tookkii giishi markabee toommoochaa dabboon boonoshi shippii beetaa ciinniye; boonoshinoo ceeggiye. 22Boonoshiyoo bekkech giishi markabeen, wotta boonoshi nihoonoo arooch duppiichii Yesuusin dabbii hammiyeete.
Biiyetinaꞌon Yesuusi Wodiyoo
(Luqaasi 6:17-19)
23Ebiyee gubb, Yesuusi Ayihudeenaꞌo kiceebeeti kexoochaa dojjiibee, Yeerichi taatittinee mishiraachee qaaroon gettiibee, biiyo bulliichee asheenaꞌon wodiibee, Galiilee showoo bullina guuddii beehe. 24Arooba bi mooyo Sooriyee showoo bulliich waayeehe. Ebich asheenaꞌo baribare biiyoonaa xuuxoona xuuxeꞌi beetinaꞌo bullin, yinno boonoshi toommooch beetinaꞌon, duppiibeeti biiyechinaꞌon, boonoshi ashittino qititinaꞌon eboshi bullin bi waan deebiyeete; boonoshinoo Yesuusi wodiihe. 25Arooba Galiilee, Aashire Katemoochee,#4:25 Aashire Katemoo bi getteto, ebi showooch aashire katemeenaꞌo beetoyichiye. Yerusaalemee, Yihudee, Yoordaanoosi aachee beqachee waati dofee asheenaꞌo biin dabbiyeete.
Currently Selected:
Maatiyoosi 4: KBRC
Highlight
Share
Compare
Copy
Want to have your highlights saved across all your devices? Sign up or sign in
SIM International, 2020.
