Maatiyoosi 27
27
Yesuusin Cuchiꞌi Phelaaxoos Waan Boonoshi Daamo
(Maariqoosi 15:1; Luqaasi 23:1-2; Yowannisi 18:28-32)
1 Dechara maaddoona qeeshee ukkireenaꞌonaa showee geeneenaꞌona bulli Yesuusin wuxoyich echeeheete. 2Cuchiꞌi daammii iraashoo Phelaaxoosich beshiiꞌi immiyeete.
Bi Kishoona Yihudi Taaqqee Qitoo
(Mishiraachechinaꞌo 1:18-19)
3Arooba Yesuusin beshiiꞌi immiti Yihudi Yesuusi toommooch kinditi qitee nalloon beeggiꞌi ayiniye; shaashe xure birewoon qeeshee ukkireenaꞌonaa showee geeneenaꞌonoyich wochiꞌi tiyii, 4“Xalle uroon qitoyich beshii ta immetoyich, xuqqeto taane” iye.
Boonoshiyoo “Noon amo qaaqqiye? Aroo ne qelli mooyone” iyeete.
5Arooba Yihudi birewoon yaafee kexooch duppiichii kechii hammii bi kishoona taaqqee qitiye.
6Aroyee gubb qeeshee ukkireenaꞌo birewoon tiijjiꞌi, “Kashee gatiyoone; ebich no sheeroo yaafee kechi gijjee daggooch no baccemmoyich daaggaache” iyeete. 7Echeeꞌi nuuqqee hachecho showoon kemeꞌi dallaaweenaꞌoyich maashoon tuniiheete. 8Ebich are showoo hanaach beddaahaa Damee Showoo getteehe. 9Arooba keemechi Erimiyaasi gettiti keemo ceenniye; ebiyoo “Israꞌeelee macceenaꞌo daggoochee ikkikkeenaꞌo gatiyoo boonoshi yexxiti shaashe xure birewoon daammiyeete. 10Doono Yeeri taach gettitoommon, are gijjoona nuuqqee hachecho showoon kemeheete”#Erim. 32:6-9; Zaka. 11:12-13 bi itone.
Phelaaxoosi Aafooch Yesuusi Neexo
(Maariqoosi 15:2-5; Luqaasi 23:3-5; Yowannisi 18:33-38)
11Arooba Yesuusi Yihudee iraashoo aafooch neexehe; Yihudee iraashoo “Ne Ayihudeenaꞌochi taatoo neene?” iꞌi echehe.
Yesuusi wochiꞌi, “Newolla gettaa beetine” iye.
12Qeeshee ukkireenaꞌonaa showee geeneenaꞌona bi toommooch taggoon yaaqqiyeete; Yesuusi minnakanna getaanoon qajjiye. 13Arooba Phelaaxoosi tiyiꞌi, “Ambiche taggoon ne toommooch boonoshi taggeebeeto gaata waayeyaachine?” iꞌi echehe. 14Iraashoo oogichiꞌi worganemmi wottoon minnakanna getaanoon cikkii qajjiye.
Qitee Nalloo Yesuusi Toommooch Nalleyoo
(Maariqoosi 15:6-15; Luqaasi 23:13-25; Yowannisi 18:39–19:16)
15-19Wotta Yihudee iraashoo nati natona hini baaree aabooba asheenaꞌo biishe iꞌi qollemmi ikke uroon cucheꞌi beetinaꞌo daggoochee biichi doyoo biich beetone. Arooba Barbaani getteebeeti ikke aricheti uro cucheꞌi beehe. Phelaaxoosi Ayihudee ukkireenaꞌo Yesuusin beshii boonoshi immito qanaateꞌi bi tunoon ariibeeto bi tunetoyich, dofee asheenaꞌo kiceeꞌi beetaa tiyiꞌi, “Barbaaninaa Kiristoosi getteebeeti Yesuusinoochee konin biishote? Aabi biicheyoon shunniyote?” iꞌi echehe.
Aroochee Phelaaxoosi nallee gabberooch koteꞌi bi beetaa, bi mechee “Yichi xum gumona hini are uroon beeggaꞌa bi naboona oogichaꞌa xuuxoon beeggeti taane; ebich ebi xalle uro toommooch gondoon shuuneyaahine” iyaꞌa bi keno waan wochoon daachiihan.
20Tunebaani qeeshee ukkireenaꞌonaa showee geeneenaꞌona “Barbaani biichebe; Yesuusi qitibe” getiree boonoshi qollemmoyich dofee asheenaꞌon kocciyeete.
21Aree hillooch iraashoo wochinnoon echeꞌi, “Hini gutteenaꞌoochee aabin ta biishon shunniyote?” iye.
Boonoshiyoo “Barbaanin biishe” iyeete.
22Phelaaxoosi “Illa hini Kiristoosi getteebeeti Yesuusin aabichibote?” iye.
Boonoshi bulli wochiꞌi, “Yoode!” iyeete.
23Phelaaxoosiyoo “Amoyichiye? Bi gondochi amoone?” iꞌi echehe.
Tunetaa boonoshi wochiꞌi, “Yoode!” iꞌi caagee cangecheheete.
24Phelaaxoosiyoo hukkoon tiijjoyee beshetaa amolla gaacaallo bi tunoon beeggiꞌi, “Hini uroochi damoochee ta xalloo taane; ittoshi, ittoshi qelloon ariibote!” iꞌi dofee asheenaꞌo aafoochaa aacon tiijjii bi kishoon machehe.
25Asheenaꞌo bulli wochiꞌi, “Bi damoo noonnaa no bushiishoonochi toommooch tunebe” iyeete.
26Arooba Phelaaxoosi Barbaanin biichiichii Yesuusin arengoona bi xoobbiitoyee gubb, bi yooddeyemmoyich beshii immiye.
Yesuusin Ginechinaꞌo Coono
(Maariqoosi 15:16-20; Yowannisi 19:2-3)
27Arooba iraashoochi ginee naayinaꞌo Yesuusin iraashoochi kibbooch daammiyeete. Echeti boonoshi guuphinaꞌo bullin bi beetooch ceeggii kiciyeete. 28Bi qoreddoon shoottiichii ceelle tahoon tajjiyeete. 29Angixonoo gengiꞌi bi qellooch taatee malletoon tuneti gubbichoon ukiiheete; bi qanne kishooch shimeree gumboon yechiiheete; bi aafooch guteneꞌi, “Ayihudeenaꞌochi taatoocho, ne taatittino manjibe” iibee cooneheete; cudonoo bi toommooch cuddiyeete; 30gumboon bi kishoochee deqqiꞌi aroona bi qelloon wochii wochii xoobbiyeete. 31Eechiꞌi boonoshi coonetoyee gubb boonoshi tajjiti ceelle tahoon shoottiichii, biichon tajjiꞌi yoodoyich daammiyeete.
Yesuusi Yooddeyoo
(Maariqoosi 15:21-32; Luqaasi 23:26-43; Yowannisi 19:17-27)
32Yerusaalemee kechiꞌi Simooni getteebeeti Qerenechi uroona daneheete; biinoo “Yesuusichi masqaloon shaage” iꞌi yechiyeete. 33Golgooti getteebeeti xaaꞌooch shaggiyeete; Golgooti geto “Qellee Koofee Xaaꞌoo” getone. 34Aroochaa miraaroo bacceeti woyinee uyoon uye iꞌi Yesuusich immiyeete; tunebaani nappheꞌi tiyii, uyaache iꞌi qajjiye.#Shod. 69:21 35Masqalee toommooch biin boonoshi yoodditoyee gubb, bi tahoon ixoon duppiꞌi qoodeeheete.#Shod. 22:18 36Aroochee koteꞌi biin quyee beeheete. 37“Hini Yesuusi Ayihudeenaꞌochi Taatoone” getaa kooreeti taggee malletoon biyee tookk xogiyeete. 38Arooba biinna tookkii gutte bokkeenaꞌon ikkoon bi qanne badd, ikkoonoo bi yooche badd yooddiyeete. 39Aroona besheebeeti gommechinaꞌo boonoshi qelloon shuurikkiibee Yesuusin naageheete. 40“Yaafee kexon happiichi wochiree keejje qemona haggeshocho! Eke ne qelloon wodiibe! Yeerichi Bushoo ne gaata, masqalee toommoochee kindibe!” iyeete.
41Ebiyee wotta qeeshee ukkireenaꞌo Muusichi Sheeree dojjechinaꞌonaa geeneenaꞌona tookkii cooneebee ishichiyeete: 42“Bareenaꞌon wodiito bi qelloon wodiyoo mawiihe! Israꞌeelee taatoo bi gaata, eke and masqaloochee kindibe. Bi kindi gaata, biin iberiyemmo noone. 43Yeerin gibenetone; wotta ‘Yeerichi Bushoo taane’ itone. Illa Yeeri biin shunniibeeto bi tunegaata, and wodiibe” iyeete.#Shod. 22:8 44Arooba biinna tookkii yooddeti bokkeenaꞌo wotta asheenaꞌo naagetoommon naageheete.
Yesuusi Qitoo
(Maariqoosi 15:33-41; Luqaasi 23:44-49; Yowannisi 19:28-30)
45Aree hillooch haree shiritte saatoochee tiijjiꞌi yiixiye saato beddimmi wottoon showoo bulli manderehe. 46Yiixiye saatooch, Yesuusi “Eloohe, Eloohe! Lamaa sabaqitaani?” iꞌi bi qaaroon oogichiꞌi cookiye. Ishi geto “Ta Nuggishoocho, ta Nuggishoocho, amoyich taan qajjenne?”#Shod. 22:1 getone.
47Areegaata arooch neexee beetinaꞌoochee ikkikkeenaꞌo waayeꞌi, “Hini uro Eliyaasin ceeggii beetone” iyeete.
48Bekkech are asheenaꞌoochee ikkoo woccii hammii, isponjoona kiikkere woyinee uyoon hacciꞌi deebii shimeree gumboona bi noonooch giddiiꞌi uchiye. 49Tunetaa bareenaꞌo “Eke qaye; Eliyaasi waaree biin bi wodiyemmo gaata, beegone” iyeete.
50Aree hillooch Yesuusi wochinnoon oogichiꞌi bi cookitoyee gubb bi kasho abbetehe.
51Arooba yaafee kexooch tippeeti maccillaatoo dambee tiijjiꞌi desh beddaahaa gutte badd kappheeꞌi keexee kechiye; showee qewahan; xaqqee guudinaꞌoo gaaheheete. 52Maashee oppeenaꞌo qecheeheete; qititi yaafeenaꞌoochee meetinaꞌo kashecho tuneꞌi tiyiyeete. 53Maasheenaꞌoochee kechiꞌi Yesuusi qitoochee bi tiyitoyee gubb yaafe katemoo Yerusaalem hammii giyiꞌi meeti asheenaꞌoyich bekkeheete.
54Areegaata balle ginee iraashoonaa biinna tookkii Yesuusin quyee beetinaꞌona showee qewoonaa tuneti mooyonon beeggiꞌi, “Iberoon hini uro Yeerichi Bushoone!” iꞌi oogichii shattiyeete.
55Yesuusin degoyich Galiilee showoochee biin dabbiti wodde genneenaꞌo arooch wokkii neexeechii ciinnii beeheete. 56Boonoshi daggooch Magidalechi Maariyami, Yaaqobinaa Yooseefinochi indee Maariyami, Zebidiyoosi mechee eboshi beetinaꞌone.
Yesuusi Duukko
(Maariqoosi 15:42-47; Luqaasi 23:50-56; Yowannisi 19:38-42)
57Aroochee womikkoo wottetaa, Yooseefi getteebeeti gaannechi uro Arimaati katemoochee waahe; biyoo wotta Yesuusichi dabboone. 58Arooba Phelaaxoosi aafooch giddeꞌi, “Yesuusichi cahoon taach imbe” iꞌi qollehe.
Phelaaxoosiyoo bi ginechon imbe iꞌi gettiye.
59Ebina Yooseefi Yesuusichi cahoon daammiꞌi andire kaafenoona kaappiye; 60xaqqee guudoochee bi qellich gooshiiꞌi bi shuuniiti oppooch daammii arooch duukkiye. Wotta ooge xaqqoon gederikkiꞌi are oppee kelloon hicciichii hammiye. 61Arooba Magidalechi Maariyaminaa guttinnee Maariyamina oppee ciinooch koteꞌi beeheete.
Maashee Oppoon Phelaaxoosi Quyiyoo
62 Dechara Ayihudeenaꞌochi qanniyee aabo tunetoyee gubb, qeeshee ukkireenaꞌonaa Fariseenaꞌona Phelaaxoos waan kiceeheete. 63Kiceeꞌi ishichiyeete: “Doonocho, are ashoon dawushoona muriciyecho qitaanoon beebee, ‘Keejje qemoyee gubb qitoochee tiyemmo taane’ bi iton shalligito noone. 64Illa bi dabbeenaꞌo waaree bi cahoon boonoshi gaayaachemmoyich, ‘Qitoochee tiyitone’ getiree boonoshi getaachemmoyich, ‘Oppo keejje qemooch beddaahaa quyeebe’ gete. Ebi tuno qayigaata, gubbi muriciyoo aafichoyee beshoon gondemmone” iyeete.
65Phelaaxoosi “Kellechinaꞌon daami neechibote; hamiree ittoshi hakkimmi wottoon quyiibote” iye. 66Ebich kellechinaꞌon daammiꞌi oppee kello keppheeti xaqqooch maatemoon geddiꞌi manjii hicciꞌi oppoon quyiiheete.
Currently Selected:
Maatiyoosi 27: KBRC
Highlight
Share
Copy
Want to have your highlights saved across all your devices? Sign up or sign in
SIM International, 2020.