Maatiyoosi 26
26
Yesuusi Wuxeyemmi Gommon Boonoshi Qaawoo
(Maariqoosi 14:1-2; Luqaasi 22:1-2; Yowannisi 11:45-53)
1Yesuusi hini mooyinaꞌo bullin gettii ciichiꞌi tiyii, bi dabbeenaꞌon 2“Gutte qemoyee gubb Beshee Baaroo bi tunoon ariibeeto ittoshine; Ashi Bushoon yooddiyoyich beshiiree immemminaꞌone” iye.
3Arooba qeeshee ukkireenaꞌonaa showee geeneenaꞌona Qeyaafi getteebeeti qeeshee guudoochi kibbooch kiceeheete. 4Yesuusin maroona yechiyoyich, wuxiyoyichoo echeeheete. 5Tunetaa “Hini baaree aaboona tunaaye; asheenaꞌo kaaroon tiijjemminaꞌone” iyeete.
Ikke Ure Gaawe Shittoon Yesuusi Toommooch Ukkoo
(Maariqoosi 14:3-9; Yowannisi 12:1-8)
6Arooba Yesuusi Bitaaniya, qeddee shaddee biiyoona biiyeꞌi woditi#26:6 Giriikee Yaafe Macaafo, “Qeddee shaddee biiyechi” iye. Simooni kexooch beehe. 7Are kexoochee biich maayo giddetaa madee toommooch bi beetaa, ikke ure alibaxiroosi firiqaadee ceeni, aaxxoo tuneti, gaawe cinnechi shittoon yechaꞌa bi waan waahan. Waa firiqaadoon tiichaꞌa are shittoon Yesuusichi shimbooch ukkiyan.
8Bi dabbeenaꞌo ebin beeggiꞌi kaareheete: “Hini shittoon cikkaa bi duubiibeeto amoyichiye? 9Ebi shitto aaxxe gatiyoona kemaa girechinaꞌoyich amoyich icheyaache?” iyeete.
10Yesuusiyoo hini boonoshi yibbaatoon ariiꞌi boonoshich ishichiye: “Hini ureen amoyich iritii beetote? Biyoo taach deꞌe shuunoon shuunetine. 11Girechinaꞌo bulli aaboon ittoshina tookkiiniye boonoshi beeto; tunetaa ta bulli aaboon ittoshina tookki beetaachemmo taane. 12Hini ure ta duukkeyaan beetaa, shiichaꞌa ta ashittinoon hini shittoona huuttetine. 13Andoo iberoon ittoshich gettoye: Asheenaꞌo hini mishiraachoon boonoshi gettimmi showee toommo aabiichona biin shalligoyich aree shuuneton wotta gettemminaꞌone” iye.
Yesuusin Beshiiꞌi Imoyich Yihudi Koceyoo
(Maariqoosi 14:10-11; Luqaasi 22:3-6)
14Ebiyee gubb, aaraa gutte bi dabbeenaꞌoochee ikkoo tuneti Asqorootechi Yihudi, qeeshee ukkireenaꞌo waan hammiꞌi, 15“Yesuusin ittoshich ta beshii imigaata, taach amoon immehote?” iꞌi echehe. Boonoshiyoo shaashe xure birewoon biich immiyeete. 16Aroobee saatoochee tiijjiꞌi “Yesuusin aabichiree beshii imbote?” iibee beshiiree bi immemmi holloon qaawii beehe.
Bi Dabbeenaꞌona Tookkii Yesuusi Gifiroon Mamo
(Maariqoosi 14:12-21; Luqaasi 22:7-14,21-23; Yowannisi 13:21-30)
17Shittoo Giyaani Kochi Baaree batti batti aabooba bi dabbeenaꞌo Yesuus waan giddeꞌi, “Beshee Baaree maayoon ne maayemmoyich aabiich no qanniyoon shunnenne?” iꞌi echeheete.
18Arooba Yesuusi “Katemooch hamiree ikkaati kexooch ‘Dojjecho “Ta taajjee aabo shaggitone; ta dabbeenaꞌona tookki ne kexoochaa Beshee Baaroon baaremmo taane” itone’ getote” iye. 19Aroochee bi dabbeenaꞌo hammiꞌi Yesuusi gettiton tuniiheete; Beshee Baaree maayoonoo qanniiheete.
20Showoo xumetaa, Yesuusi aaraa gutte bi dabbeenaꞌona tookkii madoo giddetaa maaya kotehe. 21Maa boonoshi beetaa, “Iberoon ittoshich gettoye: Ittoshi daggoochee ikkoo taan beshiiree immemmone” iye.
22Ebi mooyona ayiniꞌi boonoshi qelli qelloona “Ta Doonocho, ta tunehote?” iꞌi Yesuusin echooch giyiyeete.
23Yesuusi wochiꞌi, “Taan beshiiree immemmo taanna tookkii ikke shaatooch dukkee beetone. 24Ashi Bushoo biicho bi kooreetoommon, qitemmone; tunebaani Ashi Bushoon beshiiree immemmi are uroyich woowo! Are uro shiijjeyaanoon bi dooggito gaata, biich gaawiye” iye.
25Beshii immemmi Yihudi wochiꞌi, “Dojjechocho, ta tunehote?” iꞌi echehe.
Yesuusi wochiꞌi, “Ne noonoona gettetine” iye.
Yesuusichi Meenonaa Damoonochi Shalligichoo
(Maariqoosi 14:22-26; Luqaasi 22:14-20; 1 Qorontoosi 11:23-25)
26Aree hillooch boonoshi maa beetaa, Yesuusi koshon tiijjiꞌi Yeerin galletehe; tiichiꞌi bi dabbeenaꞌoyich immiibee, “Haꞌote, mamote; hini ta meenone” iye.
27Wotta woyinee uyo yechiti xoofoon tiijjii Yeerin galleteꞌi boonoshich immiye; boonoshichoo ishichiye: “Bulla ebiichee uyote; 28ebi meetinaꞌochi axaaxoon maaroyich ufemmi ta damoo Yeeri neechemmi wogee malletoone. 29Andoo ittoshich gettoye: Ta Nihoochi taatittineechaa ittoshina tookki hini woyinee aafoochee andiroon ta uchemmi aabee wottoon hini woyinee uyoochee guttinnoon uyaachemmo taane” iye.
30Boonoshiyoo Yeerichi shoddoon boonoshi shoddetoyee gubb tiyiꞌi, Zayitee Michi guudooch kechiꞌi hammiyeete.
Pheexiroosi Biin Nookkemmo Tunoon Yesuusi Geto
(Maariqoosi 14:27-31; Luqaasi 22:31-34; Yowannisi 13:36-38)
31Arooba Yesuusi bi dabbeenaꞌoyich ishichiye:
“ ‘Yeeri “Qiddoon xoobbemmo taane;
bageenaꞌo shacemminaꞌone” iꞌi gettitone’#Zaka. 13:7
getaa kooreetone; ebich hanaach xum ittoshi bulli taan qajjemmo ittoshine. 32Tunebaani qitoochee ta tiyetoyee gubb, ittoshiyee shiichiree Galiila hammemmo taane” iye.
33Arooba Pheexiroosi tiyiꞌi, “Bareenaꞌo bulli neen boonoshi qayi gaatoona, ta neen cir qayaache” iye.
34Yesuusi “Iberoon neech gettoye: Hanaach xum baakkoo kuukkaahaa, keejje wottoon taan nookkemmo neene” iye.
35Pheexiroosi wochiꞌi, “Qitolla bi tunegaata, neenna tookki qitehani cir neen nookkeyaache” iye. Echeti bi dabbeenaꞌo bulli ebiyoommon gettiyeete.
Getesemaanaa Yesuusi Corootoo
(Maariqoosi 14:32-42; Luqaasi 22:39-46)
36Arooba Yesuusi bi dabbeenaꞌona tookkii Getesemaani getteebeeti xaaꞌooch hammiye. Yesuusi boonoshin “Ta okk ebiich hamiree corootibona; ittoshi hiniich beebote” iye. 37Pheexiroosinaa Zebidiyoosichi gutte bushiisheenaꞌonon dabbiiꞌi hammiye. Bi kasho keyaano giyaano yullehe. 38Boonoshin “Ta kashe ayinoona xuuxaꞌa kech beddetine. Hiniich beebote; tokketaayi kuppheree taanna tookki quyebote” iye.
39Boonoshi aafoochee giishechoon wokkiꞌi hammiye. Baroona guufeechii corootiibee, “Ta Nihoocho, tunesho gaata, hini xuuxee xoofoon ta waanee wokkiibe. Tunetaa ne daaggoo tunebaani, ta daaggoo tunaaye” iye.
40Aroochee keejje bi dabbeenaꞌo waan wotteꞌi bi waahaa, tokketeꞌi beetinaꞌon danehe. Pheexiroosinoo “Illa taanna tookkii ikke saatoonona tokketeyaanoon kuppheꞌi quyoon hakkaachote? 41Gondoochi nihoo dawushooch ittoshi giyaachemmoyich, kuppheree quyebote; corootibote. Asho bi mulloona deꞌoon shuunoyich gabii beetone; tunetaa meenoyich yiingoo aalloone” iye.
42Wotta guttinnoon hammiꞌi corootiibee, “Ta Nihoocho, hini xuuxee xoofoon uyo taach bi qaawiigaata, ne daaggoo tunebe” iye.
43Guttinnoon wotteꞌi bi waahaa, geepphirona daadeeꞌi tokketee boonoshi beetaa danehe. 44Wotta boonoshi waanee qajjii hammiꞌi, keejjinnoon wochiꞌi shiichii bi corootitoommon corootiye.
45Aroochee bi dabbeenaꞌo waan wottee waaꞌi, “Andoo batt tokketee kasheꞌiniye ittoshi beeto? And saato bedditone; Ashi Bushoon axaaxechinaꞌoyich beshiiree immemminaꞌone. 46Tibote, hambone! Andoo taan beshiiree immemmo shaggitone!” iye.
Yesuusi Yecheyoo
(Maariqoosi 14:43-50; Luqaasi 22:47-53; Yowannisi 18:3-12)
47Yesuusi ishin yibbaatee bi beetaa, bekkech aaraa gutteexi ikkoo Yihudi shaggiye. Biinna tookkii dofee asheenaꞌo goraadoonaa yeelloonon#26:47 Yeello qelloochaa qullechi ginee qiicoone; ikkikkoochaa bi cillooch xuuroo woyee shaawusho xogee beetone. yechiꞌi waaheete. Boonoshiyoo qeeshee ukkireenaꞌonaa showee geeneenaꞌona waanee wochetaa waatinaꞌone. 48Yesuusin beshii immiti Yihudi, “Diggiiree ta shummemmo aroone; aroon yeshote” iꞌi shiichii malletoon boonoshich immitone. 49Yihudi bekkech Yesuus waan giddeꞌi, “Dojjechocho, diggoo neech tunebe” iꞌi shummiye.
50Yesuusiyoo “Ta xiboocho, amee mooyoyich waanne?” iye.
Arooba Yihudi deebiti asheenaꞌo giddeꞌi Yesuusin yechiyeete. 51Bekkech Yesuusina tookkii beetinaꞌo daggoochee ikkoo bi goraadoon kaaccii daachiiꞌi qeeshee guudoochi guuno waamon karii kindiihe.
52Arooba Yesuusi biich ishichiye: “Goraadoon kaaccii beetinaꞌo bulli goraadoona qitemminaꞌone; ebich ne goraadoon bi gonenooch wochibe. 53Ebiyoommo gaata, ta Nihoon qollo taan mawemmo neech shaahii beete? Ta qolletaa, bekkech aaraa gutte Legiyoonee#26:53 Ikke Legiyoono, shiritte hum bede Roomi ginee naayinaꞌon yechitone. maraakeenaꞌoyee beshoon taach deejjeshone. 54Ishigaata, Yaafe Macaafoochaa ‘Ebi tunemmone’ getteeto aabichiree ceennehe?” iye.
55Arooba Yesuusi dofee asheenaꞌoyich “Bokkoon yeshoommon taan yecha goraadoonaa yeelloonon yechiꞌi waahote? Yaafee kexooch bulli aaboon kotaꞌa dojjaa ta beehooba, taan yeshaano ittoshine. 56Tunebaani ebi bulli bi tuneto, keemechinaꞌo kooriti Yaafe Macaafee qaaro bi ceennemmoyichiye” iye. Arooba bi dabbeenaꞌo bulli biin duppiichii aalleheete.
Ayihudee Nallechinaꞌo Aafooch Yesuusi Neexo
(Maariqoosi 14:53-65; Luqaasi 22:54-55,63-71; Yowannisi 18:13-14,19-24)
57Aroochee Yesuusin yechitinaꞌo Muusichi Sheeree dojjechinaꞌonaa showee geeneenaꞌona kiceeti qeeshee guudo Qeyaaf waan daammiyeete. 58Arooba Pheexiroosi qeeshee guudoochi kibbooch beddaahaa wokkiibee biin dabbiye. “Moochi tuggoon beegona” iꞌi uxeree maac giyiꞌi kellechinaꞌona tookkii kotehe.
59Arooba qeeshee ukkireenaꞌonaa kaacheti Ayihudee nallechinaꞌo bullina Yesuusin wuxiiya bi toommooch koote miixeenaꞌon qaawiyeete. 60Tunebaani meeti koote miixeenaꞌo giddetaanona, biin wuxiyemmi miixoon miixemminaꞌon daneyaaneenaꞌone.
Ciiroochaa gutte miixeenaꞌo giddeꞌi, 61“Hini uro ‘Yeerichi yaafee kexon happiichi keejje qemona baroon hagon hakkiyoye’ itone” iyeete.
62Aree hillooch qeeshee guudo tiyiꞌi Yesuusin “Ebi ne toommooch miixee beetinaꞌoyich noonoo wochaachemmo neene?” iꞌi echehe. 63Tunetaa Yesuusi cikkii qajjiye.
Wotta qeeshee guudo “Ne Yeerichi Bushoo Kiristoosi ne gaata, nooch ne gettemmoyich beeyechi Yeerina neen yecheto taane” iye.
64Yesuusi wochiꞌi, “Ne getteto neene; tunebaani ittoshich gettoye: Ebiyee damba Ashi Bushoo Giidechi Yeerichi qanne badd bi kotetaa, wotta shimaajji qubee toommoochoo koteree bi waataa beeggemmo ittoshine”#Daan. 7:13 iye.
65Arooba qeeshee guudo bi tahoon keexxiꞌi, “Yeerin naaggitone; ebiyee damba amee miixoo qaawiihe? Bi naagoon gaata waayeto ittoshine. 66Illa ittoshich amo shaahii beete?” iꞌi echehe.
Boonoshiyoo “Qita beddiye” iꞌi wochiyeete.
67Arooba bi aafooch cuddiyeete; biinoo tukeheete; bareenaꞌo wotta tappeebee, 68“Kiristooso, neen tappeto konine? Eke keemecho ne gaata, nooch gete” iyeete.
Pheexiroosi Yesuusin Nookko
(Maariqoosi 14:66-72; Luqaasi 22:56-62; Yowannisi 18:15-18,25-27)
69Pheexiroosi kechi maach, kibbooch kotee bi beetaa, ikke shaajjetee bi waan giddaꞌa, “Ne wotta Galiilechi Yesuusina tookkaa beeto neene” iyan.
70Tunetaa Pheexiroosi wochiꞌi, “Ne gettaa beeton ariyaache” iꞌi bulli aafooch nookkehe.
71Ishichiꞌi tiyii kecha kellooch bi hammimmona, bare shaajjetee ciinnaꞌa arooch beetinaꞌoyich “Hini uro Naazireetechi Yesuusina tookkii beetone” iyan.
72Pheexiroosiyoo wogeebee, “Are uroon ariyaano taane” iꞌi guttinnoon nookkehe.
73Giishechoon yiccimiꞌi arooch neexee beetinaꞌo bi waan giddeꞌi, “Ne yibbaatoona arichaa beetine; iberoon ne boonoshi daggeexo neene” iyeete.
74Arooba Pheexiroosi “Are uroon ariyaano taane” iꞌi bi kashoon uppii wogehe.
Bekkech baakkoo kuukkiye. 75Pheexiroosi “Baakkoo kuukkaahaa, keejje wottoon taan nookkemmo neene” Yesuusi iti qaaroon gabiꞌi maaxooch kechii tiittee eeppiye.
Currently Selected:
Maatiyoosi 26: KBRC
Highlight
Share
Copy
Want to have your highlights saved across all your devices? Sign up or sign in
SIM International, 2020.