Maatiyoosi 28

Qitoochee Yesuusi Timo

(Maariqoosi 16:1-10; Luqaasi 24:1-12; Yowannisi 20:1-10)

1Shambetoo beshetoyee gubb, shabaattee batti batti aaboobee#28:1 Shabaattee batti batti aabo Oogishambetoone. maaddoona, haree gaargaarooch, Magidalechi Maariyaminaa bare Maariyamina oppoon beegga maasho beetooch hammiyeete.

2Diqqoona oogeti showee qewo tunehe; Doonochi maraakoo shimaayoochee kindii xaqqoon maashee oppee kelloochee gederikkiꞌi aree toommooch kotehe. 3Maraakoochi aafo xeeyoochoommon phaqqiibeeto, bi taheti tahoo kecho naccoommon naccoone. 4Maashee oppoon quyeebeeti ginechinaꞌo maraakoon beeggiꞌi oogichii boonoshi keqqitoyich qeweheete; qititi ashoonoo shaahiyeete.

5Hini are maraakoo genneenaꞌoyich ishichiye: “Haanoshite, shattaahote. Yoodaa qititi Yesuusin ittoshi qaawoon ariibeeto taane. 6Bi noonoona bi gettitoommon tiyitone! Hiniich aalloone; bi cahoo qeyiti xaaꞌoo ebiyoche waaree beegote. 7Andoo kaate hiniichee hamiree, ‘Qitoochee tiyitone; ebiyoche, Galiila ittoshiyee shiichiree hammemmone; aroochaa biin beeggemmo ittoshine’ getiree bi dabbeenaꞌoyich getote; ta waato ebin gettane” iye.

8Genneenaꞌoo boonoshi shattitaa, oogichii emiriibee afaafinoona oppee xaaꞌoochee tiyiꞌi Yesuusi dabbeenaꞌoyich getta woceheete. 9Wocona hammii boonoshi beetaa, diqqoona Yesuusi boonoshina daneꞌi boonoshin diggiihe. Boonoshiyoo giddee bi baatoon yechiꞌi biich goyinneheete. 10Aroochee Yesuusi “Shattaahote! Hamiree ta maneenaꞌo Galiila boonoshi beshemmoyich getote. Aroochaa taan beeggemminaꞌone” iye.

11Genneenaꞌo hamooch boonoshi beetaa, oppoon quyeebeeti ginechinaꞌo daggoochee ikkikkeenaꞌo katemooch hammiꞌi tuneto bullin qeeshee ukkireenaꞌoyich gettiyeete. 12Qeeshee ukkireenaꞌoo showee geeneenaꞌona tookkii kicee echeeꞌi, ginee naayinaꞌoyich wodde gijjoon immiꞌi, 13“ ‘Tokketooch no beetaa, bi dabbeenaꞌo xumoona waaꞌi gaajjii daammiyeete’ getote. 14Ishi iraashoo Phelaaxoosich waayee gaata, gondo ittoshicho tunee qayon no gettemmo noone; ittoshi toommooch iritoo waataachemmoyich tuniyemmo noone” iyeete. 15Ginechinaꞌoo gijjoon deqqiꞌi boonoshich getteetoommon tuniiheete. Ebiyoo Ayihudeenaꞌo waan hanaach beddaahaa yibbaatee beetone.

Aaraa Ikke Bi Dabbeenaꞌoyich Yesuusi Bekko

(Maariqoosi 16:14-18; Luqaasi 24:36-49; Yowannisi 20:19-23; Mishiraachechinaꞌo 1:6-8)

16Ebiyee gubb, aaraa ikke Yesuusichi dabbeenaꞌo bi gettiti Galiilee showooch beeti geppooch hammiyeete. 17Aroochaa biin beeggiꞌi goyinneheete; tunebaani boonoshi daggoochee ikkikkeenaꞌo shaammiyeete. 18Yesuusi boonoshi waan giddeꞌi boonoshich ishichii gettiye: “Showoonaa shimaayoonooch beeti ukkirittino bulli taach ichetone. 19-20Illa tiyiree hambote; aageteenaꞌo bulliich beetinaꞌon Nihoo Yeeri, Bushoo Yeerinaa Yaafe Ayaanoonochi shigoona aacona afaalloonaa tuniibote iyaꞌa ittoshich ta getteto bullin boonoshich dojjoona ta dabbeenaꞌon tuniibote. Illa yemeenee ciirooch beddaahaa bulli aaboon ta ittoshina tookkaa beeto taane” iye.

Currently Selected:

Maatiyoosi 28: KBRC

Highlight

Copy