Maatiyoosi 25
25
Aashire Gidiideenaꞌochi Shaahiyoo
1Daakkiꞌi Yesuusi ishichiye: “Ashi Bushoo woyemmi aabooba shimaajji taatittine ebin shaahemmine: Aashire gidiideenaꞌo boonoshi ceechoon ceechiꞌi woꞌee kenoon giijjiya kechiyeete. 2Boonoshi daggoochee uucheenaꞌo mullechinaꞌo, uucheenaꞌo mullaalleenaꞌone. 3Mullaalleenaꞌo boonoshi ceechoon yechiꞌi tiyii boonoshi ceechoona tookkii bare ceechee zayitoon yeshaanoon kechiyeete. 4Tunetaa mullechinaꞌo boonoshi ceechoonaa wotta qulloona bare ceechee zayitoonon yechiꞌi kechiyeete. 5Woꞌee keno yagitoyich, boonoshi bullin geepphiro yeshaa tokketeheete.
6“Xumi gutte qellimooch ‘Ebiyoche, woꞌee keno waa beetone; keyiree giijjibote’ immi cookoon waayeheete.
7“Areegaata gidiideenaꞌo tokketoochee tiyiꞌi boonoshi ceechoon qanniiheete. 8Mullaalleenaꞌo mullechinaꞌon ‘No ceechoo tahiya ii beetone; ebich ittoshi ceechee zayitoochee nooch imbote’ iyeete.
9“Tunetaa mullechinaꞌo wochiꞌi, ‘Nooch beeti ceechee zayito noonnaa ittoshinoyich bedo bi qayigaatoche? Ebiyee hamiree kemmii beetinaꞌo waanee ittoshi qellich kemebote’ iyeete.
10“Kemeya boonoshi hammiichaa, woꞌee keno waahe. Qanniꞌi beeti uucheenaꞌo biinna tookkii gaaree kexooch giyiyeete; kello bekkech tuggeehe.
11“Gubb echeti uuche gidiideenaꞌo waaꞌi, ‘Doonocho, doonocho! Nooch qechibe’ iyeete.
12“Tunetaa woꞌee keno wochiꞌi, ‘Iberoon ittoshich gettoye, ta cir ittoshin ariyaano taane’ iye.
13“Illa Ashi Bushoo woyemmi aaboonaa saatoonon ariyaano ittoshine; ebich qanniree quyebote” iye.
Keejje Wochee Bushiisheenaꞌochi Shaahiyoo
(Luqaasi 19:11-27)
14“Wotta shimaajji taatittine ebiyoommine: Ikke uro bare showooch hamma tiyiꞌi bi wochee bushiisheenaꞌon ceeggiꞌi biich beeti bi gijjoon boonoshich immiye. 15Boonoshi hakkee wottoon boonoshi qelli qelloona qoodiꞌi ikkoyich uuche makilitoon,#25:15 Ikke makilito shaashaa awudde kiilo giraamee xure birewa bedoone. ikkoyichoo gutte makilitoon, ikkoyichoo ikke makilitoon immiichii bare showooch tiyii hammiye. 16Uuche makilitoon deqqito daammii giixeꞌi bare uuche makilitoon shiijjiye. 17Wotta gutte makilitoon deqqito ebiyoommon tuniiꞌi bare gutte makilitoon shiijjiye. 18Tunebaani ikke makilitoon deqqito daammii oppoon iijjiꞌi bi doonochi gijjoon duukkiye.
19“Meeti agenoyee gubb hini wochee bushiisheenaꞌochi doono wottee waaꞌi, ‘Ta gijjoon amoon tuniitote?’ iꞌi echehe. 20Uuche makilitoon deqqito giddeꞌi bare uuche makilitoona tookkii immiꞌi tiyii, ‘Ta doonocho, uuche makilitoon taach immeto neene; ebiyoche, bare uuche makilitoon shiijjito taane’ iye.
21“Doono ‘Gaawiye, hini deꞌe gibeneeti wochee bushoocho! Giishechoona ne gibeneetoyich, woddiiree neen ukkiriyemmo taane. Ta emiroochee giyiree qoodeebe’ iye.
22“Wotta gutte makilitoon deqqito giddeꞌi, ‘Ta doonocho, gutte makilitoon taach immeto neene; ebiyoche, bare gutte makilitoon shiijjito taane’ iye.
23“Doono ‘Gaawiye, hini deꞌe gibeneeti wochee bushoocho! Giishechoona ne gibeneetoyich, woddiiree neen ukkiriyemmo taane. Ta emiroochee giyiree qoodeebe’ iye.
24“Ikke makilitoon deqqito wotta giddeꞌi, ‘Ta doonocho, ne shoohaanoochee qeccaabeeto, ne shacaanoochee macaabeeti maacmanjoo ne tunoon ariibeeto taane. 25Ebich shattaꞌa ne waanee ta deqqeti makilitoon daammaa iijjaꞌa showooch duukkehoye. Ebiyoche, ne makilitoon neech wochiya deebeto taane’ iye.
26“Doono wochiꞌi ishichiye: ‘Hini gonde yeexere wochee bushoocho! Ta shoohaanoochee ta qecon, ta shacaanoochee ta macoon ariito neene. 27Ishigaata, ta gijjoon giixechinaꞌoyich amoyich imaachine? Tawoo waaꞌa ta gijjoon amoyich shimona tookkii deꞌaachote?’ iye.
28“Arooba doono bare wochee bushiisheenaꞌoyich ‘Andoo hini makilitoon bi kishoochee tiijjiree aashire makilitechoyich imbote. 29Beetoyich daakkaa ichemmone; biichoo woddemmone. Tunetaa amolla aallo waanee biich beeti giishechewolla tiijjeyemmine. 30Hini gaacaalli wochee bushoon maach manderooch kichi dufote. Aroochaa eefonaa gashee qaayona tunemmone’ iꞌi gettiye” iye.
Nallaa Galleechon Yesuusi Geto
31“Ashi Bushoo bi oogee yiiroona maraakeenaꞌo bullina tookki waaree oogee yiiroo beeti bi taatee qeenooch kotemmone. 32Aagetee asheenaꞌo bulli bi aafooch kiceyemminaꞌone. Qiddoo bageenaꞌon emmisheenaꞌo daggoochee bi barbariyoommon boonoshi bullin barbariyemmone. 33Bageenaꞌon bi qanne badd, emmisheenaꞌon bi yooche badd neechemmone.
34“Taatoo qanne badd beetinaꞌoyich ishichemmone: ‘Hini ta Nihoo diiritinaꞌote, wobote! Yeeri alemoon bi hallitoochee tiijjiꞌi ittoshich bi qanniiti taatittineech giyiree woraashibote! 35Ta shaacetaa, maanjito ittoshine; ta shachewetaa, uchito ittoshine; dallaawaꞌa ta waataa, iibbiito ittoshine; 36ta tubbetaa, tajjito ittoshine; ta biiyetaa, cacheeto ittoshine; ta cuchetaa, echeto ittoshine’ gettemmone.
37“Arooba cadiqeenaꞌo wochiree biich ishichemminaꞌone: ‘No Doonocho, ne shaacetaa beeggaꞌa aatooba maanjitone? Ne shachewetaa beeggaꞌa aatooba uchitone? 38Dallaawoo ne tunetaa beeggaꞌa aatooba iibbiitone? Ne tubbetaa beeggaꞌa aatooba tajjitone? 39Ne biiyetaa woyee ne cuchetaa beeggaꞌa aatooba ne waan waatone?’ gettemminaꞌone.
40“Taatoo wochiree, ‘Iberoon ittoshich gettoye: Bulliyee desho tuneti hini ta maneenaꞌoochee ikkoyichona ittoshi tuniito taach tuniyoommone’ gettemmone.
41“Arooba yooche badd beetinaꞌoyich ishichemmone: ‘Hini uppeetinaꞌote, daabiloosinaa bi maraakeenaꞌonoyich qanniti bulli yemeenoon tahaani shiweree qaaqqooch ta waanee hambote! 42Ta shaacetaa, maanjaano ittoshine; ta shachewetaa, uchaano ittoshine; 43dallaawaꞌa ta waataa, taan iibbiyaano ittoshine; ta tubbetaa, tajjaano ittoshine; ta biiyetaa, ta cuchetaa, echeyaano ittoshine’ gettemmone.
44“Boonoshiyoo wochiree, ‘Doonocho, ne shaacetaa woyee ne shachewetaa woyee dallaawoo ne tunetaa woyee ne tubbetaa woyee ne biiyetaa woyee ne cuchetaa, aatooba beeggaꞌa neen degaano qajjoone?’ gettemminaꞌone.
45“Arooba ‘Iberoon ittoshich gettoye: Bulliyee desho tuneti eboshi daggoochee ikkoyichona ittoshi tuniyee qayo taach tuniyee qayone’ getiree wochemmone.
46“Boonoshiyoo bulli yemeenee shiwerooch, cadiqeenaꞌo wotta shimaajji taatittineech giyiree bulli yemeenoon beeyemminaꞌone” iye.
Currently Selected:
Maatiyoosi 25: KBRC
Highlight
Share
Copy
Want to have your highlights saved across all your devices? Sign up or sign in
SIM International, 2020.