Maatiyoosi 24

Yaafee Kechi Happeyeechon Yesuusi Geto

(Maariqoosi 13:1-2; Luqaasi 21:5-6)

1Ebiyee gubb, Yesuusi yaafee kexoochee kechiꞌi hammii bi beetaa, bi dabbeenaꞌo yaafee kechi xaqqee kexon biich bekkiyoyich bi waan giddeheete. 2Tunetaa biyoo wochiꞌi, “Eboshi bullin beeggii beetote? Iberoon ittoshich gettoye: Hini xaqqeenaꞌo happeyaanoon xaqqo xaqqee toommooch keddeeree ebina beetaachemminaꞌone” iye.

Yemeenee Ciiree Malleteechon Yesuusi Geto

(Maariqoosi 13:3-13; Luqaasi 21:7-19)

3Wotta Yesuusi Zayitee Michi guudi toommooch kotee bi beetaa, bi dabbeenaꞌo boonoshi ikkeeto bi waan giddeꞌi, “Eke nooch gete: Hini mooyo bi tunemmo aatane? Ne womonaa yemeenee ciiroonon bekkiyemmi malletoo amoone?” iꞌi echeheete.

4Yesuusi wochiꞌi boonoshich ishichiye: “Asho koniyoona ittoshin bi muriciyaachemmoyich, ittoshi qelloon quyebote. 5Meetinaꞌo ‘Taane Kiristoosi’ getibee ta shigoona waaree meeti asheenaꞌon muriciyemminaꞌone. 6Ginee koyoonaa ginee woroonon waayemmo ittoshine; tunetaa keqqiyaahote. Ebi tuno echeyaachemmone. Tunebaani yemeenee ciiro battiye. 7Arooba ikke aageteexi asho bare aageteexi ashoona, ikke showeexi taatoo bare showeexi taatoona koyemmone; baribare xaaꞌoochoo shaacoo giyemmone; showee qewo tunemmone. 8Ebi bulli bi bekkiibeeto, batt maaxee xuuxee gimoniye.

9“Arooba ittoshin xuuxiyemminaꞌoyich beshiiree immemminaꞌone; wuxemminaꞌone; ta naboyich aageteenaꞌo bulli ittoshin shixxemminaꞌone. 10Arooba meetinaꞌo taan qajjemminaꞌone; boonoshinaa boonoshina ikkoo ikkoon beshiiree immemmone; boonoshinaa boonoshina shixeyemminaꞌone. 11Meeti koote keemechinaꞌo tiyemminaꞌone; meetinaꞌonoo muriciyemminaꞌone. 12Axaaxoo woddetaa, meeti asheenaꞌochi shuno aqqemmone. 13Tunetaa ciirooch beddaahaa manjiꞌi kupphemmo wodemmone. 14Ashi yaroo bullich miixoo bi tunemmoyich hini Yeerichi taatittinee mishiraachee qaaro showee toommo bulliich getteyemmone; arooba yemeenee ciiro woyemmone” iye.

Aalloon Deebemmi Eeꞌeechon Yesuusi Geto

(Maariqoosi 13:14-23; Luqaasi 21:20-24)

15Yesuusi daakkiꞌi ishichiye: “Illa keemechi Daaneeli gettiti aalloon deebemmi eeꞌo Yaafe Xaaꞌooch bi neexetaa beeggemmo ittoshine.#Daan. 9:27; 11:31; 12:11 (Ebiyooba shemmecho shalligibe.) 16Arooba Yihudee showooch beetinaꞌo geppoo beetooch maxxebeete. 17Kechi toommooch beeto ‘Kindiree kexooch beeti ta qiicoon deebona’ getiree giyaaye. 18Goyee toommooch beeto ‘Ta qoreddoon deebona’ getiree gubb wottaaye. 19Arooba yeqqefechinaꞌonaa bushoon xaachii beetinaꞌonoyich woowo! 20Tunebaani ittoshi gooyo yooyooba woyee shambetooba bi tuneyaachemmoyich corootibote. 21Arooba Yeeri alemoon hallitoochee tiijjiꞌi hanaach beddaahaa bekkeyaani, gubbich wotta bekkeyaachemmi giidechi xuuxo tunemmone.#Daan. 12:1 22Ebi aabeenaꞌo qaminaan gaata, koniyoona wodoon hakkaacheshone; tunebaani kaachetinaꞌoyicha getaa ebi are aabeenaꞌo qaminnitinaꞌone. 23Arooba koniyoona ittoshich ‘Hini beege! Kiristoosi hiniich beetone’ woyee ‘Okk ebiich beetone’ bi getigaata, iberiyaahote. 24‘Taane Kiristoosi’, wotta ‘Taane keemecho’ getibee muriciyemminaꞌo tiyemminaꞌone. Boonoshiyoo ‘Nooch bi hakkeegaata Yeeri kaaccitinaꞌon muriciibone’ getibee worganikkiti malletoonaa gaakkechi shuunoonon shuunemminaꞌone. 25Illa ittoshich ishichiꞌa getteto taane.

26“Illa arooba ‘Ebiyoche, barahoochiye’ boonoshi getigaata, kechaahote. ‘Ebiyoche, kechi gatoochiye’ boonoshi getigaata, iberiyaahote. 27Xeeyo aabi-keyoochee xeejjiꞌi aabi-gimooch beddaahaa phaqqii bi bekkoommon, Ashi Bushoo womo ebiyoommon tunemmone. 28Dubeno beetooch aakkeenaꞌo kiceyemminaꞌone” iye.

Ashi Bushoo Womichon Yesuusi Geto

(Maariqoosi 13:24-27; Luqaasi 21:25-28)

29Wotta Yesuusi ishichiye: “Ebiyooba ebi are xuuxoyee gubb,

‘Aabe bekkech manderemmine;

ageneyoo aaxxeyaachemmine;

xojjeneenaꞌo shimaayoochee hollemminaꞌone;

shimaajji giideenaꞌo shuuremminaꞌone.’#Isi. 13:10; 34:4

30“Arooba Ashi Bushoo malletoo shimaayoochaa bekkemmone; arooba showooch beeti ashi yareenaꞌo bulli ‘Woowo!’ gettemminaꞌone. Ashi Bushoo giidoonaa oogee yiiroona shimaajji quboona waataa beeggemminaꞌone.#Daan. 7:13 31Arooba ooge tiree qaaroona maraakeenaꞌon wochemmone. Boonoshiyoo hamiree awudde kelloona aabi-keyoochee aabi-gimooch, showee tuggooch beddaahaa Yeeri kaaccitinaꞌon kicemminaꞌone” iye.

Balaasee Mixo Bekkiyemmi Malletoo

(Maariqoosi 13:28-31; Luqaasi 21:29-33)

32“Wotta balaasee mixoochee malletoon beegote. Balaasee mixo quummiꞌi atee bi waajjegaata, arooba qaawoo womon ariibeeto ittoshine. 33Ebiyoommon wotta hini mooyinaꞌo tunoon ittoshi beegiyooba Ashi Bushoo womo katinniꞌi kellooch shaggito bi tunoon ariibote. 34Iberoon ittoshich gettoye: Hini mooyinaꞌo bulli tuneyaanoon hini shiijjeroo besheyaachemmone. 35Showoonaa shimaayoona beshemmone; tunebaani ta qaaro besheyaachemmone” iye.

Are Aaboonaa Are Saatoonon Koniyoona Ariyee Qayo

(Maariqoosi 13:32-37; Luqaasi 17:26-30,34-36)

36Wotta Yesuusi ishichiye: “Tunetaa are aaboonaa are saatoonon Nihoo Yeeriyee damba koniyoona ariibeeto aalloone. Shimaajji maraakeenaꞌo tunebeeta, Yeerichi Busholla tuneba ariibeeto aalloone. 37Wonnee Noohi yemeenooba bi tunoommon, Ashi Bushoo womo ebiyoommon tunemmone. 38Arooba aalliyee aacoyee aaf Noohi markabooch bi giyimmi aabee wottoon asheenaꞌo maa uchiibee, shaaggii shaakkiibee beeheete. 39Aalliyee aaco waaꞌi asho bullin hidiꞌi bi aalliimmi wottoon boonoshi ariyee qayoommon, Ashi Bushoo womo wotta ebiyoommon tunemmone.#Hal. 6:1–7:24 40Arooba gutte asheenaꞌo goyooch beeyemminaꞌone; ikkoo yeshaa hammemmone; ikkoo echemmone. 41Gutte maacheenaꞌo xaqqoon yiikke beeyemminaꞌone; ikkee yeshaa hammemmine; ikkeyoo echemmine.

42“Illa ittoshi Doono amee aabooba bi woyemmo gaata ariyaachote. Ebich qaalliree quyebote. 43Tunebaani ebin ariibote: Kechi doono gaayo xumee ambiche saatooch bi woyemmo gaata ariyaanoone; bi ariito gaata, qaalliree quyeshone; bi kexonoo gaayoona iichiyaacheshone. 44Ebich ittoshi wotta qanniree beebote. Ashi Bushoo ittoshi shalligaani saatooch woyemmone” iye.

Gibeneeti Wochee Bushoo Tuno

(Luqaasi 12:41-48)

45“Illa maayoon boonoshich qaawiimmi saatoona bi immemmoyich bi doono bi kechi asheenaꞌo toommooch bi ukkiriiti gibeneeti mullechi wochee bushoo konine? 46Bi doono waahaa, bi shuunee toommooch beebee danemmi are wochee bushoo diireetone. 47Iberoon ittoshich gettoye: Biich beeto bulli toommooch ukkiriyemmone. 48Tunetaa are gonde wochee bushoo ‘Ta doono kaate wotteyaachemmone; yagemmone’ ii bi mulloona gabiꞌi, 49biinoommi wochee bushiisheenaꞌon yexooch, mashechinaꞌona tookkii uchii mamooch bi giyigaata, 50bi doono bi gabaani aabooba, bi ariyaani saatooch woyemmone. 51Biin yeshiree gutte beera gaakkemmone; bi ixoonoo kaamoo shaahiibeeti xummeenaꞌochi ixooch haddemmone. Aroochaa eefonaa gashee qaayona tunemmone” iye.

Currently Selected:

Maatiyoosi 24: KBRC

Highlight

Copy