Yaasi 20
20
Shoobi Katemeenaꞌo
(Haddoo 35:9-34)
1Aroochee Doono Yeeri Yaasich ishichiye: 2“Muusina boonoshich ta gettetoommon, shoobi katemeenaꞌon boonoshi bariyemmoyich, Israꞌeeleenaꞌoyich gete. 3Ariyaanoon diqqoona ashoon wuxiti asho koniyoona are katemooch woci murici hamiree nichoon kichecho waanee aashe wodemmone.
4“Ashoon wuxiti asho murici ebi katemeenaꞌoochee ikkooch hamiree, katemooch giyeebeeti kellooch neexeechi, katemee geeneenaꞌoyich bi mooyon gete. Aroochee boonoshiyoo boonoshi katemooch giijjiree bi beeyemmi xaaꞌoon boonoshi imaa, boonoshina tookki kotebe. 5Nichoon kichecho dabbii bi waagaata, ebiyee aaf xiiqoon yechiꞌi, ariibee uroon wuxaano bi tunetoyich, katemeexi asheenaꞌo biin beshiiree immaayeete. 6Iitoo aafooch, nallee gabberooch giddeꞌi bi mooyo nalleemmi wottoon, arooch kotemmone. Aroochee arooba maddeebeeti qeeshee guudo qitimmi wottoon, are katemooch beeyemmone. Ebiyee gubb aafi aallee bi waati katemooch, bi kexooch wotteꞌi hamon hakkiye” iye.
7Ebich geppechi Nifitaalee showee daggooch, Galiilee showooch beeti Qedeeshin, geppechi Efreemee showooch beeti Shekeemin, geppechi Yihudee showooch beeti Kebirooni getteeti Qiriyaat Aribin bariiheete. 8Ebiyoommon Yoordaanoosi aachee beqach Yaarikaa aabi-keyo waan, Roobeeli yoodoochi guudi toommeexi naqqe showooch, barahooch beeti Bezeerin, Gaadi yoodoochi showooch, Gilaad beeti Ramootinaa Minaasi yoodoochi showooch, Bashaanee showooch beeti Golaaninon bariiheete. 9Ariyaanoon diqqoona ashoon wuxiti asho koniyoona arooch woci hami bi muriccemmoyich, iitoo aafooch giddeꞌi bi mooyo bekkemmi wottoon, nichoon kichecho biin bi wuxaachemmoyich, Israꞌeeleenaꞌo bullinaa boonoshi daggooch beeti shiqqoonoyich bariti shoobi katemeenaꞌo, eboshine.#Yibba. 4:41-43
Currently Selected:
Yaasi 20: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
