Yaasi 11
11
Yaasi Dambi-waan Beeti Taateenaꞌon Kochii Wochoo
1Hatsoori taatoo Yabiini Israꞌeeleenaꞌo ebi showoo bullin kochii aalliyoon bi waayehooba, Madooni taatoo Yobaab waan, Shimirooni taatoonaa Akishaafi taatoona waan wochoon daachiihe. 2Ebiyoommon wotta dambi-waan beeti geppe showooch, Kinerootee baharoochee#11:2 Kinerootee baharo, Galiilee baharoone. deshi-waan beeti Yoordaanoosi bambooch, worebe showoonaa aabi-gimo waan Doori katemee gaꞌooch beeti baharee gasheexi showoonooch beeti taateenaꞌo waan wochoon daachiihe. 3Wotta aabi-keyo waaninaa aabi-gimo waanina beeti Kanaaneenaꞌo waan, Amooreenaꞌo waan, Hiteenaꞌo waan, Ferizeenaꞌo waan, geppe showooch beeti Yebuseenaꞌo waan, ebiyoommon wotta Hermooni guudi baatooch, Mitsiphee showooch beeti Hiweenaꞌo waan wochoon daachiihe. 4Eboshiyoo, boonoshi ginechinaꞌo bullina tookkii haddoona meeti haresheenaꞌonaa gaarinaꞌonon yechiꞌi kechiyeete. Boonoshi ginechinaꞌo, haddaa ciyaani baharee gasheexi qacoomminaꞌone. 5Ebi taateenaꞌo bulli Israꞌeeleenaꞌon kocha boonoshi ginee naayinaꞌon ikkochiꞌi waaheete. Meroomi aachi gashooch boonoshi kaamboon geddiyeete.
6Doono Yeeri Yaasin “Boonoshin shattaahine; eboshi bullin wuxemmo taane; yaach ebi goora Israꞌeeleenaꞌo kishooch beshiiree immemmo taane. Aroyee gubb boonoshi haresheenaꞌo tingoon qeccemmo neene; boonoshi gaarinaꞌonoo qaaqqoona michemmo neene” iye.
7Ebich Yaasinaa bi ginechinaꞌo bullina Meroomi aacooch waa, boonoshi waan diqqoona shaggiꞌi kochiyeete. 8Doono Yeeriyoo boonoshin Israꞌeeleenaꞌo kishooch beshiiꞌi immiye. Boonoshiyoo ooge katemoo Sidooninaa Misrefoot Mayimi katemoonooch beddaahaa, wotta aabi-keyo waan beeti Mitsiphi bambooch beddaahaa wuxiibee yookkiyeete. Boonoshi daggoochee kashoona echeto ikkolla aalloone. 9Doono Yeeri biich bi gettitoommon, Yaasi boonoshi haresheenaꞌo tingoon qeccehe; boonoshi gaarinaꞌonoo qaaqqoona michiye.
10Arooba Hatsoori taatoo ebi taateenaꞌo bullin hajjiibeeti taatoone. Ebich Yaasi gubb wottee hammiꞌi Hatsoorin kochii yechiye; bi taatoonoo goraadoona wuxiye. 11Ebi Hatsoori katemee daggooch beeto bullin goraadoona ciroona wuxii aalliiheete; kashoona echeto ikkolla aalloone. Hatsoori katemoonoo qaaqqoona michiye.
12Yaasi ebi katemeenaꞌo bullinaa boonoshi taateenaꞌo bullinon kochii yechiye; Doono Yeeri guuno Muusi biich bi gettitoommon, goraadoona boonoshin ciroona wuxii aalliihe. 13Tunebaani Yaasi michiti Hatsooriyee besh, Israꞌeeleenaꞌo aroyee aaf happeechii, wochinnoon uxereeti katemeenaꞌon michaaneenaꞌone. 14Israꞌeeleenaꞌo ebi katemeenaꞌoochee daneti keco bullinaa gijjeenaꞌonon boonoshi qellich tuniiheete; tunebaani asheenaꞌo bullin goraadoona wuxii aalliiheete; kashoona echeto ikkolla aalloone. 15Ebiyee aaf Doono Yeeri bi guuno Muusich bi gettiton, Muusi Yaasich gettitone. Yaasiyoo ebi getoon ceechiye. Doono Yeeri Muusich gettito bulliichee Yaasi tuniyaani ikke mooyolla aalloone.
Yaasi Kochii Yechiti Showeenaꞌo
16Yaasi showoo bullin kochii yechiye; ebiyoo geppe showoonaa geppee baatooch beeti showoo bullinon, Negeebi barahoo bullin, Gooshenee showoo bullin, aabi-gimo waani woreboonaa Yoordaanoosi bamboonon kochii yechiye. 17Ebiyoommon Seyiree showee gaꞌooch beeti Halaaqi guudoochee tiijjiꞌi, Hermooni guudi baatooch beeti Libanoosi bambooch beeti Baꞌaal Gaad beddaahaa beeti showoo bullin kochii yechiye. Boonoshi taateenaꞌo bullin yechiye; eboshinoo qeccee wuxiye. 18Yaasi ebi taateenaꞌona tookkii meeti naton koyetone. 19Gibeꞌoon beeti Hiweenaꞌoyee besh, Israꞌeeleenaꞌona tookkii wogoon giyiti, bare ikke katemoona aalloone; bullin boonoshi yechito, ginoonane. 20Doono Yeeri Muusich bi gettitoommon, Israꞌeeleenaꞌona koyeree, ikke ariqqaalloon ciroona wuxaa boonoshi aallemmoyich, ebi katemeenaꞌooch beeti asheenaꞌo mulloon muumiito, Doono Yeerine.#Yibba. 7:16
21Arooba wotta Yaasi geppe showoo, ebiyoo Kebiroon, Debiirinaa Anaabinooch, ebiyoommon Yihudee showeexi geppe showoonaa Israꞌeelee showeexi geppe showoo bullinooch beeti Anaaqeenaꞌon wuxii aalliihe; boonoshi katemoo bullinoo ciroona aalliihe. 22Eboshiichee giishecheenaꞌo baach Gaaza, Gaatinaa Ashidoodinooch echeteetani, Israꞌeelee showee daggooch Anaaqee yareenaꞌoochee ikkolla echeyaanoone. 23Ebina Doono Yeeri Muusich gettitoommon, Yaasi showoo bullin kochii yechiye; boonoshi yoodi yoodee haddoona qoodiꞌi, Israꞌeeleenaꞌoyich maacciye.
Aroochee showoo ginoochee kashehe.
Currently Selected:
Yaasi 11: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
