Yaasi 10
10
Aabee Aafe Neexo
1Yaasi Yaarikinaa bi taatoonochi toommooch bi tuniitoommon, Aayin yechiꞌi ciroona bi aalliyoon Yerusaalemi#10:1 Arooba Yerusaalemi Yebuseenaꞌochi katemeene. taatoo Adon Tsedeeqi waayehe. Wotta Gibeꞌooni asheenaꞌo Israꞌeeleenaꞌona tookkii wogoon boonoshi gimonaa Israꞌeeleenaꞌo daggooch boonoshi beemonon waayehe. 2Ebina biinnaa bi asheenaꞌona oogichiꞌi shattiyeete. Ebiyoo Gibeꞌooni, taatee katemoo bullichoommon ooge katemoo, Aayiyee beshe katemoo, wotta bi asheenaꞌoo ginee anaaminaꞌo boonoshi tunetoyichiye. 3Ebich Yerusaalemi taatoo Adon Tsedeeqi Kebirooni taatoo Hohaam waan, Yarimuuti taatoo Firaam waan, Lakishi taatoo Yafiyinaa Egilooni taatoo Debiirina waan ishichiibeeti wochoon daachiihe: 4“Gibeꞌooni asheenaꞌo Yaasinaa Israꞌeeleenaꞌona tookkii shunee wogoon boonoshi giyitoyich, ta waan waaree taan ittoshi gaachetaa boonoshin koyona” iye.
5Arooba uuche Amooree taateenaꞌo, boonoshiyoo Yerusaalemi taatoo, Kebirooni taatoo, Yarimuuti taatoo, Lakishi taatoonaa Egilooni taatoona ikkottee boonoshi ginechinaꞌo bullin kiciꞌi, Gibeꞌoonin giichii kochiyeete.
6Gibeꞌooni asheenaꞌo, “Geppechi showooch beeti Amooree taateenaꞌo bulli boonoshi ginee naayinaꞌon ikkochiꞌi no toommooch waatinaꞌone. Ne guuno noon duppaahine. Noon gaachebe. Kaate waaree noon wodiibe” iꞌi Galigala beeti Israꞌeeleenaꞌo kaambooch, Yaas waan wochoon daachiiheete.
7Ebich Yaasinaa bi ginechinaꞌo bullina ginee anaaminaꞌo bullina tookkii, Galigalee kechiyeete. 8Arooba Doono Yeeri Yaasich “Boonoshin shattaahine; boonoshi bullin ne kishooch beshii immeto taane; boonoshi daggoochee neenna koyeree neen wochemmo ikkolla aalloone” iye.
9Yaasinaa bi ginechinaꞌona Galigalee tiyii, xumo bullin qaxiriibee qeyiꞌi, Amooreenaꞌo beetooch shaggii diqqoona kochiyeete. 10Doono Yeeriyoo Amooree ginechinaꞌon Israꞌeeleenaꞌo aafoochee betiihe. Israꞌeeleenaꞌo Gibeꞌoonaa boonoshin wuxii ciichiyeete. Beet Horooni katemooch daammiibeeti, geppechi gommi deshee damboon yookkii dabbiyeete. Azeqinaa Maqidinooch beddaahaa, boonoshin yookkii dabbii wuxiyeete. 11Israꞌeeleenaꞌo aafoochee boonoshi wocee beetaa, Beet Horooni katemoochee Azeqi dugillooch daammiibeeti, geppechi gommoochaa Doono Yeeri xaqqoommi giidechi baderoon shimaayoochee boonoshi toommooch kindiihe; boonoshiyoo qitiyeete. Israꞌeeleenaꞌo goraadoona wuxitinaꞌoyee baderoo wuxitinaꞌo besheenaꞌone.
12Doono Yeeri Amooreenaꞌon Israꞌeeleenaꞌo kishooch beshiiꞌi bi immiti aabooba, Yaasi Doono Yeerich Israꞌeeleenaꞌo aafoochaa ishichiye: “Aabeene, shuuraanoon Gibeꞌooni katemee toommooch neexebe; ageneene, Ayalooni bambee toommooch neexebe” iye. 13Ebich Israꞌeelee aagetoo boonoshi etteenaꞌo toommooch nichoon kichimmi wottoon, aabe shuuraanoon bi beetooch neexahan; ageneyoo shuuraanoon bi beetooch yagiyan. Ebi mooyo Yashaari Macaafooch#10:13 Yashaari Macaafo, Israꞌeeleenaꞌo koyeti koyee mooyo kooreeti macaafoone. kooreetone. Aabe shuuraanoon shimaayooch neexaa, ikke heeyon giyaanoon heechahan. 14Doono Yeeri ashi getoon bi waayeti, ebiyoommi aabo, aroyee aaf tuneba aroyee gubb, ciroona aalloone. Doono Yeeri Israꞌeeleenaꞌo qoodoon koyehe.
15Aroochee Yaasinaa Israꞌeelee ginee naayinaꞌo bullina Galigala beeti boonoshi kaambooch wotteheete.
Uuche Amooree Taateenaꞌo Qitoo
16Ebiyooba ebi uuche Amooree taateenaꞌo muriccii waaꞌi, Maqidi katemee gaꞌooch beeti xaqqee gofooch aashetinaꞌone. 17Uuche taateenaꞌo ebi xaqqee gofooch aasheꞌi beemon Yaasi waayehe. 18Ebich Yaasi ishichiye: “Gofee kellooch ogooge xaqqeenaꞌon gederikki hicote; quyechi asheenaꞌonoo arooch neechibote. 19Tunebaani ittoshi arooch yagiyaahote. Ittoshi etteenaꞌon yichi dabbiree wuxi aalliibote; boonoshi katemooch boonoshi giyaachemmoyich bayote. Ittoshi Nuggishoo Doono Yeeri boonoshin ittoshi kishooch beshii immitone” iye.
20Ebich Yaasinaa Israꞌeelee ginechinaꞌona boonoshi etteenaꞌo hidaa aallemmi wottoon, wuxii ciichiyeete; tunebaani giishecheenaꞌo mishigechi boonoshi katemeenaꞌooch gimon hakkitinaꞌone. 21Aroochee ginechinaꞌo bulli diggoona wotteꞌi Yaasi beeti, Maqidi gaꞌooch beeti Israꞌeeleenaꞌo kaambooch waaheete. Are showooch beeti asheenaꞌoochee Israꞌeeleenaꞌo toommooch noonoon wochiti ikke asholla aalloone.
22Yaasiyoo “Gofee kelloon qechiree, ebi uuche taateenaꞌon kichi taach deebote” iye. 23Ebi uuche taateenaꞌon, eboshiyoo Yerusaalemi taatoon, Kebirooni taatoon, Yarimuuti taatoon, Lakishi taatoonaa Egilooni taatoonon kichii deebiyeete. 24Ebi taateenaꞌon boonoshi kichii deebimmona, Yaasi Israꞌeeleenaꞌo bullin bi waan ceeggiꞌi, ginooch biinna tookkii hammiti ginee iraasheenaꞌon “Hach aaf gidderee, ebi taateenaꞌo qettooch neexote” iye. Boonoshiyoo aaf giddeꞌi, boonoshi baatoona ebi taateenaꞌo qettooch neexxiyeete.
25Yaasiyoo boonoshich ishichiye: “Shattaahote; keqqiyaahote; kupphe manjibote. Ittoshi kochemmi etteenaꞌo bulli toommooch Doono Yeeri ebiyoommon tuniyemmone” iye. 26Aroochee Yaasi ebi uuche taateenaꞌon wuxiꞌi, uuche mixooch yooddiye. Xumemmi wottoon, boonoshi dubeno aroochee kindaanoone. 27Aabe giya iyaa, Yaasi ebi taateenaꞌo dubenoon mixoochee kindiiree, aaf boonoshi aasheti gofooch daami boonoshi duppemmoyich bi getaa, daammii duppiyeete. Gofee kelloonoo ogooge xaqqeenaꞌona keppheheete. Ebi xaqqeenaꞌo hanaach beddaahaa arooch beetinaꞌone.
Amooreenaꞌochi Bare Katemeenaꞌon Yaasi Kochii Yesho
28Ebi arooba Yaasi Maqidin yechiye. Are katemeexi asheenaꞌonaa bi taatoonon goraadoona wuxiye. Ikke ashoonolla echiyaanoon katemee daggooch beeto bullin hidii aalliihe. Yaariki taatoo toommooch bi tuniitoommon, ebiyoommon hini are Maqidi taatoo toommooch tuniihe.
29Aroochee Yaasinaa biinna tookkii beeti Israꞌeelee ginechinaꞌo bullina Maqidee Libina besheꞌi kochiyeete. 30Doono Yeeri ebi katemoonaa bi taatoonon wotta Israꞌeeleenaꞌo kishooch beshiiꞌi immiye. Yaasi are katemee daggooch beeti asheenaꞌo bullin goraadoona wuxii aalliihe. Ikke ashoonolla echiyaanoone. Yaariki taatoo toommooch bi tuniitoommon, ebiyoommon hini are Libini taatoo toommooch tuniihe.
31Aroochee Yaasinaa biinna tookkii beeti Israꞌeelee ginechinaꞌo bullina Libinee Lakish besheꞌi, giichii kochiyeete. 32Doono Yeeriyoo Lakishin Israꞌeeleenaꞌo kishooch beshiiꞌi immiye. Yaasi guttinnee qemooba ebi katemoon yechiye. Libini toommooch bi tuniitoommon, ebiyoommon hini are Lakish beeto bullin goraadoona wuxii aalliihe.
33Ebiyooba Gezeeri taatoo Horaami Lakish beetinaꞌon gaacheya waahe. Tunebaani Yaasi ikkoonolla echiyaanoon taatoonaa bi ginechinaꞌonon wuxii ciichiye.
34Aroochee Yaasinaa biinna tookkii beeti Israꞌeelee ginechinaꞌo bullina Lakishee Egiloon besheꞌi, giichii kochiyeete. 35Ebi arooba katemoon yechiyeete; are katemeexi asheenaꞌo bullinoo goraadoona wuxiyeete. Yaasi, Lakishi toommooch bi tuniitoommon, ebiyoommon hini are katemoonaa bi daggooch beeto bullinon ciroona wuxii aalliihe.
36Aroochee Yaasinaa biinna tookkii beeti Israꞌeelee ginechinaꞌo bullina Egiloonee Kebiroon besheꞌi kochiyeete; 37katemoon yechiyeete; bi taatoon, are katemoonaa bi guudeexi gafeenaꞌonooch beeti asho bullin goraadoona wuxiyeete. Yaasi, Egilooni toommooch bi tuniitoommon, ikke ashoonolla echiyaanoon, hini are katemoonaa bi daggooch beeto bullinon ciroona aalliihe.
38Aroochee Yaasinaa biinna tookkii beeti Israꞌeelee ginechinaꞌo bullina gubb wotteꞌi Debiirin kochiyeete. 39Katemoon, bi taatoonaa bi guudeexi, gishiishi katemeenaꞌonon kochii yechiyeete; are katemeenaꞌooch beeto bullin goraadoona wuxii ciroona aalliiheete; ikke ashoonolla echiyaaneenaꞌone. Yaasi, Kebirooni toommooch, Libininaa bi taatoonochi toommooch bi tuniitoommon, ebiyoommon hini are Debiirinaa bi taatoonochi toommooch tuniihe.
40Ebiyoommi gommona Yaasi showoo bullin kochiꞌi yechiye; geppe showooch, Negeebi barahooch, worebe showoonaa geppee gaadoonooch beeti taateenaꞌo bullin kochiꞌi, Israꞌeelee Nuggishoo Doono Yeeri gettitoommon, bullin ciroona hidii wuxii aalliihe; ikke ashoonolla echiyaanoone. 41Yaasi Qadeesh Barinee Gaaza beddaahaa, ebiyoommon Gibeꞌoon beddaahaa Gooshenee showoo bullin kochiꞌi bullehe. 42Israꞌeeleenaꞌo Nuggishoo Doono Yeeri Israꞌeeleenaꞌo qoodoon koyeto bi tunetoyich, Yaasi ebi taateenaꞌo bullinaa boonoshi hajjiibeeti showoonon ikkinnee hamona kochii yechiye.
43Ebiyee gubb, Yaasi Israꞌeelee ginechinaꞌo bullina tookkii Galigala beeti, kaambooch wottehe.
Currently Selected:
Yaasi 10: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
