Woraaferasheenaꞌo 2
2
Bokiimaa Yeerichi Maraakoo Bekko
1Doono Yeerichi maraakoo Galigalee Bokiim hammiꞌi Israꞌeeleenaꞌoyich ishichiye: “Gibitsee ittoshin kichaꞌa, ittoshi qaabbechinaꞌoyich imma ta wogeti showooch ittoshin deeboye. Tawoo ‘Ittoshina tookkaa ta giyeti wogoon happaachemmo taane. 2Ittoshiyoo hini showooch beeti asheenaꞌona tookki wogoon giyaahote; boonoshi deejjee gudoonoo happibote’ iyoye. Tunebaani ittoshi, ta getoon waayeyaano ittoshine. Ebin ittoshi tuniito amoyichiye?#Key. 34:12-13; Yibba. 7:2-5 3And illa ittoshich ta gettaabeeto, ebiniye: Ebi asheenaꞌon ittoshi aafoochee yoohi aalliyaachemmo taane. Boonoshiyoo ittoshich ettoon tunemminaꞌone. Boonoshi nuggisheenaꞌo wotta ittoshich olloon tunemminaꞌone” iye.
4Doono Yeerichi maraakoo ebi mooyon Israꞌeeleenaꞌo bullich bi gettimmona, boonoshiyoo boonoshi qaaroon oogichii cookiꞌi eeppiyeete. 5Ebi are xaaꞌoon Bokiimi#2:5 Bokiimi geto, “Eeppechinaꞌo” getone. iꞌi shigiiheete; ebi aroochaa Doono Yeerich deejjoon deejjiyeete.
Yaasi Qitoo
6Yaasi asheenaꞌo wotteree hammemmoyich bi tuniihooba, asheenaꞌo boonoshi ikkikkoona boonoshi qoodee showoon woraashiya wottee hammiyeete. 7Yaasi kashoona bi beeti yemeeno bullin Israꞌeeleenaꞌo Doono Yeerich goyinnee maddeheete. Wotta bi qititoyee gubb, Doono Yeeri Israꞌeeleenaꞌoyich tuniiti worganikkiti mooyo bullin beeggiti geeneenaꞌo kashoona beeti yemeeno bullin Doono Yeerich goyinnee maddeheete. 8Doono Yeerichi guuno, Nuuni bushoo Yaasi bi shiijjeti balli aashire natona qitiye. 9Geppechi Efreemi yoodee showoo beeti, Gaashi guudoochaa dambi-waan beeti, bi hajjee showoo Timinaat Herees duukkiyeete.#Yaas. 19:49-50
10Ebi are shiijjeroo bulli qitii ciiremmona, Doono Yeerin, wotta Israꞌeeleenaꞌoyich bi tuniiti mooyon ariyaani bare shiijjeroo kereehe.
Israꞌeeleenaꞌo Doono Yeerich Goyinnee Maddoon Qayo
11Aroochee Israꞌeeleenaꞌo Doono Yeeri aafooch axaaxoon shuuneheete. Baꞌaaleenaꞌoyich goyinneheete. 12Gibitsee boonoshin kichiti, boonoshi qaabbechinaꞌochi Nuggishoo Doono Yeerin qajjiyeete. Boonoshi guudoona beeti asheenaꞌo goyinneebeeti nuggisheenaꞌon dabbiyeete; boonoshichoo goyinneheete. Doono Yeeri boonoshin kaaremmoyich tuniiheete. 13Doono Yeerin qajjiꞌi Baꞌaaleenaꞌonaa Ashitarooteenaꞌonoyich goyinneheete. 14Ebina Doono Yeeri kaaro Israꞌeeleenaꞌo toommooch cufiye; biyoo boggemmi bokkeenaꞌo kishooch boonoshin beshiiꞌi immiye. Boonoshi guudoona beeti boonoshi etteenaꞌo kishooch boonoshin beshiiꞌi immiye. Ebich boonoshi etteenaꞌo aafooch kuppheꞌi neexoon mawiiheete. 15Koyoyich boonoshi kechimmi aabo bullin, Doono Yeeri “Tuniyemmo taane” iꞌi bi wogetoommon, boonoshi toommooch magge mooyon tunii beehe. Ebina boonoshiyoo oogeton xuuxeheete.
16Arooba Doono Yeeri woraaferasheenaꞌon tiijjaa, boggiibeeti bokkeenaꞌo kishoochee boonoshin wodiiheete. 17Tunebaani Israꞌeeleenaꞌo boonoshi woraaferasheenaꞌoyich deꞌa gettemmon qajjiyeete; Doono Yeerich gibeneyoon qajjiꞌi bare nuggisheenaꞌoyich goyinneheete. Boonoshi qaabbechinaꞌo Doono Yeerichi getoyich deꞌa iibee echetinaꞌone. Tunebaani ebi boonoshi qaabbechinaꞌochi gommon dabbemmon qajjiyeete. 18Doono Yeeri woraaferashoon tiijjiꞌi, are woraaferashoo kashoona beemmi yemeeno bullin biinna tookkii tunee bi asheenaꞌon boonoshi etteenaꞌo kishoochee wodii beehe. Boonoshi etteenaꞌo boonoshin xuqqii duꞌiitaa boonoshi maaceremmona, Doono Yeeri boonoshich ariqqee beehe. 19Tunebaani are woraaferashoo qitiyooba, asheenaꞌo bare nuggisheenaꞌon dabbii boonoshich goyinnee maddeꞌi, boonoshiyee aafi shiijjeroyee beshoon gondeheete. Gonde boonoshi shuunoon qayaaneenaꞌone; babberittinoocheenoo wotteyaaneenaꞌone. 20Ebich Doono Yeeri kaaro boonoshi toommooch cufiye. Biyoo ishichiye: “Hini asheenaꞌo boonoshi qaabbechinaꞌoyich ta immeti ta wogoon boonoshi shaaddetoyich, ta qaaroonoo waayemmon boonoshi qajjitoyich, 21Yaasi qitiyooba, hini showooch echeti asheenaꞌo daggoochee koninolla boonoshi aafoochee ebiyee gubb yoohi kichaachemmo taane. 22Ebin ta tuniyemmo, arooch boonoshin kotiyoona, Israꞌeeleenaꞌo boonoshi qaabbechinaꞌo tuniitoommon, Doono Yeeri ta gommon boonoshi dabboonaa dabbee qayonon beegoyichiye” iye. 23Ebich Doono Yeeri are asheenaꞌon arooch boonoshi beeyemmoyich tuniihe. Yaasichi kishooch beshiiꞌi imona ikke kaalloona yoohaa boonoshi aallemmoyich tuniyaanoone.
Currently Selected:
Woraaferasheenaꞌo 2: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
