Woraaferasheenaꞌo 1
1
Yihudi Yoodoonaa Simooni Yoodoona Taatoo Adon Bezeeqin Koyo
1Yaasi qititoyee gubb, Israꞌeeleenaꞌo “No daggoochee shiichi hamiree Kanaaneenaꞌon koni koya?” ii Doono Yeerin echeheete.
2Doono Yeeriyoo “Yihudi yoodo shiichiree hambe. Tawoo showoon bi kishooch beshiyaꞌa immeto taane” iye.
3Yihudi yoodo bi manoo tuneti Simooni yoodoon “Nooch icheti showooch beeti Kanaaneenaꞌon ittoshi waataa hamiree tookki koyone. Nowoo ebiyoommon ittoshicho tuneti showooch tookkiree hammemmo noone” iye. Ebina Simooni yoodoonaa 4Yihudi yoodoona koyooch tookkii hammiyeete. Doono Yeeriyoo Kanaaneenaꞌonaa Ferizeenaꞌonon boonoshi kishooch beshiiꞌi immiye. Boonoshiyoo aashire hume asheenaꞌon Bezeeqaa wuxiyeete. 5Aroochaa Adon Bezeeqina daneꞌi koyeheete. Kanaaneenaꞌonaa Ferizeenaꞌonon kochii wochiyeete. 6Adon Bezeeqiyoo wocciye; boonoshiyoo yookkii yechiꞌi bi kishee indecheenaꞌonaa baatee indecheenaꞌonon kuxxiyeete.
7Adon Bezeeqiyoo “Boonoshi kishee indecheenaꞌonaa baatee indecheenaꞌona kucheti shabe taateenaꞌo ta madee ooyoon maciibee echetinaꞌone. Ebi boonoshi toommooch ta tuniitoommon, Yeeri ta toommooch tuniitone” iye. Biinoo Yerusaalem daammiyeete. Biyoo aroochaa qitiye.
Yihudi Yoodo Yerusaaleminaa Kebirooninon Kochii Yesho
8Yihudi yoodee asheenaꞌo Yerusaalemin kochii yechiyeete; are katemeexi asheenaꞌon goraadoona wuxiyeete; katemoonoo qaaqqoona michiyeete. 9Aroyee gubb, geppe showooch, Negeebi barahoonaa woreboonooch beeti Kanaaneenaꞌon kocha hammiyeete. 10Boonoshiyoo Kebiroon koteti Kanaaneenaꞌon kocha hammiyeete. Aroochaa Sheshaayi, Ahimaaninaa Talimayinochi shiijjereenaꞌon kochii wochiyeete. Kebirooni arooba Qiriyaat Aribi getteehe.
Otineeli Debiirin Kochii Yesho
(Yaasi 15:13-19)
11Aroochee Yihudi yoodee asheenaꞌo Debiiri katemeexi asheenaꞌon kocha hammiyeete. Aroyee aaf Debiiri, Qiriyaat Sefeeri gettee beetone. 12Kaaleebiyoo “Qiriyaat Sefeerin kochii yechimmoyich ta bushee Akisaahin immemmo taane” iye. 13Kaaleebichi guuche manoo Qenaazi bushoo Otineeli are katemoon kochii yechiye. Kaaleebiyoo bi bushee Akisaahin biich immiye.
14Akisaahi Otineel waan bi waati gaaree aabooba, bi nihoo Kaaleeb waanee goyee budon bi qollemmoyich, Otineeli bushech gettiye.#1:14 Hibiree Yaafe Macaafo “Bushee Otineelich gettahan” iye. Busheyoo bi kuree toommoochee kindiyan. Kaaleebiyoo biich “Amoon neech ta tuniyemmoyichiye ne qaawaabeeto?” iye.
15Busheyoo “Taach wojjoon imbe; taach ne immeti showoo beeto Negeebi barahoochiye. Ebich aachi xuupheenaꞌon taach imbe” iyan. Kaaleebiyoo dambee aachi xuuphoonaa deshi aachi xuuphoonon biich immiye.
Yihudinaa Biiniyaaminochi Yoodeenꞌo Daneti Wudoo
16Muusi abboochi shiijjereenaꞌo tuneti Qeenee asheenaꞌo Yihudi yoodoona tookkii tuneꞌi, yeebbee mixo bi daggooch beeti Yaarikee tiyii, Araadi gaꞌooch, Negeebi barahooch beeti Yihudee showooch hammiyeete. Hammiꞌi are showeexi asheenaꞌona tookkii koteheete. 17Yihudi yoodo Simooni yoodoona tookkii hammiꞌi Tsefaati katemooch beeti Kanaanee asheenaꞌon kochiyeete. Are katemoonoo ciroona hidii aalliiheete. Ebich are katemoo Horimi#1:17 Horimi geto, “Aalliyoo” getone. getaa ceekkehe. 18Yihudi yoodo Gaazin, Ashiqelooninaa Eqirooninon, ebi katemeenaꞌochi guudoona beeti showoona tookkii yechiye.
19Doono Yeeri boonoshina tookkii bi tunetoyich, geppe showoon yechiyeete; tunebaani yimaane showooch beeti asheenaꞌoyich meeti xuuree gaari bi beetoyich, boonoshin yookkii kichoon hakkaaneenaꞌone. 20Muusi gettitoommon tuniiꞌi, Kebiroonin Kaaleebich immiyeete. Biyoo Anaaqichi keejje bushiisheenaꞌo shiijjereenaꞌon yookkii kichiye. 21Tunebaani Biiniyaami asheenaꞌo Yerusaalem beeti Yebuseenaꞌon yookkii kichaaneenaꞌone. Ebich Yebuseenaꞌo hanaach beddaahaa Biiniyaami asheenaꞌona tookkii arooch koteꞌi beetinaꞌone.#Yaas. 15:63; 2 Saam. 5:6-7; 1 Kiin. 11:4-5
Yooseefichi Shiijjereenaꞌo Beeteelin Kochii Yesho
22-23Yooseefi shiijjereenaꞌo wotta Beeteelin kocha hammiyeete. Beeteeli arooba Luuzi getteehe. Doono Yeeriyoo boonoshina tookkii tunehe. Boonoshiyoo qiiddechinaꞌon#1:22-23 Qiiddechinaꞌo, ii beeton ikkikke asheenaꞌo “Maaccechinaꞌo” ii beetinaꞌone. are katemooch daachiiheete. 24Are qiiddechinaꞌo katemoochee maach kechiibeeti ikke uroona daneꞌi, “Katemooch giyeebeeti kelloon nooch bekkiibe; nowoo neech deeyemmo noone” iyeete. 25Biyoo katemee kelloon boonoshich bekkiihe. Boonoshiyoo hini are uroonaa bi kechi asheenaꞌonoyee besh, are katemooch beeti asheenaꞌo bullin goraadoona ciichiyeete. 26Ebi uro Hiteenaꞌo showooch hammiꞌi arooch katemoon shuunehe. Are katemoonoo Luuzi iꞌi shigiihe. Hanaach beddaahaa ebi katemoo ceekkeebeeto are shigoonane.
Israꞌeeleenaꞌo Yookkii Kichaani Asheenaꞌo
27Minaasi yoodo Beet Sheꞌaan, Tanaak, Door, Ibilaam, Megidinaa ebi katemeenaꞌochi guudoona beeti gafeenaꞌonooch beeti asheenaꞌon yookkii kichaanoone. Ebich Kanaaneenaꞌo are showoochee shuuraanoon manjiꞌi koteheete. 28Tunebaani Israꞌeeleenaꞌo boonoshi kupphehooba, ebi asheenaꞌo guunon tuneree boonoshich maddemmoyich tuniiheetani, ciroona yookkii kichaaneenaꞌone.#Yaas. 17:11-13
29Efreemi yoodo Gezeer beeti Kanaaneenaꞌon yookkii kichaanoone. Ebich Kanaaneenaꞌo boonoshina tookkii Gezeer koteheete.#Yaas. 16:10
30Zebulooni yoodo Qitirooninaa Nahaloolinooch beeti asheenaꞌon yookkii kichaanoone. Ebich Kanaaneenaꞌo boonoshina tookkii koteheete. Boonoshichoo guunon tuneꞌi maddeheete.
31Aseeri yoodo Aak, Sidoon, Ahilaab, Akiziib, Helibaah, Afeeqinaa Rehoobinooch beeti asheenaꞌon yookkii kichaanoone. 32Yookkii kichoo bi qajjitoyich, Aseeri yoodo are showooch beeti Kanaaneenaꞌona tookkii arooch kotehe.
33Nifitaali yoodo Beet Shemeeshinaa Beet Anaatinooch beeti asheenaꞌon yookkii kichaanoone. Ebich boonoshiyoo are showooch beeti Kanaaneenaꞌona tookkii arooch koteheete. Tunebaani ebi Beet Shemeeshi asheenaꞌonaa Beet Anaati asheenaꞌona boonoshich guunon tuneꞌi maddeheete.
34Daani yoodo yimaane showooch kindaanoon geppe showooch baach bi beeyemmoyich Amooreenaꞌo boonoshin xuqqiyeete. 35Ebi Amooreenaꞌo Hereesi guudooch, Ayalooninaa Shaꞌalibiminooch manjiꞌi koteheete. Tunebaani Yooseefi shiijjereenaꞌo giidehooba, boonoshich guunon tuneꞌi maddeheete.
36Amooreenaꞌo dano Aqirabiimi Deshee Damboochee, Selaahee tiijjiꞌi kaama kechii beetone.
Currently Selected:
Woraaferasheenaꞌo 1: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
