Woraaferasheenaꞌo 3
3
Are Showooch Echeti Asheenaꞌo
1-4Israꞌeeleenaꞌo, ebi geto, ebiyee aaf Kanaanee showoochaa koyee ariyaani Israꞌeeleenaꞌo bulli, bi gommon boonoshi dabboonaa dabbee qayonon beegoyich, Doono Yeeri are showooch bi echiiti asheenaꞌo, eboshine: Uuche Filsixeemee taateenaꞌo, Kanaaneenaꞌo bulli, Sidooneenaꞌonaa Baꞌaal Hermooni geppoochee tiijjiꞌi Hamaati katemooch beshe kaattooch beddaahaa beeti, Libanoosi guudooch beeti Hiweenaꞌonane. Eboshi Doono Yeeri Muusina boonoshi qaabbechinaꞌoyich bi gettiti getoyich Israꞌeeleenaꞌo deꞌa boonoshi getonaa getti qayonon beegoyich bi echiiti asheenaꞌone. Ebin bi tuniito, Israꞌeeleenaꞌochi shiijjereenaꞌo koyoon boonoshi doyemmi gommo ebi baach bi tunetoyich, aroyee aaf koyoon doyaani Israꞌeeleenaꞌochi shiijjereenaꞌoyich koyoon dojjoyichiye.
5Ebina Israꞌeeleenaꞌo Kanaaneenaꞌona tookkii, Hiteenaꞌona tookkii, Amooreenaꞌona tookkii, Ferizeenaꞌona tookkii, Hiweenaꞌonaa Yebuseenaꞌona tookkii koteheete. 6Boonoshi maache bushiisheenaꞌon shaaggiyeete; ebi asheenaꞌochi anaami bushiisheenaꞌoyich boonoshi maache bushiisheenaꞌonoo shaakkiiheete; boonoshi nuggisheenaꞌoyichoo goyinnee maddeheete.
Otineeli Woraaferashoo Tuno
7Israꞌeeleenaꞌo Doono Yeeri aafooch axaaxoon shuuneheete. Boonoshi Nuggishoo Doono Yeerin batteꞌi Baꞌaaloonaa Asheerinochi shahalloon goyinnee maddeheete. 8Ebich Doono Yeerichi kaaro Israꞌeeleenaꞌo toommooch cufiye. Biyoo boonoshin Mesopotaamee taatoo Kushaan Rishatayimichi kishooch beshiiꞌi immiye. Israꞌeeleenaꞌo shimitte naton biich hajjeeheete. 9Aroochee Israꞌeeleenaꞌo Doono Yeer waan cookaa, boonoshin wodiyemmi, Kaaleebichi guuche manoo Qenaazi bushoo Otineelin tiijjiye. 10Doono Yeerichi Ayaano bi toommooch kindiye. Biyoo Israꞌeeleenaꞌo toommooch woraaferashoo tunehe. Otineeli ginooch bi hamaa, Doono Yeeri Mesopotaamee taatoo Kushaan Rishatayimin bi kishooch beshiiꞌi immiye. Biyoo Kushaan Rishatayimin kochii wochiye. 11Ebina aabbe nati wottoon showoo kashehe. Aroochee Qenaazi bushoo Otineeli qitiye.
Ehuudi Woraaferashoo Tuno
12Israꞌeeleenaꞌo wochinnoon Doono Yeeri aafooch axaaxoon shuuneheete. Doono Yeeri aafooch axaaxoon boonoshi shuunetoyich, Doono Yeeri Moꞌabee taatoo Egilooni boonoshiyee beshiree bi sharemmoyich tuniihe. 13Biyoo Amooneenaꞌonaa Amaleeqeenaꞌonon bi waan kiciꞌi, hammii Israꞌeeleenaꞌon kochiye. Boonoshiyoo yeebbee mixo bi daggooch beeti Yaariki katemoon yechiyeete. 14Ebina Israꞌeeleenaꞌo Moꞌabee taatoyich aaraa shimitte naton hajjeeheete.
15Israꞌeeleenaꞌo wochinnoon Doono Yeer waan cookiyeete. Doono Yeeriyoo boonoshin wodiyemmi, Geeri bushoo, kisha yoochoo Ehuudin Biiniyaamee yoodoochee tiijjiye. Israꞌeeleenaꞌo ebi Ehuudi kishoona gibiroon Moꞌabee taatoo Egiloon waan daachiiheete. 16Ehuudiyoo gutte baddaa gayireeti, ikke hira bede goraadoon qanniiꞌi, bi tahee maac, bi qanne doshooch cuchiye. 17Aroochee gibiroon daammii Moꞌabee taatoo Egiloonich giddiihe. Egilooniyoo oogeti aangechi ashoone. 18Ehuudi gibiroon bi giddiitoyee gubb, gibiroon shaaggii daammiti asheenaꞌon boonoshi hilla wochii daachiihe. 19Tunebaani bi, xareeti xaqqeenaꞌo neexeꞌi beeti, Galigali gaꞌooch shaggiichii, aroochee wottee taatoo waan hammiꞌi, “Taatoocho, aashoona neech ta gettemmi mooyo beete” iye.
Taatoo “Cikki beebe” iye. Bi gaꞌooch neexeebeeti bi aafee bushiisheenaꞌo bi aafoochee kechii hammiyeete.
20Aroochee taatoo kechi toommeexi kexooch beeti, kashee xaaꞌooch ikkeeto koteꞌi bi beetaa, Ehuudi bi waan giddeꞌi, “Yeer waanee neech ta deebeti wocho beete” iye. Taatoo bi kotetoochee tiyii neexehe. 21Ehuudiyoo bi qanne doshooch beeti goraadoon yooche kishoona kaacciꞌi taatoochi maacooch kochiye. 22Goraadoo bi cuboona tookkii maac giyiye. Qochoo ebi goraadoon kaappitoyich Ehuudi goraadoon geechii kaacaanoone. Goraadoo gubbaa hottii kechiye. 23Aroochee Ehuudi maach kechiye. Are kexon hicciꞌi, taatoo toommooch tuggehe.
24Ehuudi hammitoyee gubb, taatoochi aafee bushiisheenaꞌo waaꞌi kexo tuggeyoon beeggiyeete. Boonoshiyoo “Taatoo kechi maaci gatoochaa aachi ukkoochiye bi beeto” iꞌi gabiyeete. 25Boonoshiyoo boonoshi taahimmi wottoon arooch quyeheete. Tunebaani andoo ebi kechi kelloon qechemmon bi qajjitoyich, qulfoon daammii qechiyeete; qechiꞌi, boonoshi doono qitiꞌi showooch yaryallii beeton daneheete.
26Taatoo aafee bushiisheenaꞌo batt quyooch boonoshi beetaa, Ehuudi hammii wokkiye. Muricciꞌi, xareeti xaqqeenaꞌo neexeꞌi beeti xaaꞌoon beshee, Seꞌiira hammiye. 27Arooch shaggiꞌi, geppechi Efreemee showooch tiroon (waaringoon) huggiye. Israꞌeeleenaꞌo biin aaf shiichiiꞌi, biinna tookkii geppoochee dugilla hammiyeete. 28Biyoo boonoshich “Doono Yeeri ittoshi etteenaꞌo tuneti Moꞌabeenaꞌon ittoshi kishooch beshiiꞌi immitone; taan dabbibote” iye. Boonoshiyoo biin dabbii kindiꞌi, Moꞌabeenaꞌo Yoordaanoosin kimmiibeeti kime kaattoon yechiyeete. Ikke ashoonolla beshiyaaneenaꞌone. 29Arooba giidoonaa hakkoona aricheti aashire hum bede Moꞌabeenaꞌon wuxiyeete. Ikke asholla muriccito aalloone. 30Arooba Moꞌabeenaꞌo Israꞌeeleenaꞌo kishooch dihiyeete. Ebina shinne nati wottoon showoo kashehe.
Shamigaari Woraaferashoo Tuno
31Ehuudiyee gubb, gattoo gasheebeeti guxechi gumboona shiritte balle Filsixeemeenaꞌon wuxiti Anaati bushoo Shamigaari tiyiye. Biyoo wotta Israꞌeeleenaꞌon wodiitone.
Currently Selected:
Woraaferasheenaꞌo 3: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
