Woraaferasheenaꞌo 19
19
Lewee Ashoonaa Bi Naamacheenochi Mooyo
1Israꞌeeleenaꞌoyich taatoo aalli yemeenooba, geppechi Efreemee showooch, wohi xaaꞌooch koteti ikke Lewee asho Yihudee showooch beeti Beetilehemi katemoochee ikke busheen bi naamache tuniiꞌi daammiye.
2Tunebaani ebi bushee biinna kaaraꞌa Yihudee showooch, Beetilehemi katemooch beeti bi nihoo waan hammaꞌa, arooch awudde agenoon kotahan. 3Busheechi keno biinna shuneree bi kexooch deeba bi beetooch hammiye; biyoo bi aafee bushoonaa gutte kuroonon daammitone. Busheyoo biin bi nihoo kexooch giijjiyan. Busheechi nihoo uroon beeggiꞌi emiroona diggiihe. 4Busheechi nihoo arooch bi yagemmoyich kupphiiꞌi qolletaa, arooch keejj qeyiye. Boonoshiyoo maa uchiibee arooch qeyii beeheete. 5Awuddinnee qemooba maaddiꞌi tiyiyeete. Uroo hamma qanniye. Tunebaani busheechi nihoo bi bushee kenoon “Shaafiroon shaaci kuppheree, hammemmo neene” iye.
6Ebina ebi gutte asheenaꞌo tookkii koteꞌi maa uchiyeete. Busheechi nihoo uroon “Hanaachi xumoon hiniich kashe emiribee qebe” iꞌi qollehe.
7Uro hamma tiyimmona, busheechi nihoo kupphiiꞌi qolletaa qajjii arooch qeyiye. 8Uuchinnee qemooba maaddoona uro hamma tiyiye. Tunebaani busheechi nihoo “Shaafiroon shaaciichi hambe; showoo giishechoon beshebe” iye. Ebina gutteenaꞌo tookkii koteꞌi maayoon maaheete.
9Uro bi naamacheenaa bi naayona tookkii hamma tiyimmona busheechi nihoo “Showoo womikketone; hiniich qebote; and showoo xum bedditone. Hiniich kashe emiribee qebote; yaach maaddee yaaꞌoona tiyiree ittoshi kexooch hammemmo ittoshine” iye.
10Tunebaani uro arooba arooch qemon qaawaanoone; biyoo koroo haxxeti gutte bi kureenaꞌonaa bi naamacheenon yechii hammiꞌi, and Yerusaalemi getteebeeti Yebusi katemee katinooch shaggiye. 11Yebusi katemee katinooch boonoshi shaggimmona, showoo xumeya iye. Bi aafee bushoo uroon “Hini Yebuseenaꞌochi katemooch hamiree, arooch qebone” iye.
12Tunebaani bi doono bi aafee bushoyich “Israꞌeeleenaꞌo tuneyaani bare asheenaꞌochi katemooch giyaachone. Besheree Gibaahi katemooch hambone” iye. 13Wotta daakkiꞌi, “Ne waataa ebi katemeenaꞌoochee ikkooch shagiree, Gibaaha woyee Raama qebone” iye. 14Ebina are katemoon besheꞌi hammiyeete; Biiniyaami yoodoochi katemee tuneti Gibaaha boonoshi shaggimmona aabe giyahan. 15Are katemoo waan daammiibeeti kaattoona wotteꞌi hammiyeete. Are katemooch hammii giyiꞌi, boonoshin bi kexooch giijji qeejjemmo aalletoyich, katemee daggeexi addibaabooch koteheete.
16Arooch boonoshi beetaa, ikke geene uro bi goyee daggooch shuunoon shuuneebee showoo xumemmona waahe. Ebi uro geppechi Efreemee showoochee waaꞌi Gibaaha koteti uroone. Are showee asheenaꞌo Biiniyaami yoodee asheenaꞌone. 17Ebi geene uro katemee daggeexi addibaabooch beeti gommechon ciinniꞌi, “Amoocheeniye ne waato? Amoochiye ne hammaabeeto?” iꞌi echehe.
18Uroo wochiꞌi ishichiye: “Yihudee showooch beeti Beetilehemi katemoochee waaꞌa, geppechi Efreemee showee gaadoochiye beshaa no hammaabeeto. Ta showoo aroochiye. Yihudee showooch beeti Beetilehemi katemooch hammaꞌa aroochee ta kexoochiye ta wottaabeeto. Bi kexooch taan qeejjemmi ashoon muccoye. 19No kureenaꞌo maayemmi gaferoo, wotta ne guuno taach, ne gonneenaa noonna tookkii beeti aafee bushoonoyich koshonaa woyinee uyoona beetone. Nooch aalleti mooyo amolla aalloone” iye.
20Geene uro wochiꞌi, “Diggoo ittoshich tunebe. Ittoshich qaawii beeton ta tuniyemmo taane. Amolla tunetaa, hini addibaabooch qeyaahote” iye. 21Bi kexooch daammii giijjiye. Kureenaꞌoyich boonoshi maayemmon immiye. Iibbeenaꞌoo boonoshi baatoon macheheete; maa uchiinoo iyeete.
22Emiree toommooch boonoshi beetaa, are katemeexi, ikkikke gaacaalli asheenaꞌo kexon giichiyeete. Kelloonoo xoobbiibee kechi doono tuneti geene uroon “Biinna tookki shunoon no maayemmoyich, ne kexooch giyiti uroon maach nooch kichibe” iyeete.
23Tunebaani are geene uro maach kechiꞌi boonoshich ishichiye: “Ta xibeenaꞌote, ebiyoommi gonde mooyon ciroona shuuneyaahote; hini uro ta kexooch giyitone. Ebi shaahe yeelliibeeti mooyon shuuneyaahote. 24Gidiide ta busheenaa uroochi naamacheena beetinaꞌone. Boonoshin and maach ta kichaa, ittoshi shunnimmon boonoshi toommooch tuniibote. Tunebaani hini uro toommooch ebiyoommi yeelliibeeti mooyon tuniyaahote” iye.#Hal. 19:5-8
25Tunebaani asheenaꞌo ebi mooyon waayemmon qajjiyeete. Uroo bi naamacheen maach boonoshich kichiye. Boonoshiyoo ureen mecheheete. Xumo bullin biin kaalli kaalloona mecheebee qeyiꞌi, showoo haraa gawukkiyeete. 26Showoo harimmona, bi keno qeyiti, are geene uroochi kechi kellooch waaꞌa dihiyan; aabe kechemmi wottoon, arooch dihaꞌa beehan.
27Bi keno maaddoona tiyii kelloon qechiye. Gommon hamma bi kechaahaa, bi naamache kechi shagooch bi kishoon yaggaa, kellooch yaryallaa qeyaꞌa beetin beeggiye. 28Biyoo “Ne tiyaa hambone” iye. Tunebaani biich qaareto aalloone. Biyoo ureen bi kuree toommooch minjiꞌi, bi kexooch wottee hammiye.
29Bi kexooch shaggiichii, shikkoon deebiꞌi bi naamacheen aaraa gutte beera kuxxiꞌi Israꞌeelee showoo bullich daachiihe. 30Ebin beeggiti asho bulli “Israꞌeeleenaꞌo Gibitsee boonoshi kechiti aaboochee tiijjiꞌi hanaach beddaahaa, ebiyoommi mooyo ciroona tunee woyee bekkee ariyaanoone. Amoon no tuniyemmo gaata, eke ebi mooyon yiiyi gabibote; yibbaate echeebote” iyeete.
Currently Selected:
Woraaferasheenaꞌo 19: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
