Woraaferasheenaꞌo 18
18
Mikinaa Daani Yoodoonochi Mooyo
1Ebi yemeenooba, Israꞌeeleenaꞌoyich taatoo aalloone. Ebi arooba Daani yoodee asheenaꞌo Israꞌeelee yoodeenaꞌo daggooch iristoon batt daneyaaneenaꞌo boonoshi tunetoyich, boonoshi kotemmi showoon qaawii beeheete. 2Ebi Daani yoodee asheenaꞌo boonoshi yoodo bulli daggoochee uuche giidechi asheenaꞌon kaacciꞌi, hami showoon qiidiree xiishi ciini, boonoshi woyemmoyich, Tsoriꞌi katemoonaa Eshitaꞌooli katemoonoochee wochee daachiiheete. Boonoshinoo “Hamiree showoon qiidi beegote” iyeete.
Ebi wocheeti asheenaꞌo geppechi Efreemee showooch hammii Miki kexooch shaggiꞌi, arooch qeyiyeete. 3Miki kechi gaꞌooch beechii ebi gurimaashe Lewee ashoochi qaaroon ariiheete; bi waan hammiꞌi, “Hiniich amooniye ne hallaa beeto? Neen deebito konine? Hiniich neen deebiti mooyochi amoone?” iyeete.
4Biyoo boonoshich wochiꞌi, “Miki taach ebinaa ebinon tuniihe; taachoo gijjoon qocciye. Tawoo biich qeeshoon tunehoye” iye.
5Boonoshiyoo biin “Ebi no gommo kaamoonaa kaamee qayonon no ariyemmoyich, Yeerin nooch echebe” iꞌi qolleheete.
6Qeeshoo “Ittoshi gommon Doono Yeeri kaachitone; diggoona hambote” iye.
7Ebina ebi uuche asheenaꞌo aroochee kechii, Layishi katemooch hammiyeete. Sidoonee asheenaꞌochoommon are katemeexi asheenaꞌo keqqaalloon diqqoona beemon beeggiyeete. Ebi asheenaꞌo diggoona beeti asheenaꞌo, diqqeenaꞌonaa koninolla kaaraalli asheenaꞌonane. Qaawiibeeti mooyo bulli boonoshich beetone. Boonoshiyoo Sidooneenaꞌo waanee wokkiꞌi, asho bulliyeenoo bariꞌiniye boonoshi beeto. 8Ebi uuche asheenaꞌo Tsoriꞌi katemoonaa Eshitaꞌooli katemoonooch beeti boonoshi maneenaꞌo waan wottemmona, boonoshi maneenaꞌo boonoshin “Nooch ittoshi gettemmi, amee mooyon yechiꞌi waahote?” iyeete.
9Boonoshiyoo “Ittoshi tiyaa hami koyone; are showoo oogeti gaawe showoo bi tunoon beeggeto noone. Baad cikki duuboon hiniich koteyaahote; kaate hami are showooch giyiree showoon yeshote. 10Arooch shagiree diqqeꞌi beeti asheenaꞌon danemmo ittoshine; showoo gaminoone. Ashich qaawiibeeti mooyo amolla shappaani showoon Doono Yeeri ittoshi kishooch beshiiꞌi immitone” iyeete.
11Ebina Daani yoodoochee koyoyich cuyee qanniti shiritte balle asheenaꞌo Tsoriꞌi katemoonaa Eshitaꞌooli katemoonoochee kechii hammiyeete. 12Boonoshiyoo Yihudee showooch beeti Qiriyaat Yeꞌariimi katemoochaa aabi-gimo waan kaamboon geddiꞌi koteheete. Ebi xaaꞌoo hanaach beddaahaa Daani Yoodeenaꞌochi Kaambo getaa bi ceekkeebeeto ebichiye. 13Aroochee hammiꞌi geppechi Efreemee showooch beeti Miki kexooch shaggiyeete.
14Layishi katemee guudoona beeti showoon qiidooch hammiti uuche asheenaꞌo boonoshi maneenaꞌoyich “Ebi kexinaꞌo daggoochee ikkooch efoodo, terafimeenaꞌo, qiicaa shuuneeti shahalloonaa qaaqqooch wociitaa shuuneeti shahalloona beeto bi tunoon arii beetote? Ebin aabichi ittoshi gettemmo gaata gabibote” iyeete. 15Aroochee ebi gurimaashe Lewee asho beeti Miki kexooch hammiꞌi biin diggiiheete. 16Areegaata, koyoyich qanniꞌi waati shiritte balle Daanee yoodee asheenaꞌo uxeree kellooch neexee beeheete; 17qeeshoo ebi koyoyich cuyee qanniti shiritte balle asheenaꞌona tookkii neexeꞌi bi beetaa, showoon qiidooch hammiti uuche asheenaꞌo kexooch giyiꞌi qiicaa shuuneeti shahalloon, efoodoon, terafimeenaꞌonaa qaaqqooch wociitaa shuuneeti shahalloonon daammiyeete.
18Ebi asheenaꞌo Miki kexooch giyiꞌi qiicaa shuuneeti shahalloon, efoodoon, terafimeenaꞌonaa qaaqqooch wociitaa shuuneeti shahalloonon boonoshi daammimmona, qeeshoo boonoshin “Amooniye ittoshi hallii beeto?” iye.
19Boonoshiyoo “Cikkiree ne noonoon yeshe! Noonna tookki hamiree, nooch nihoonaa qeeshoonon tunebe; ikke kechi asheenaꞌoyich qeeshoo tunoyee Israꞌeelee daggeexi yoodoonaa kechi ashoonoyich qeeshoo tuno neech gaaweyaache?” iyeete. 20Ebi mooyo qeeshoon oogichii emirikkiye. Biyoo efoodoon, terafimeenaꞌonaa qiicaa shuuneeti shahalloonon yechiꞌi, boonoshina tookkii hammiye. 21Boonoshiyoo guuddii wotteꞌi, boonoshi bushiisheenaꞌon, boonoshi gijjeenaꞌonaa boonoshi qiiceenaꞌonon aaf shiichiiꞌi hammiyeete.
22Miki kexoochee giishechoon boonoshi wokkiichaa, Mikichi giyeenaꞌo ceegeeꞌi ikkooch kiceeheete. Boonoshiyoo Daanee asheenaꞌo waan dabbii shaggiꞌi, 23boonoshi waan cookiyeete. Daanee asheenaꞌo gubb guuddiꞌi, Mikin “Ebi shaahe asheenaꞌon yechaꞌa ne waato, akkiꞌaane?” iyeete.
24Biyoo wochiꞌi, “ ‘Akkiꞌaane?’ ittoshi ii beeto, ebi ama getone? Ta shuuneti ta nuggisheenaꞌonaa ta qeeshoonon yechiꞌi hammito ittoshine. Illa taach echeti amee mooyo beete?” iye.
25Daanee asheenaꞌo wochiꞌi, “No toommooch cookoo ne qayigaata gaawiye. Ebi tuno qayigaata, hini asheenaꞌo ipperee ne toommooch iritoon deebemminaꞌone; neennaa ne kechi asheenaꞌonochi kashoo aallemmone” iyeete. 26Daanee asheenaꞌo ebin gettiichii, gommon qaxiriyeete. Mikiyoo biyee beshe giidechinaꞌo boonoshi tunoon beeggiꞌi, bi kexooch wottee hammiye.
27Boonoshiyoo Miki shuuneti shahalleenaꞌonaa qeeshoonon yechii Layish hammiꞌi, keqqaalloon diqqoona beeti asheenaꞌon goraadoona wuxiyeete. Are katemoonoo qaaqqoona michiyeete. 28Layishi katemoo beeto Sidooni katemoyee wokkiꞌi bi tunetoyich, wotta areexi asheenaꞌo bare asheenaꞌona tookkii yeshaalleenaꞌo boonoshi tunetoyich, boonoshin wodiito koniyoona aalloone. Layishi beeto, Beet Rehoobi gaꞌooch beeti bamboochiye.
Daani yoodee asheenaꞌo ebi katemoon wochinnoon shuuneꞌi, arooch koteheete. 29Are katemoonoo Israꞌeeli bushoo tuneti, boonoshi qaabbechi Daani shigoona Daani iꞌi shigiiheete. Aroyee aaf are katemee shigo Layishi getteehe. 30Daani yoodee asheenaꞌo ebi arooch boonoshich qiicaa shuuneeti shahalloon neechiyeete. Muusi bushoochi bushoo, Gerishoomi bushoo Yonaataaninaa bi bushiisheenaꞌona asheenaꞌo kecaa hammiti aabooch beddaahaa, Daani yoodee asheenaꞌoyich qeesheenaꞌon tuneheete. 31Boonoshiyoo Doono Yeerichi kexo Shilooha bi beeti yemeeno bullin Miki shuuneti, qiicaa shuuneeti shahalloon arooch neechiyeete.
Currently Selected:
Woraaferasheenaꞌo 18: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
