Woraaferasheenaꞌo 20
20
Israꞌeeleenaꞌo Koyoyich Qannoo
1Aroochee Daanee Beershaab beddaahaa beeti, wotta Gilaadee showooch beeti Israꞌeeleenaꞌo bulli ikke kashoon tuneꞌi kechiyeete. Mitsiphi katemooch Doono Yeeri aafooch kiceeheete. 2Israꞌeelee yoodeenaꞌo bullichi ukkireenaꞌo ebi kiceeti Yeerichi asheenaꞌo daggooch beetinaꞌone; ebi kiceetinaꞌo goraadoon cuyeebeeti, baatechi, awudde balle hume ginee naayinaꞌone. 3Areegaata, Israꞌeeleenaꞌo Mitsiphi katemooch kiceyoon Biiniyaami yoodee asheenaꞌo waayeheete.
Israꞌeeleenaꞌo “Ebi shaahe gonde mooyo aabichaa bi shuuneeto gaata, nooch getote” iyeete. 4Lewee asho tuneti, qititi ureechi keno tiyiꞌi ishichiye: “Taannaa ta naamacheena Biiniyaamee showooch beeti Gibaaha qeya hammehone. 5Gibaahi katemeexi asheenaꞌo ta toommooch tiyiꞌi kexon xumoona giichiyeete. Taanoo wuxiya iyeete. Ta naamacheenoo boonoshi mechetaa qitiyan. 6Ta naamachechi dubenoon daammaa maaccaa gishiishichaꞌa, Israꞌeeleenaꞌo beeti showoo bulliich daachiiho. Ebin ta tuniito, ebi asheenaꞌo yeelliiti eeꞌe mooyon Israꞌeeleenaꞌo daggooch boonoshi tuniitoyichiye. 7Israꞌeeleenaꞌote, illa ittoshi bulli ebi mooyon echeeree, ikke badd wochibote” iye.
8Aroochee asheenaꞌo bulli ikke kasho tunee tiyii neexeꞌi, “No daggoochee koniyoona bi duukkaanooch wotteyaachemmone; bi kexoochoo hamaachemmone. 9Illa and Gibaahi toommooch no tuniyemmi mooyo ebine: Ixoon dufiree, Gibaahin kochemmo noone. 10Israꞌeelee yoodeenaꞌo bulli daggoochee balle asheenaꞌoochee aashireenaꞌo, humeenaꞌoochee balleenaꞌo, aashire humeenaꞌoochee wotta humeenaꞌo ginee naayinaꞌoyich shohoon giddiyemminaꞌone. Ginee naayinaꞌo Gibaaha shagiree are katemeexi asheenaꞌo Israꞌeeleenaꞌo toommooch boonoshi tuniiti yeelliibeeti mooyoyich kaalloon wochemminaꞌone” iyeete. 11Ebina Israꞌeeleenaꞌo bulli are katemoon kocha, ikke kasho tuneꞌi ikkooch kiceeheete.
12Israꞌeelee yoodeenaꞌo Biiniyaami yoodo beeto bulliich wochoon daachiiꞌi ishichiyeete: “Ebi ittoshi daggooch tuneti gonde mooyo, amoone? 13Andoo boonoshin wuxiree Israꞌeelee daggoochee ebi gonde mooyon no aalliyemmoyich, Gibaaha beeti, gaacaalli asheenaꞌon nooch beshiiree imbote” iyeete.
Tunebaani Biiniyaameenaꞌo boonoshi maneenaꞌo tuneti Israꞌeeleenaꞌochi yibbaatoon waayemmon qajjiyeete. 14Boonoshiyoo Israꞌeeleenaꞌon koyoyich boonoshi katemi katemoochee waaꞌi, Gibaaha kiceeheete. 15Arooba boonoshi katemi katemoochee waati Biiniyaameenaꞌo haddeeheete. Boonoshiyoo aricheti shabaatte balle Gibaahee asheenaꞌo giyaanoon, goraadoon cuyee beetinaꞌo hiyaa shiritte humeenaꞌo tuneheete. 16Eboshi bulli daggooch shabaatte balle aricheti, yooche kishechi asheenaꞌo beetinaꞌone. Eboshiyoo boonoshi ikkikkoona xeppelloon awureꞌi, qelli eexinona muricaani asheenaꞌone.
17Israꞌeeleenaꞌo, Biiniyaameenaꞌo giyaanoon, goraadoon cuyeebeeti awudde balle hume ginee naayinaꞌon kiciyeete. Eboshi bulli ginee asheenaꞌone.
Israꞌeeleenaꞌo Biiniyaameenaꞌon Koyo
18Israꞌeeleenaꞌo tiyiꞌi Beeteeli hammiyeete; boonoshiyoo “No daggoochee Biiniyaami yoodee asheenaꞌon shiichiree koni koya?” iꞌi Yeerin echeheete.
Doono Yeeriyoo “Yihudi shiichiree hambe” iye.
19Ebina Israꞌeeleenaꞌo bi dechara maaddoona kechii hammiꞌi Gibaahi katinooch kaamboon geddii koteheete. 20Israꞌeeleenaꞌo Biiniyaameenaꞌon kocha hammiyeete. Boonoshiyoo Gibaahi ciinooch yaari yaaroona boonoshi ginee naayinaꞌon neechiyeete. 21Biiniyaameenaꞌo Gibaahee kechiꞌi, arooba hiyaa gutte hume Israꞌeelee ginee naayinaꞌon wuxiyeete. 22-23Aroochee Israꞌeeleenaꞌo hammiꞌi, xumemmi wottoon Doono Yeeri aafooch eeppiyeete. Boonoshiyoo “No maneenaꞌo tuneti Biiniyaameenaꞌona koyoyich wochinnoon hambona?” iꞌi Doono Yeerin echeheete.
Doono Yeeriyoo “Eeha, hamiree koyebote” iꞌi wochiye.
Ebina Israꞌeelee ginee naayinaꞌo kuppheꞌi, aafi boonoshi xaaꞌooch yaari yaaroona neexeheete. 24Guttinnee qemooba Israꞌeeleenaꞌo Biiniyaameenaꞌo waan giddeheete. 25Biiniyaameenaꞌo Israꞌeeleenaꞌon kocha, wochinnoon Gibaahee waaheete. Andoo goraadoon cuyeebeeti aaraa shimitte hume Israꞌeeleenaꞌon wuxiyeete.
26Aroochee Israꞌeeleenaꞌo bulli Beeteel hammiꞌi aroochaa eeppiyeete; Doono Yeeri aafooch koteheete; xumemmi wottoonoo coomiyeete; Doono Yeeri aafooch micciibeeti deejjoonaa ikkittinee deejjoonon giddiiheete. 27-28Arooba Yeerichi wogee taabooto arooch beetone. Harooni bushoochi bushoo, Elazaari bushoo Finihaasi arooch maddee beetone. Israꞌeeleenaꞌo “No maneenaꞌo tuneti Biiniyaameenaꞌona koyoyich wochinnoon hambonaa, illa echeba?” iꞌi Doono Yeerin echeheete.
Doono Yeeriyoo “Hami koyebote; yaach boonoshin ittoshi kishooch beshiiree immemmo taane” iye.
29Aroochee Israꞌeeleenaꞌo Gibaahi guudooch aasheechi oti quyemmi ginee naayinaꞌon kotiiheete. 30Keejjinnee qemooba Israꞌeeleenaꞌo Biiniyaameenaꞌona tookki koyeya hammiꞌi, aroyee aaf boonoshi tuniitoommon, boonoshi ginee naayinaꞌon Gibaahi ciinooch yaaroona neechiyeete. 31Biiniyaameenaꞌo boonoshina koyeya kechiyeete. Katemoocheenoo boonoshi wokkemmoyich tunehe. Aroyee aaf boonoshi tuniitoommon, Beeteel daammiibeeti gommonaa Gibaaha daammiibeeti gommonooch beeti, gamini showoochaa Israꞌeeleenaꞌo daggoochee ikkikkeenaꞌon wuxiyeete. Boonoshiyoo shaasha bede Israꞌeeleenaꞌon wuxiyeete. 32Biiniyaameenaꞌoo “Ebiyee aafichoommon boonoshin kochaa wochaaniye no beeto” iyeete.
Tunebaani Israꞌeeleenaꞌo gubb shoki, katemoyee maach beeti gommooch boonoshin geechiya gabitinaꞌone. 33Ebina Israꞌeelee ginee naayinaꞌo gubb shokiꞌi, Baꞌaal Tamaar yaaroona neexeheete. Areegaata, ottii quyeꞌi beeti Israꞌeelee ginee naayinaꞌo wotta boonoshi aasheꞌi beeti, Gibaahi katemoochaa aabi-gimo waanee afaafinoona kechiyeete. 34Aroochee Israꞌeeleenaꞌo bulli daggoochee kaacaa kechiti, aashire hume ginee naayinaꞌo Gibaahin kochiyeete. Ginoo kupphee waahe. Biiniyaameenaꞌo boonoshi aallo katinnito bi tunoon batt ariyaaneenaꞌone. 35Doono Yeeri Israꞌeeleenaꞌo Biiniyaameenaꞌon koyi wochemmoyich tuniihe. Arooba Israꞌeeleenaꞌo goraadoon cuyeebeeti hiyaa uuche humaa ikke balle Biiniyaameenaꞌon wuxiyeete. 36Biiniyaami yoodee asheenaꞌoo koyaa wottee beetinaꞌo boonoshi tunoon ariiheete.
Israꞌeeleenaꞌo Biiniyaameenaꞌon Kochii Wochoo
Israꞌeeleenaꞌo Gibaahi guudoona boonoshi aashemmoyich boonoshi tuniiti ginee naayinaꞌon gibeneꞌi, Biiniyaameenaꞌoyich xaaꞌoon gawukkiꞌi gubb shokiyeete. 37Aashee ottiꞌi beeti asheenaꞌo afaafinoona Gibaaha wocee giyii katemee daggooch guuddiꞌi, asheenaꞌo bullin goraadoona ciichiyeete. 38Israꞌeelee ginee naayinaꞌonaa woyee aasheechii ottii quyee beetinaꞌona malletoon gedditinaꞌone; ebiyoo cufoo katemoochee tuqii shimaayooch keyigaata, 39Israꞌeeleenaꞌo guudi wotteree kochemmoniye.
Areegaata, Biiniyaameenaꞌo shaasha bede Israꞌeeleenaꞌon wuxitinaꞌone. Boonoshiyoo “Ebiyee aafi koyoochaa no tuniitoommon, andoo boonoshin kochaa wochaabeeto noone” iyeete. 40Areegaata, malletoo bekkehe; cufoo tuqii are katemoochee kaama kechiye. Biiniyaameenaꞌoo gubb ciinniꞌi, are katemoo bulliichee cufoo shimaayooch kechii beeton beeggiyeete. 41Aroochee Israꞌeeleenaꞌo boonoshi waan wotteheete; Biiniyaameenaꞌoo aallo boonoshich katinnito bi tunoon ariiꞌi, oogichii keqqiyeete. 42Israꞌeeleenaꞌo aafoochee gubb wotteꞌi, barahoo waan woceheete. Tunebaani muricon hakkaaneenaꞌone. Katemeenaꞌoochee kechiibeeti Israꞌeeleenaꞌo gutte daggoochaa boonoshin wuxiyeete. 43Israꞌeeleenaꞌo boonoshin giichiyeete. Ciroona neexeyaanoon, Gibaahaa aabi-keyo waanee ciinooch beddaahaa boonoshin wuxiibee yookkii dabbiyeete. 44Arooba aaraa shimitte hume Biiniyaameenaꞌo qitiyeete; eboshi bulli ginee anaaminaꞌone. 45Boonoshi daggoochee echetinaꞌo barahoo waan beeti, Rimooni ooge xaqqooch wocciyeete. Gommoochaa uuche humeenaꞌo qitiyeete. Andoo Israꞌeeleenaꞌo echetinaꞌon Gidoom beddaahaa yookkiꞌi, gutte humoon wuxiyeete. 46Arooba Biiniyaameenaꞌo daggoochee goraadoon cuyeebeeti hiyaa uuche humeenaꞌo qitiyeete; eboshi bulli ginee anaaminaꞌone.
47Tunebaani shiritte balle asheenaꞌo muricciꞌi, barahoo waan beeti, Rimooni ooge xaqqooch wocciyeete. Ebi arooch awudde agenoon koteheete. 48Aroochee Israꞌeeleenaꞌo echeti Biiniyaameenaꞌo waan wotteꞌi, ashoon tuneba gijjoon, boonoshi daneto bullin goraadoona wuxii aalliiheete. Arooch beeti katemeenaꞌo bullinoo qaaqqoona michii aalliiheete.
Currently Selected:
Woraaferasheenaꞌo 20: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
