Woraaferasheenaꞌo 17
17
Miki Shahalloon Shuuno
1Geppechi Efreemee showooch Miki getteebeeti ikke uro beehe. 2Biyoo bi indeen “Humaa ikke balle sheqeelee birewoo gaachetaa, gaajjiti uroon ne ufon ta waamona waayeto taane. Ebi birewoon deqqeto taane; ta waan beetone” iye.
Bi indeyoo “Ta bushoocho, Doono Yeeri neen diiribe” iyan.
3Biyoo ebi gijjoon bi indeech wochiye. Bi indeyoo “Hini gijjoon qiicaa shuuneeti shahalloonaa qaaqqooch wociitaa shuuneeti shahalloona shuuneyemmoyich, ta bushoo qoodoon Doono Yeerich immemmi taane. Andoo ebi gijjoon neech wochiree immemmi taane” iyan.
4Gijjoon bi indeech bi wochimmona, aroochee gutte balle sheqeelee birewoon daammaa gooshukkoyich immahan. Biyoo qiicaa shuuneeti shahalloonaa qaaqqooch wociitaa shuuneeti shahalloonon tuniiꞌi shuunehe. Ebiyoo Miki kexooch kotehe.
5Ebi uro Mikich goyinnee xaaꞌoo beetone. Biyoo ikke efoodoonaa terafimeenaꞌonon#17:5 Terafimo, ashoon shaahiitaa shuuneeti shahalloone. shuuneꞌi, bi bushiisheenaꞌo daggoochee ikkoon qeeshoo tuneree biich bi maddemmon tuniihe. 6Ebi yemeenooba, Israꞌeeleenaꞌoyich taatoo aalloone. Asho bi ikkikkoona gaaweto tuneꞌi biich bekketon tunii beehe.#Wora. 21:25
7Yihudee showooch, Yihudee yoodee asheenaꞌona tookkii Beetilehemi katemooch koteti ikke gurimaashe Lewee asho beehe. 8Ebi uro bare beeyi xaaꞌoon qaawiꞌi Beetilehemi katemoochee tiyii hammiye. Hammiibee geppechi Efreemee showooch beeti Miki kexooch shaggiye.
9Mikiyoo “Amoocheeniye ne waato?” iꞌi echehe.
Biyoo “Yihudee showooch beeti Beetilehemi katemee asho taane; tawoo Lewoo taane. Ta beeyemmi showoon qaawaꞌaaniye ta waato” iye.
10Mikiyoo “Taanna tookki kotebe; taach nihoonaa qeeshoonon tunebe; tawoo neech natooch aashire sheqeelee birewoon, wotta tahoonaa maayoonon immemmo taane” iye. 11Ebina ebi Lewee gurimaashoo Mikina tookkii beemoyich deꞌa iye. Mikichoo bi bushiishee daggoochee ikkoommon tunehe. 12Miki biin qeeshoon tuniihe. Biyoo Mikich qeeshoo tuneꞌi, bi kexooch biinna tookkii kotehe. 13Mikiyoo “Ebi Lewee asho taach qeeshoo bi tunetoyich, Doono Yeeri ta beemon mashaamiyemmo bi tunoon ariito taane” iye.
Currently Selected:
Woraaferasheenaꞌo 17: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
