Hosee'i 13
13
Israꞌeeleenaꞌo Toommooch Kindemmi Yeerichi Kaaro
1Efreemi yoodo yibbaatemmona bare yoodeenaꞌo shattii qewee beeheete. Biyoo Israꞌeelee showooch arichetone. Tunebaani Baꞌaaloyich goyinnoona xuꞌecho tuneꞌi qitiye. 2Andoo axaaxoon woddii woddii shuuneheete. Boonoshi birewoon ukkiꞌi, boonoshi qellich shahalleenaꞌon shuuneheete. Ashi ariyoona shuuneeti, misileenaꞌon shuuneheete. Bulliyona shuunee ariyechochi shuuneenaꞌone. Boonoshiyoo ishichiyeete: “Eboshich deejjoon giddii beetinaꞌo maamochi shahalloon shumbeete” iyeete. 3Ebich boonoshi, maaddee quboomminaꞌo, harimmona bekkech shokkeebeeti keetoomminaꞌo, maayi buchi xaaꞌoochee yongo tiijjii daammiibeeti maaxxoomminaꞌo, wottoo mallee kelloona kechiibeeti cufoomminaꞌo tunemminaꞌone.
4Doono Yeeri ishichiye: “Tunebaani ta, Gibitsee ittoshin kichiti, ittoshi Nuggishoo Doono Yeeri taane. Tayee besh bare nuggishoo ittoshich aalloone. Tayee besh wodiyecho baroo aalloone. 5Barahoochaa, shuuꞌi showoochaanoo ittoshin shiimehoye. 6Ittoshich ta maanjaa, michiyote; maa michiꞌinoo geeciyote; taanoo battehote.#Yibba. 8:11-17 7Ebich ta ittoshich daaheroommon, gommooch ottii quyeebeeti maahoommonoo tunemmo taane. 8Bi bushiishoo bokketi diibechoommon ittoshin yexxemmo taane; ittoshinoo shiiqqemmo taane. Aroochaanoo daaheroochoommon ittoshin yeshi maayemmo taane; kubbi cooxochoommon ittoshin yangixxemmo taane.
9“Israꞌeeleenaꞌote, ittoshin gaachaabeeti ta toommooch ittoshi tiyitoyich, aallemmo ittoshine. 10Taatoonaa iraasheenaꞌona ittoshich ichemmoyich echeto ittoshine. Ishigaata, ittoshin bi wodiyemmoyich, ittoshi taatoo and aaye? Ittoshi katemoo bulliich iraasheenaꞌo aayeete?#1 Saam. 8:5 11Kaaroona taatoon ittoshich immehoye; ooge ta kaaroonoo biin aalliihoye.#1 Saam. 10:17-24; 15:26
12“Efreemi xuꞌo kooreetone; bi axaaxoo ikkooch guteetone. 13Maaxoo manjeti ureechoommon xuuxo biich woyemmone. Tunebaani bi, ariyoo biich aalli bushoone. Bi shiijjemmi aabo shagiyooba bi indee maacoochee keyon qaawaani bushoommone. 14Maash hamoochee boonoshin biishe echiyehote? Qitee giidoochee boonoshin shiwe wodiyehote? Qitoocho, ne naxeenaꞌon yeshi wobe! Maashoocho, ne aalliyoon yeshi wobe! Ebiyee bekk boonoshich ariqqeyaachemmo taane.#1 Qoro. 15:55 15Bi maneenaꞌo daggoochaa bi gaannetaanona aabi-keyo waanee yongo barahoochee yongebee Doono Yeeri ta waanee waaree, bi aachi xuuphoon takkemmone; bi aachi oppoonoo shuuꞌiyemmone; bi ginjabeetoochee aaxxe bi qiico bullin tiijji daammemmone. 16Shamaaree asheenaꞌo boonoshi xuqqiti xuꞌoyich echeyemminaꞌone. Boonoshi Nuggishoo toommooch boonoshi tiyitoyich goraadoona dihemminaꞌone. Boonoshi nallefeenaꞌo ceqqetaa qitemminaꞌone. Boonoshi maacheenaꞌochi yeqqefoo goheyemmone” iye.
Currently Selected:
Hosee'i 13: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
