Hosee'i 14
14
Israꞌeeleenaꞌo Yeer Waan Wottemmoyich Hoseeꞌi Qollo
1Israꞌeeleenaꞌote, ittoshi axaaxee naboona ittoshi dihitoyich ittoshi Nuggishoo Doono Yeer waan wottebote! 2Biich ittoshi gettemmi qaaroon yeshiree Doono Yeer waan wottebote; biichoo ishichibote: “No axaaxoo bullin maaribe; no qolloon waayebe; no noonoochee kechiibeeti galletoon neech giddiyemmo noone. 3Asooreenaꞌo noon wodiyoon hakkaacheete; ginee haresheenaꞌonoo yebbeyaachone. Ebiyee bekk no hajjee kishoona no shuunetinaꞌon, ‘No nuggisheenaꞌote’ getaachone. Nihaalleenaꞌo ne waanee ariqqoon danee beetinaꞌone” getote.
Andire Kasho Gibenikkeyoo
4Doono Yeeri ishichiye:
“Ta kaaro boonoshi waanee bi wottetoyich,
ta asheenaꞌon ta waan wochemmo taane;
cikkishoo boonoshin shunnemmo taane.
5Israꞌeeleenaꞌoyich doshoon (caagibanoon) tunemmo taane;
gaawe mocee bungoochoommon bungemminaꞌone;
Libanoosee yigoochoommon cammon awuremminaꞌone.
6Nolli ateree gafgappemminaꞌone;
zayitee mixochoommon malletechinaꞌo tunemminaꞌone;
boonoshi cinno Libanoosee michi cinnoommon tunemmone.
7Asheenaꞌo wochinnoon boonoshi yiirooch kotemminaꞌone.
Boonoshiyoo maayoochoommon waarwaariyemminaꞌone;
woyinee qomboochoommon bungemminaꞌone;
boonoshi cinno Libanoosee woyinee uyoochoommon aricheto tunemmone.
8Efreemo, shahalleenaꞌoonaa taannon amo daniihe?
Ne qolloon waayaabeeto, neenoo shiimaabeeto, taane;
ta, waarwaariibeeti ciidee mixoommo taane;
ne aafeebeeto taannane” iye.
9Ariyechi asho ebi mooyinaꞌon shalligibe. Shalligechoo ebi mooyinaꞌon ariibe. Doono Yeerichi gommo kaamoone; cadiqeenaꞌo aroona hammemminaꞌone; tunebaani axaaxechinaꞌo tepheeree dihemminaꞌone.
Currently Selected:
Hosee'i 14: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
