Imbaaqoomi 2
2
1Dilaalee toommooch kechehoye; arooch keyiichi Doono Yeeri taach gettimmon, ta cookoyichoo bi wochemmi wochoon waayoyich quya beeyehoye.
Guttinnoon Yeeri Wochiti Wochoo
2Doono Yeeriyoo taach ishichiye: “Ebi neech ta bekkiiya ii beeti yaaꞌoon shemmoyich bi iritiyaachemmoyich tuniiree, yalle xaqqooch kooribe; 3kooriree ne kotiyemmo, yaaꞌoo ceennemmo and tuno bi qajjitoyichiye; tunebaani ebi yaaꞌoo ceennemmi aabo afaafinoona waa beetone; ebi iberoone. Yagemmo bi shaahitaanona haaꞌiiree quyebe. Iberoon ceennemmone; ciroona yagaachemmone.#Hib. 10:37 4Ne kooremmo ebiniye: ‘Gonde asheenaꞌo yagaachemminaꞌone; tunebaani cadiqeenaꞌo, ta toommooch mulloon boonoshi tooꞌitoyich, kashoona beeyemminaꞌone’ ii beetoniye” iye.#Room. 1:17; Gala. 3:11; Hib. 10:38
Gonde Asheenaꞌon Yeeri Naxemmo Tuno
5Gaanno ashoon dawushii beetone. Woddelleenaꞌo geecechinaꞌonaa kotee kasheyaaneenaꞌonane. Boonoshiyoo maashoommi woddelleenaꞌone; qitoochoommon beddiye geton ariyaaneenaꞌone. Aagetee asheenaꞌo bullin boonoshi waan kiciyeete; asheenaꞌo bullinoo keccii daammiyeete. 6Boonoshi kochii yechiti asheenaꞌo ebi asheenaꞌon cooqqiri, hoxe qallayibee ishichemminaꞌone:
“Ittoshicho tuneyaanoon gutiibeeti ittoshich, woowo!
Yechiyoo icheti qiicoona ittoshi gaanne beeyemmo,
aati wottooniye?” gettemminaꞌone.
7Gijjoon ittoshi erettiiti asheenaꞌo ittoshi toommooch tiyiree, shatona ittoshi qewemmoyich tuniyemminaꞌone. Ittoshi gijjoonoo bogi daammemminaꞌone. 8Meeti aageteenaꞌo gijjoon ittoshi boggitoyich, boonoshi daggoochee curo tuneꞌi echetinaꞌo ittoshi gijjoon boggemminaꞌone. Ebiyoo meeti ashi damoon ittoshi ukkitoyich, wotta maaco manjiꞌi showee toommonaa katemoonooch beeti asheenaꞌo toommooch ittoshi tuniiti mooyoyichiye.
9Boggii ittoshi deqqiti mooyona ittoshi kexon gaanniiti, gonde mooyo ittoshi toommooch bi shagaachemmoyich, manje kexinaꞌon haggiti, ittoshich woowo! 10Ittoshi maroo ittoshi toommooch yeelloon deebitone; meeti asheenaꞌon wuxii aalliyoona ittoshi toommooch aalloon deebito ittoshine. 11Ittoshi kexo shuuneeti xaqqeenaꞌo ittoshi gondoyich cookemminaꞌone; michi wogaagireenaꞌoo boonoshich wochemminaꞌone.
12Ashoon xuꞌonaa damoon ukkoona katemoon shuuneebeeti ittoshich woowo! 13Ittoshi kochii yechiti aageteenaꞌo haggito bullin qaaqqoo maa aalliyemmoyich, boonoshi aajjito bulliyoo gaacaallo bi tunemmoyich tuniito, Beshe Mawe Doono Yeeri toone? 14Tunebaani aaco baharooch ceenoommon showoo Doono Yeerichi oogee yiiroon ariyoona ceennemmone.#Isi. 11:9
15Boonoshi achoon beegoyich, ittoshi giyeenaꞌo kaaree shiixxee xoofoochee woyinee uyoon uyiree mashemmoyich tuniibeeti ittoshich woowo! 16Ittoshiyoo oogoochee kindiree giishemmo ittoshine; uyi ittoshi mashetaa, ittoshi achoo bekkemmone. Doono Yeeri bi qanne kishooch beeti naxee xoofoon ittoshich bi deejjaa uchemmo ittoshine. Ittoshi oogo giishemmone. 17Libanoosi mixon qeccee ittoshi aalliyoommon qeccetaa aallemmo ittoshine. Arooch beeti cooxinaꞌon wuxii ittoshi aalliitoyich keqqemmo ittoshine. Ebiyoo meeti ashi damoon ittoshi ukkitoyich, wotta maaco manjiꞌi showee toommonaa katemoonooch beeti asheenaꞌo toommooch ittoshi tuniiti mooyoyichiye.
18 Shahallee gaaco amoone? Ashi kishoona shuuneeti mooyo toone? Kootoyee besh bi waanee amolla daneyaache. Biin shuuneti asho, ebi noona miime mooyon bi gibeneebeeto amoyichiye? 19Mixoochee shuuneeti mooyon tibe, miime xaqqoonoo kaamebe, ii beeti ittoshich woowo! Ebi aroo ittoshich yaaꞌoon bekkiyoon hakkehe? Bi achoo aachoonaa birewoona dikkeeto bi tunetaanoona, kashaalli mooyone.
20Tunebaani Doono Yeeri yaafoo tuneti bi yaafee kexooch beetone; showee toommooch beeti asho bulli bi aafooch minnakanna gettaaye.
Currently Selected:
Imbaaqoomi 2: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
