Imbaaqoomi 1
1
1Doono Yeeri keemechi Imbaqoomi yaaꞌoona beeggemmoyich bi tuniiti wocho:
Dayinneto Dabitoyich Imbaqoomi Yeer Waan Cookoo
2Doono Yeero, noon ne gaachemmoyich ta cookaa, waayoon ne qayi beeyemmo aati wottooniye? “Xukketo noone” iyaꞌa ne waan cookiyoye; tunebaani shaggaꞌa noon wodiyaachine. 3Ebi shaahoon ta duꞌemmoyich amoyich tuniinne? Ebi shaahe gonde mooyo tunee beetaa aabichaꞌa cikkii qajjenne? Ashoon aalliyoonaa xuꞌoona ta guudoona tunee beetone; bulli xaaꞌooch kaaroonaa yexoona tiyii beetone. 4Ebich sheeroo niretone; dayinnetoo dabitone. Gonde asheenaꞌo kaamoo tuneti asheenaꞌon giichitinaꞌone; ebich dayinneto xummetone.
Yeeri Wochiti Wochoo
5Doono Yeeri bi asheenaꞌoyich ishichiye: “Eke ittoshi guudoona beeti aagetee asheenaꞌon ciinote; ciiniree oogichi worganebote; asho koniyoona getaa iberiyoon ittoshi hakkaani mooyon ittoshi yemeenooch shuuneya ii beeto taane.#Mish. 13:41 6Boonoshi hajjoo tuneyaani showoon koyi yecha showee toommo bulliich oriheebeeti, maacmanjeenaꞌonaa afaafinechinaꞌona tuneti Baablooneenaꞌon tiijjemmo taane. 7Boonoshiyoo shattii giiriitinaꞌone. Oogeti geecechinaꞌo boonoshi tunetoyich, boonoshi qelloona boonoshi sheereenaꞌone.
8“Boonoshi haresheenaꞌo wocona maahoyee besheenaꞌone; shaaceti okeroyee beshoonoo shayinaꞌone. Hareshechinaꞌo guufeebee wohi showoochee waaheete; bi maayemmon yecha yoobbii kindiibeeti booyochoommon yoobbiyeete.
9“Boonoshi bulli hukkoyich qanniꞌi waaheete; boonoshi ginee naayinaꞌo barahee yubee yongoochoommon aaf guubbiyeete; baharee gasheexi qacoommi meeti ashoon keccii daammiyeete. 10Taateenaꞌon qallayiyeete; iraasheenaꞌonoo cooneheete. Mishigo bullin ciinniichii miicciyeete; showoon gutiꞌi are mishigechi katemoon yechiyeete. 11Aroochee yongo yongeꞌi beshoommon besheheete. Boonoshiyoo boonoshi giidoon nuggishoochoommon gibeneebeeti xuꞌechi asheenaꞌone” iye.
Wochinnoon Imbaqoomi Yeer Waan Cookoo
12Yaafe ta Nuggishoo Doono Yeero, ne, bulli yemeenoon beeyechi Nuggishoo neene. No qitaachemmo noone. Doono Yeero, no toommooch boonoshi nallemmoyich Baablooneenaꞌon kaaccehine; no Xaqqee Inderoocho, noon boonoshi sheeremmoyich boonoshich giidoon immeto neene. 13Gonde mooyon bi ciinaachemmoyich, ne aafo yaafoone; gonde mooyon ciinnaabee cikkii qayaachine. Ishigaata, ebi dawushechinaꞌon ciinnaabee aabichaꞌa cikkii qajjenne? Gonde asheenaꞌo boonoshiyee beshe kaame asheenaꞌon boonoshi aallii beetaa aabichaꞌa cikkii qajjenne? 14Ashoon haashoon tuniihine; boonoshin yaabii qeejjiibeeto aalli, showoona yuummiibeeti halleenaꞌonoo tuniihine. 15Baablooneenaꞌo haashoon qamaaxiroona yeshoommon ashoon yechiyeete; haashoon dabboona geechii kichoommon geechiyeete. Ebi boonoshi yechiti mooyoyich emiroona cookiyeete. 16Boonoshi dabbeenaꞌo mashaamiti beemon boonoshi beeyemmonaa shaawi maayoon boonoshi maayemmonoyich boonoshi tuniitoyich, ebi dabbeenaꞌoyich deejjoon deejjiyeete; ixaanoonoo shookkiyeete. 17Ishigaata, boonoshi dabboon dufi yeshibee, aageteenaꞌonoo ariqqaalloon wuxibee bulli yemeenoon beebeeta?
Currently Selected:
Imbaaqoomi 1: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
