Imbaaqoomi 3
3
Imbaqoomi Corootiti Corooto
1Shoddoona giddeti keemechi Imbaqoomichi corooto ebine:
2Doono Yeero, worganikkiti ne shuunoon waayaꞌa,
oogichii shatteto taane;
ebi shuunoon no yemeenooch wochinnoon shuunebe;
no yemeenooch bi arichemmoyich tuniibe;
ne kaarooba noon maaroon batteyaahine.
3Yeeri wochinnoon Temaanee showoochee,
Yaafe Yeeri, Faraani geppoochee waa beetone.
Bi oogee yiiroo shimaayoon kaappitone;
biin naadoo showoo bulliich ceennitone.
4Bi waa beegaata, xeeyo phaqqoommon phaqqii beetone;
bi giidoo qereeꞌi beeti bi kishoochee,
bekko koojjii bekkee beetone.
5Biiyo bi aaf hammemmoyich tuniihe;
qitoo bi hillooch katini dabbemmoyich gettiye.
6Bi neexemmona, showoo shuuriye;
bi ciinnimmona aagetee asheenaꞌo qeweheete.
Wonna tiijjiꞌi bi gommo tuneti,
bulli aaboon beeti guudinaꞌo yiikkeeheete;
geppeenaꞌo dugilla koonniyeete.
7 Topphiyee asheenaꞌo boonoshi duukkaanoochaa oogichii keqqi beetaa,
Miidiyameenaꞌoo boonoshi kexoochaa keqqoona qewee beetaa, beeggoye.
8Doono Yeero, ne kaaremmoyich tuniitinaꞌo aacinaꞌone?
Ne kaareto aacinaꞌoniye?
Ne kaaree shiixxoon ne kindiito
bahareenaꞌo toommoochiye?
Ne asheenaꞌo wudoon danemmoyich ne tuniihooba,
quboon hareshoochoommon,
gaarichoommonoo yebbehine.
9Maꞌoon kichaa qanniihine;
shangoonoo bi kollooch ceechihine;
showoon ne gaahaa aaco xuupphiye.
10Guudinaꞌo neen beeggiꞌi, qeweheete;
ambamboo showoon machiꞌi beshee hammiye;
baharee aacoo goohiye;
aachi aayoo kaama tiyiye.
11Awureebee kindiibeeti ne shangee conjoochee,
wacciibeeti ne ginee aaxxoochee tiyitona,
aabeenaa ageneena boonoshi beetooch neexee doojjiyeete.
12Ippoona showee toommona shaꞌehine;
kaaroonoo aagetee asheenaꞌon neexxaa kotehine.
13Ne asheenaꞌon wodiyoyich,
ne huutteton wodiyoyich, kechehine.
Gonde ashi kexon guummoochaa happihine;
gaxxaꞌa bi godoon xalla bekkiihine.
14Noon shaci aalliiya yubee yongoochoommon waati,
girechon aashoochaa qooxxa iꞌi emiriibeeti,
ginechinaꞌochi iraashoon bi shangoona kochehine.
15Ne hareshoona baharoon ne neexxemmona,
giidechi baharo umbehe.
16Tawoo ebi bullin waayaꞌa qewehoye;
shatona ta noonoo tippehe.
Ta shaawusho shekirehe;
ta tingoo qewehe.
No etteenaꞌon Doono Yeeri naxemmi aaboon,
cikki quye beeyemmo taane.
17 Balaasee mixo aafemmon bi qajjitaanona
woyinee qombooch aafo aalletaanona
zayitee mixo bi dobbetaanona
budooch maayo shago qajjitaanona
bago dogoochee ciiretaanona
miimo maggooch aalletaanona
18ebi bulli tunetaanoona ta, Doono Yeerina,
taan wodiyechi ta Nuggishoona, emiremmo taane.
19Nuggishoo Doono Yeeri taach giidoon immii beetone;
ta baatoon doollee baatoochoommon kupphiyemmone;
guudi toommoochoo wocona ta kechemmoyich tuniyemmone.#2 Saam. 22:34; Shod. 18:33
Currently Selected:
Imbaaqoomi 3: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
